ព័ត៌មានជាតិ

អាជ្ញាធរខណ្ឌ ៧ មករា ចុះត្រួតពិនិត្យការដ្ឋានផ្លាស់ប្ដូរការ៉ូឡាថ្មី ប្រវែងជាង ៣០០ ម៉ែត្រ នៅកំណាត់មហាវិថីព្រះមុនីវង្ស

បានផុស

៩ ខែ មុន

នៅ

ថ្ងៃពុធ ២៧ សីហា ២០២៥

ដោយ

អាជ្ញាធរខណ្ឌ ៧ មករា ចុះត្រួតពិនិត្យមើលការដ្ឋានគម្រោងផ្លាស់ប្ដូរការ៉ូឡាថ្មី នៅកំណាត់មហាវិថីព្រះមុនីវង្ស ដើម្បីធ្វើឲ្យត្រូវលក្ខណៈបច្ចេកទេសបានល្អប្រសើរ និងលើកសោភ័ណភាពតាមដងផ្លូវ ជាពិសេសសម្រាប់ប្រជាពលរដ្ឋងាយស្រួលធ្វើដំណើរដោយថ្មើរជើងផងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាក់ស្ដែងការចុះត្រួតពិនិត្យនេះធ្វើឡើងកាលពីរសៀលថ្ងៃទី ២៦ ខែសីហា ឆ្នាំ ២០២៥ ក្រោមវត្តមាន លោក ឯក ឃុនដឿន អភិបាលរងរាជធានីភ្នំពេញ , លោក ថេង សុថុល អភិបាលខណ្ឌ ៧ មករា រួមទាំងមន្ត្រីជំនាញពាក់ព័ន្ធ ចុះពិនិត្យមើលការដ្ឋាន ស្ថិតនៅកំណាត់មហាវិថីព្រះមុនីវង្ស មូលដ្ឋានសង្កាត់មនោរម្យ ខណ្ឌ ៧ មករា រាជធានីភ្នំពេញ។

លោក ថេង សុថុល បានឲ្យដឹងថា ការចុះត្រួតពិនិត្យមើលការដ្ឋាននេះ ដើម្បីមើលថា តើក្រុមហ៊ុនដេញថ្លៃវិនិយោគនៅក្នុងខណ្ឌ ការដ្ឋានអនុវត្តតាមលក្ខណៈបច្ចេកទេសដែរឬទេ? និងណែនាំម្ចាស់ក្រុមហ៊ុន ឲ្យមានលក្ខណៈបច្ចេកទេសត្រឹមត្រូវ ធ្វើយ៉ាងណាមិនឲ្យប៉ះពាល់ដល់ផលប្រយោជន៍ពលរដ្ឋ ត្រូវកាត់បន្ថយឲ្យបានច្រើនបំផុត។

លោកបានបន្តថា ការផ្លាស់ប្ដូរការ៉ូឡាថ្មីនេះ ជាគម្រោងរបស់រដ្ឋបាលខណ្ឌ ដោយសង្កេតឃើញថាការ៉ូឡានៅចិញ្ចើមផ្លូវព្រះមុនីវង្សនេះ មានសភាពចាស់ទ្រុឌទ្រោម ខូចខាត ដូច្នេះដើម្បីលើកកម្ពស់សោភ័ណភាពផ្លូវសម្រាប់ពលរដ្ឋអ្នកដំណើរងាយស្រួលក្នុងការធ្វើដំណើរដោយថ្មើរជើង ជៀសវាង បង្កគ្រោះថ្នាក់ណាមួយជាយថាហេតុ រដ្ឋបាលខណ្ឌ បានផ្លាស់ប្ដូរការ៉ូឡាថ្មី ដោយលើកឲ្យខ្ពស់ជាងមុន និងធានាគុណភាពល្អជាងមុនផងដែរ។ ជាពិសេសនោះបានការ៉ូឡាឆ្នូតពណ៌លឿន សម្រាប់កំណត់ព្រំរួចស្រេចផងដែរ។

ជាមួយនេះ លោកអភិបាលខណ្ឌ ៧ មករា ក៏បានណែនាំដល់មន្ត្រីជំនាញពាក់ព័ន្ធនៅក្នុងខណ្ឌ ត្រូវចុះត្រួតពិនិត្យតាមការដ្ឋានទាំងអស់ក្នុងមូលដ្ឋានខណ្ឌឲ្យបានញឹកញាប់ ដើម្បីពិនិត្យមើលឲ្យមានលក្ខណៈបច្ចេកទេសត្រឹមត្រូវក្នុងការដ្ឋាន៕

អត្ថបទ ៖ ម៉េង

Related Topics:ខណ្ឌ ៧ មករា