ក្រោយរដ្ឋសភាអនុម័ត វិសោធនកម្មច្បាប់សញ្ជាតិ បានបញ្ជូនមកព្រឹទ្ធសភាពិនិត្យបន្ត

ក្រោយការអនុម័តដោយរដ្ឋសភា សេចក្តីព្រាងច្បាប់ស្តីពីវិសោធនកម្មច្បាប់ស្តីពីសញ្ជាតិ ត្រូវបានបញ្ជូនមកកាន់ស្ថាប័នព្រឹទ្ធសភា ដើម្បីពិនិត្យបន្ត មុនដាក់ឱ្យសម័យប្រជុំពេញអង្គព្រឹទ្ធសភាពិភាក្សា និងឱ្យយោបល់ នាពេលខាងមុខ។

រដ្ឋសភា កាលពីព្រឹកថ្ងៃទី២៥ ខែសីហា ឆ្នាំ២០២៥ ក្នុងសម័យប្រជុំដែលមានវត្តមានសមាជិកចំនួន១២០រូបបានអនុម័តជាឯកច្ឆន្ទលើសេចក្តីព្រាងច្បាប់ស្ដីពីវិសោធនកម្មច្បាប់ស្តីពីសញ្ជាតិ។ បន្ទាប់ការអនុម័តរបស់រដ្ឋសភា សេចក្តីព្រាងច្បាប់នេះ បានបញ្ជូនមកព្រឹទ្ធសភាដោយនាព្រឹកថ្ងៃទី២៦ ខែសីហា ឆ្នាំ២០២៥ គណៈកម្មាធិការអចិន្ត្រៃយ៍ព្រឹទ្ធសភា បើកកិច្ចប្រជុំរបស់ខ្លួន ក្រោមវត្តមានលោក អ៊ុច បូររិទ្ធ ប្រធានស្តីទីព្រឹទ្ធសភា។

ក្រោយបានពិនិត្យរួចមក គណៈកម្មាធិការអចិន្ត្រៃយ៍ព្រឹទ្ធសភា បានសម្រេចបញ្ជូនសេចក្តីព្រាងច្បាប់នេះឱ្យគណៈកម្មការមហាផ្ទៃ ការពារជាតិ មុខងារសាធារណៈ និងកិច្ចការព្រំដែន និងគណៈកម្មការនីតិកម្ម និងយុត្តិធម៌ នៃព្រឹទ្ធសភា ដើម្បីពិនិត្យ សិក្សា និងនាំយោបល់របស់គណៈកម្មការមកជម្រាបជូនគណៈកម្មាធិការអចិន្រ្តៃយ៍ និងអង្គប្រជុំព្រឹទ្ធសភាវិញ។

សេចក្តីព្រាងច្បាប់ស្តីពីវិសោធនកម្មច្បាប់ស្តីពីសញ្ជាតិ គឺមានពីរមាត្រា ដែលមានគោលបំណង ដើម្បីបន្សុទ្ធនូវទឹកចិត្តស្នេហាជាតិរបស់ពលរដ្ឋខ្មែរចំពោះជាតិមាតុភូមិនិងប្រជាជនកម្ពុជាដោយភាពស្មោះត្រង់នៅគ្រប់កាលៈទេសៈទាំងអស់ ពិសេសពង្រឹងការអនុវត្តការទទួលបានសញ្ជាតិខ្មែរស្របតាមនីតិវិធីច្បាប់នេះ និងកំណត់ដកសញ្ជាតិខ្មែរចំពោះពលរដ្ឋដែលបានប្រព្រឹត្តសកម្មភាពក្បត់ជាតិខ្លួនឯង។

សេចក្តីព្រាងច្បាប់ស្តីពីវិសោធនកម្មច្បាប់ស្តីពីសញ្ជាតិ នឹងធ្វើឱ្យច្បាប់ស្តីពីសញ្ជាតិ ស្របតាមមាត្រា៣៣ថ្មី នៃរដ្ឋធម្មនុញ្ញកម្ពុជា ដែលជាក្របខ័ណ្ឌគតិយុត្តដ៏រឹងមាំក្នុងការទប់ស្កាត់ និងប្រឆាំងការជ្រៀតជ្រែកខាងក្រៅចូលក្នុងកិច្ចការផ្ទៃក្នុងរបស់កម្ពុជា ជាពិសេសការប្រឆាំងនឹងអំពើក្បត់ជាតិ និងអំពើឃុបឃិតជាមួយរដ្ឋបរទេស ឬភ្នាក់ងារបរទេស។ ការដកសញ្ជាតិខ្មែរ គឺជាការកាត់ផ្តាច់ចំណងគតិយុត្តនិងនយោបាយចំពោះជនដែលក្បត់ជាតិតែប៉ុណ្ណោះ៕

ដោយ៖ ធឿន វ៉ាន់សុង