បណ្ឌិត សុខ ទូច៖ ខ្មែរត្រូវចងចាំនូវការប្រព្រឹត្តរបស់ថៃ ហើយពង្រឹងសមត្ថភាពបន្ថែមដើម្បីទប់ទល់នឹងសត្រូវ

បណ្ឌិត សុខ ទូច ប្រធានរាជបណ្ឌិត្យសភាកម្ពុជា បានបង្ហោះវីដេអូមួយនាថ្ងៃទី១២ ខែសីហា ឆ្នាំ២០២៥ ដោយលើកឡើងថា ប្រជាជនខ្មែរត្រូវតែចងចាំនូវការឈ្លានពានដ៏ឃោឃៅរបស់ថៃ មកលើកម្ពុជានៅពេលនេះ ហើយត្រូវពង្រឹងសមត្ថភាពខ្លួនឱ្យខ្លាំងបន្ថែមទៀត ដើម្បីទប់ទល់នឹងសត្រូវវិញ។

ការលើកឡើងរបស់លោកបណ្ឌិត នៅក្នុងវីដេអូមួយ ដែលលោកបានចុះទៅពិនិត្យផ្ទាល់ដល់ វត្ត​ប្រាសាទតាមាន់សែនជ័យ ​ស្រុកបន្ទាយ​អំពិល ខេត្ត​ឧត្តមានជ័យ ដែលថៃបានប្រើអាវុធធុនធ្ងន់ វាយប្រហារ បាញ់បោះវត្តអារាមបែកបាក់គ្មានសល់។ ក្នុងវីដេអូនោះ លោកបណ្ឌិតបានចោទជាសំណួរថា៖  “ថៃកាន់ព្រះពុទ្ធសាសនាដូចខ្មែរដែរ តែហេតុអ្វី បានជាអ្នកកម្ទេចវត្តអារាម ទៅវិញ?”។

លោកបាននិយាយថា ទិដ្ឋភាពបាញ់បោះ កម្ទេចវត្តអារាមទាំងអស់នេះហើយ ដែលខ្មែរត្រូវចងចាំនូវទង្វើឈ្លានពានដ៏គឃ្លើន ហើយខ្មែរត្រូវពង្រឹងសមត្ថភាពឱ្យខ្លាំង ដើម្បីទប់ទល់នឹងសត្រូវ។ លោកសង្កត់ធ្ងន់ថា៖ “ទាំងអស់នេះ គឺជាសោនាដកម្មហើយដែលយើងត្រូវចងចាំទាំងអស់គ្នា ហើយខ្មែរត្រូវតែពង្រឹងសមត្ថភាព បង្កើនដើម្បីទប់សត្រូវ។ បើយើងមិនបង្កើន គេមិនខ្លាចយើង គេនៅតែព្រហើនធ្វើបែបនេះបន្តទៀត”។

សូមជម្រាបថា ថៃបានចាប់ផ្តើមឈ្លានពានបូរណភាពទឹកដីកម្ពុជា ដោយប្រើអាវុធធុនធ្ងន់ បាញ់បោះមកកម្ពុជាចាប់ពីថ្ងៃទី២៤ ខែកក្កដា រហូតដល់ថ្ងៃទី២៨ ខែកក្កដា ក្រោមការសម្របសម្រួលឱ្យមានបទឈប់បាញ់ពីភាគីអន្តរជាតិ។ ថៃបានបាញ់មកកម្ពុជា ធ្វើឱ្យខូចខាតហេដ្ឋារចនាសម្ព័ន្ធ ផ្ទះប្រជាជនសាលារៀន និងវត្តអារាម ដែលនាំឱ្យប្រជាជនរាប់ពាន់គ្រួសារត្រូវជម្លៀសចេញពីផ្ទះសម្បែងទៅទីកន្លែងសុវត្ថិភាព។ ក្នុងស្ថានភាពបែបនេះ ក៏មានអ្នកវិភាគកម្ពុជាជាច្រើនរូប បានលើកទឹកចិត្តឱ្យប្រជាជនខ្មែរគ្រប់រូប បន្តការរួបរួមគ្នា សាមគ្គីភាព ជាធ្លុងមួយ ដើម្បីបង្ហាញឱ្យពិភពលោកបានដឹងពីការពិតនៃការឈ្លានពានដ៏ឃោឃៅរបស់ថៃ៕