ព័ត៌មានជាតិ

ឆ្នាំនេះ មានបេក្ខជនជាង ១៤ ម៉ឺននាក់ ដាក់ពាក្យប្រឡងបាក់ឌុបនៅទូទាំងប្រទេស កើនឡើងជិត ១ ម៉ឺននាក់

បានផុស

៩ ខែ មុន

នៅ

ថ្ងៃព្រហស្បតិ៍ ២១ សីហា ២០២៥

ដោយ

ការប្រឡងសញ្ញាបត្រមធ្យមសិក្សាទុតិយភូមិ ឬ បាក់ឌុប នៅឆ្នាំសិក្សា ២០២៤-២០២៥ នេះ នឹងប្រព្រឹត្តិទៅនៅថ្ងៃទី ២៨ និង ២៩ ខែសីហា ឆ្នាំ ២០២៥ ខាងមុខនេះ ដោយមានបេក្ខជនដាក់ពាក្យប្រឡងជាង ១៤ ម៉ឺននាក់ កើនឡើងជិត ១ ម៉ឺននាក់ បើធៀបទៅនឹងឆ្នាំមុនដែលមានបេក្ខជនត្រឹមជាង ១៣ ម៉ឺននាក់ ប៉ុណ្ណោះ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

បើតាម លោក ហួ ឈុនគ្រី អគ្គាធិការ នៃក្រសួងអប់រំ យុវជន និង កីឡា បានឱ្យដឹងថា ប្រឡងបាក់ឌុបនៅឆ្នាំនេះមានបេក្ខជនដាក់ពាក្យប្រឡងចំនួន ១៤៦ ៧២០ នាក់ ស្រី ៨១ ៤៤២ នាក់ ចែកជា ២៤១ មណ្ឌល ស្មើនឹង ៥ ៩២៤ បន្ទប់ប្រឡង នៅតាមបណ្ដារាជធានី-ខេត្តចំនួន ២៤។ ក្នុងចំណោមនោះ បេក្ខជនថ្នាក់វិទ្យាសាស្ត្រសង្គមចំនួន ១០៦ ០៤២ នាក់ ចែកជា ១៦៩ មណ្ឌល ស្មើនឹង ៤ ២៦៩ បន្ទប់ និងបេក្ខជនថ្នាក់វិទ្យាសាស្ត្រចំនួន ៤០ ៦៧៨ នាក់ ចែកជា ៧២ មណ្ឌល ស្មើនឹង ១ ៦៥៥ បន្ទប់។ ចំណែកឯគណៈកម្មការចូលរួមក្នុងដំណើរការប្រឡងនេះ មានចំនួន ១៩ ៨០០ នាក់។

លោកបានបន្តថា ចំពោះបេក្ខជននៅតំបន់ជាប់ព្រំដែន មានប្រមាណ ២៥ ០០០ នាក់ ដែលមាន ខេត្តព្រះវិហារ ឧត្ដរមានជ័យ បន្ទាយមានជ័យ បាត់ដំបង កោះកុង ព្រះសីហនុ និង ប៉ៃលិន។ ដោយឡែក បេក្ខជនខេត្តព្រះវិហារ និង ឧត្ដរមានជ័យ ដែលរងផលប៉ះពាល់ធ្ងន់ធ្ងរជាងគេ អំឡុងពេលបញ្ហាជម្លោះព្រំដែនកម្ពុជា-ថៃ មានចំនួន ៣ ៦៨៥ នាក់។ ចំពោះបេក្ខជនខេត្តឧត្ដរមានជ័យ នឹងត្រូវទៅប្រឡងនៅវិទ្យាល័យចំនួន ២ ក្នុងស្រុកពួក ខេត្តសៀមរាប ចែកជា ៣ មណ្ឌល។ រីឯ បេក្ខជនខេត្តព្រះវិហារទាំងអស់ នឹងត្រូវប្រឡងនៅទីរួមខេត្តព្រះវិហារ។

លោកបានបន្ថែមថា ក្រសួង បានបិទផ្សាយបញ្ជីឈ្មោះបេក្ខជន លេខតុ និង លេខបន្ទប់ សម្រាប់បេក្ខជនខេត្តព្រះវិហារ និង ឧត្ដរមានជ័យ លើកទី ១ នៅថ្ងៃទី ១៨ សីហា ខណៈរាជធានី-ខេត្ត ២៣ ផ្សេងទៀត បិទផ្សាយនៅថ្ងៃទី ២១ និង លើកទី ២ បិទផ្សាយនៅថ្ងៃទី ២៧ ខែសីហា ពោលគឺមុនប្រឡងមួយថ្ងៃ។

លោកបានបញ្ជាក់ថា ការប្រឡងបាក់ឌុបឆ្នាំ ២០២៥ នេះ ក្រសួងអប់រំ នៅតែប្រកាន់គោលការណ៍ដ៏ម៉ឺងម៉ាត់ដដែល ដើម្បីធានាគុណភាពសិស្សនោះគឺ គោលការណ៍«អ្នកចេះ គឺជាប់» ដោយមានការសហការពីអង្គភាពពាក់ព័ន្ធចំនួន ៦ ទៀត រួមមាន អង្គភាពប្រឆាំងអំពើពុករលួយ , ក្រសួងមហាផ្ទៃ និង បញ្ជាការកងរាជអាវុធហត្ថលើផ្ទៃប្រទេស , ក្រសួងសុខាភិបាល , សហភាពសហព័ន្ធយុវជនកម្ពុជា និងអគ្គិសនីកម្ពុជា ដើម្បីចូលរួមធានាសុវត្ថិភាព សុខភាព ចរន្តអគ្គិសនី ក៏ដូចជាធានាកន្លែងស្នាក់នៅ និង ទីតាំងចំណតផ្សេងៗ សម្រាប់បេក្ខជន។

គួរបញ្ជាក់ថា តួលេខបេក្ខជនដាក់ពាក្យប្រឡងបាក់ឌុបឆ្នាំនេះ បើធៀបទៅនឹងឆ្នាំមុន ឃើញថា មានការកើនឡើង ខណៈឆ្នាំមុនការប្រឡងបាក់ឌុបសម័យប្រឡងថ្ងៃទី ៨ និង ទី ៩ តុលា ២០២៤ មានបេក្ខជនចុះឈ្មោះប្រឡងសរុបចំនួន ១៣៧ ០៤០ នាក់ ស្រី ៧៤ ៨៨២ នាក់ ចែកជា ២៣០ មណ្ឌល ត្រូវជា ៥ ៥៣៣ បន្ទប់ ក្នុងនោះ មានបេក្ខជនមកប្រឡងចំនួន ១៣៤ ៦៣៤ នាក់ ស្រី ៧៣ ៩៦៧ នាក់ និងមានបេក្ខជនប្រឡងជាប់ទូទាំងប្រទេស សរុប ១០៦ ៣៥១ នាក់ ត្រូវជា ៧៩.០០ ភាគរយ នៃចំនួនបេក្ខជនមកប្រឡងចំនួន ១៣៤ ៦៣៤ នាក់។ ក្នុងនោះ មានបេក្ខជនជាប់និទ្ទេស A ចំនួន ២ ២១៦ នាក់ , និទ្ទេស B ចំនួន ៩ ៧០១ នាក់ , និទ្ទេស C ចំនួន ២២ ៦៧៥ នាក់ , និទ្ទេស D ចំនួន ៣៦ ៦៨៣ នាក់ និងនិទ្ទេស E ចំនួន ៣៥ ០៧៦ នាក់៕

អត្ថបទ ៖ សំអឿន