ព័ត៌មានជាតិ

មន្ត្រីកសិកម្មខេត្តបាត់ដំបង ជួយបច្ចេកទេសកសិករដាំដុះស្ពៃជើងទាទទួលទិន្នផលខ្ពស់ ប្រើថ្នាំគីមីតិចបំផុត មិនប៉ះពាល់សុខភាព

បានផុស

៩ ខែ មុន

នៅ

ថ្ងៃអាទិត្យ ២១ កញ្ញា ២០២៥

ដោយ

មន្ត្រីកសិកម្មខេត្តបាត់ដំបងបានផ្តល់ការគាំទ្របច្ចេកទេសដល់កសិករដាំដុះស្ពៃទា ដើម្បីទទួលបានទិន្នផលតាមការរំពឹងទុក មិនប្រឈមការខូចខាតសម្រាប់ផ្គត់ផ្គង់លើទីផ្សារនៅក្នុងស្រុកមិនរំពឹងលើការនាំចូល។

លោក ឃុន ថុន ម្ចាស់ចំការស្ពៃជើងទាដ៏ធំមួយស្ថិតនៅភូមិវាលវង់ ឃុំតាស្តា ស្រុកសំពៅលូន ខេត្តបាត់ដំបង ដែលទទួលបានការគាំទ្របច្ចេកទេសពីមន្រ្តីកសិកម្មខេត្តបាត់ដំបងបានឲ្យដឹងថា រយះពេលប្រមូលផលស្ពៃជើងទារបស់លោកនៅក្នុងខែនេះ ទិន្នផលទទួលជិត ៨០ តោន ដោយលោកបានធ្វើការដាំដុះលើទំហំដីសរុបចំនួន ២ ហិកតា។

លោក ឃុន ថុន បន្តថា ការប្រមូលទិន្នផលស្ពៃជើងទាទាំង ២ ហិកតារបស់លោក បើគិតមកត្រឹមពេលនេះមានអាយុកាល ៥៥ ថ្ងៃហើយ ទាំងបរិមាណនិងគុណភាព លោកអាចទទួលយកបានតាមការរំពឹងទុក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ជាមួយគ្នានេះ បើតាមកសិកររូបនេះ ដំណាំស្ពៃជើងទាដែលលោកដាំដុះប្រើប្រាស់សារធាតុគីមីតិចបំផុត ដោយមានការណែនាំពីមន្ត្រីកសិកម្ម ដែលមិនបង្កឲ្យប៉ះពាល់ដល់សុខភាពដល់អ្នកទទួលទាននោះទេ។

អ្នកស្រី ចាន់ធឿន កសិករមួយរូបទៀតបានឲ្យដឹងថា ស្ពៃជើងទានេះបានជួយដល់សេដ្ឋកិច្ចគ្រួសារអ្នកស្រីយ៉ាងប្រសើរ។

អ្នកស្រីថា ឲ្យតែដល់រដូវប្រមូល អ្នកស្រីបានយកស្ពៃជើងទាមកច្នៃធ្វើជាជ្រក់ដាក់លក់លើទីផ្សារក្នុងស្រុក និងមានលក់ជាស្ពៃស្រស់ផង សម្រាប់អ្នកដែលចង់ទិញយកទៅច្នៃលើម្ហូបអាហារផ្សេងៗទៀតតាមចំណូលចិត្ត។

សម្រាប់លោក ឃុន ថុន កសិករដាំដុះស្ពៃជើងទានៅស្រុកសំពៅលូនអរគុណចំំពោះមន្ត្រីកសិកម្ម ដែលតែងតែគាំទ្រនិងលើកទឹកចិត្តដល់លោកក្នុងការប្រកបរបរដាំដុះបន្លៃមួយប្រភេទនេះ ឲ្យកាន់តែមានបច្ចេកទេស ប្រកបដោយស្តង់ដា អនាម័យ ដើម្បីកុំឲ្យប៉ះពាល់ដល់សុខភាពអ្នកបរិភោគ ខណៈដែលទីផ្សារក៏មានតម្រូវការខ្ពស់។

លោក ហេង សិទ្ធ មន្ត្រីកសិកម្មខេត្តបាត់ដំបងបានឲ្យដឹងថា ពាក់ព័ន្ធការដាំដុះដំណាំស្ពៃតឿនេះ មន្ត្រីកសិកម្មស្រុកតែងតែចុះពិនិត្យ និងជួយជំរុញដល់បច្ចេកទេសថែទាំ ដើម្បីឲ្យទិន្នផលកាន់តែមានបរិមាណ និងគុណភាពល្អ តាមស្តង់ដាអនាម័យ មិនខុសពីការដាំក្នុងសហគមន៍ ដែលដាំក្នុងរោងសំណាញ់ប៉ុន្មាននោះទេ។

លោកបន្តថា ស្ពៃប្រភេទនេះក៏មិនសូវមានកសិករដាំច្រើនដែរ ចំណែកទីផ្សារក៏មិនសូវប្រឈមដែរ។ ស្ពៃប្រភេទនេះ បើតាមមន្រ្តីកសិកម្មអាចយកទៅច្នៃធ្វើជាជ្រក់ ក្រៅពីលក់ដើមស្រស់លើទីផ្សារ ខណះប្រជាជនខ្មែរក៏ចូលចិត្តបរិភោគជ្រក់ស្ពៃជើងទា គឺមានចំនួនច្រើនដែរ៕

អត្ថបទ÷សៅ សារិទ្ធ