អាជីវករនៅផ្សារដើមគ បង្កើនការលក់ដូរទំនិញខ្មែរកាន់តែច្រើន ខណៈពលរដ្ឋកាន់តែងាក​មក​ជួយគាំទ្រ

អាជីវករនៅតាមទីផ្សារក្នុងរាជធានីភ្នំពេញ កំពុងបង្កើនការលក់ដូរទំនិញខ្មែរកាន់តែខ្លាំង ខណៈប្រជាពលរដ្ឋក្នុងប្រទេស កាន់តែងាកមកជួយគាំទ្រផលិតផល និងទំនិញរបស់ខ្មែរ។

លោកស្រី ទឹក លីនដា អាជីករលក់ដូរ ពងទា ពងមាន់ ពងគ្រួច ក្នុងផ្សារដើមគ បានឲ្យដឹងថា ក្នុងមួយរយៈពេលក្រោយមកនេះពលរដ្ឋក្នុងស្រុកបានគាំទ្រជួយទិញនូវអ្វីដែលជាទំនិញរបស់ខ្មែរ ដែលនេះបង្ហាញឲ្យឃើញពីការរួបរួមគ្នា ជួយគាំទ្រទំនិញ ឬផលិតផលដែលផលិតដោយកូនខ្មែរសុទ្ធសាធ ហើយវាក៏ជាផ្នែកនៃការជួយលើកស្ទួចដល់សេដ្ឋកិច្ចក្នុងស្រុកផងដែរ ដោយមិនចាំបាច់ពឹងផ្អែកលើផលិតផលរបស់ប្រទេសដទៃ។

លោកស្រី ទឹក លីនដា បញ្ជាក់បន្ថែមថា គ្រប់ផលិតផលរបស់ខ្មែរមានតម្លៃសមរម្យ ជាពិសេសនោះមិនមានផ្ទុកជាតិគីមីនោះទេ ព្រោះផលិតផលខ្មែរ ផលិតក្នុងស្រុក សម្រាប់ប្រើប្រាស់ក្នុងស្រុក មិនដូចផលិតផលប្រទេសដទៃ ដាក់គីមី ដើម្បីរក្សាទុកបានយូ និងសម្រាប់នាំចេញទៅក្រៅស្រុក។

សូមបញ្ជាក់ថា ក្នុងមួយរយៈកាលក្រោយមកនេះ ប្រជាពលរដ្ឋកម្ពុជាស្ទើរពាសពេញប្រទេស រួមទាំងថ្នាក់ដឹកនាំប្រទេស បានរួបរួមគ្នាជាធ្លុងមួយបង្ហាញពីស្មារតីជាតិនិយម តាមរយៈការចូលរួមជាមួយសកម្មភាពនានាជាច្រើនសំដៅធ្វើយ៉ាងណាដើម្បីរក្សាស្ថេរភាព សន្តិភាព និងជួយលើកស្ទួយដល់សេដ្ឋកិច្ចប្រទេសជាតិ៕

អត្ថបទ៖ សុភា