មន្ត្រីជាន់ខ្ពស់៖ ការស្លាប់មាតានិងទារកមិនមែនត្រឹមតែជាទិន្នន័យទេ តែជាបញ្ហានៃការបាត់បង់មួយក្នុងគ្រួសារនិងសហគមន៍

លោកស្រីសាស្ត្រាចារ្យ អ៊ឹម សិទ្ធិការ្យ រដ្ឋលេខាធិការក្រសួងសុខាភិបាល លើកឡើងថា ការស្លាប់របស់មាតា និងទារកមិនមែនត្រឹមតែជាទិន្នន័យប៉ុណ្ណោះទេតែជារឿងរ៉ាវនៃការបាត់បង់មួយនៅក្នុងគ្រួសារនិងសហគមន៍។ ការលើកឡើងនេះ នៅថ្ងៃទី៦ ខែតុលា ឆ្នាំ២០២៥ ក្នុងពិធីបើកវគ្គបណ្តុះបណ្ដាលគ្រូបង្គោលថ្នាក់ខេត្ត ស្តីអំពីការពិនិត្យមរណភាពមាតា និងទារកជុំវិញកំណើត និងការឆ្លើយតប។  

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកស្រី អ៊ឹម សិទ្ធិការ្យ មានប្រសាសន៍ថា គិតត្រឹមខែកញ្ញា ឆ្នាំ២០២៥ មានករណីមរណភាពមាតាចំនួន ៣៦ករណី ដោយមានការថយចុះបើធៀបទៅនឹងក្នុងឆ្នាំ២០២៤ ដែលមានរហូតដល់ទៅ៧៩ករណីឯណោះ។ លោកស្រីបន្តថា លទ្ធផលនេះបានបង្ហាញពីការចូលរួមយ៉ាងសកម្មរបស់លោកលោកស្រីដែលជាថ្នាក់ដឹកនាំសុខាភិបាលរាជធានីខេត្ត។ ការចូលរួមពីមន្ត្រីសុខាបាលគ្រប់ផ្នែករួមមានផ្នែកសម្ភព ផ្នែកវះកាត់ ផ្នែកសង្គ្រោះបន្ទាន់ ផ្នែកថ្នាំសន្តំ ក្រុមការងារកែលម្អគុណភាពរបស់មន្ទីរពេទ្យ និងផ្នែកសុខភាពមាតា និងទារកមន្ទីរសុខាភិបាលដើម្បីរកឱ្យឃើញនូវមូលហេតុ និងធ្វើផែនការកែលម្អដើម្បីទប់ស្កាត់ករណីមរណភាពមាតានិងទារកនាពេលខាងមុខ។

លោកស្រីសាស្ត្រាចារ្យបានបន្តថា ទោះបីជាមានវឌ្ឍភាពក៏ដោយក៏យើងមានការងារជាច្រើនទៀតដែលត្រូវពង្រឹងកិច្ចខិតខំប្រឹងប្រែងបន្តទៀតលើការពិនិត្យនិងរកមូលហេតុដែលនាំឱ្យមានករណីមរណភាពកើតឡើងពិសេសការធ្វើផែនការឆ្លើយតបនិងការអនុវត្តផ្លាស់ប្តូរការតាមដានទៀងទាត់ដែលការងារនេះទាមទារការធ្វើជាប់ជាប្រចាំគ្រប់ករណី។

លោកស្រីសាស្ត្រាចារ្យបានបន្ថែមថា«ការស្លាប់របស់មាតានិងទារកមិនត្រឹមតែជាទិន្នន័យទេតែជារឿងរ៉ាវនៃការបាត់បង់មួយនៅក្នុងគ្រួសារមិនថាបាត់បង់ទារក ឬមាតាឬទារកនិងមាតានោះទេព្រោះថាជារឿយៗការងារនេះយើងអាចការពារបាន»។

លោកស្រីសាស្ត្រាចារ្យបានណែនាំឱ្យយកករណីនៃការស្លាប់របស់មាតានិងទារកនេះសម្រាប់ការរៀនសូត្រនិងធ្វើសកម្មភាពឆ្លើយតបដើម្បីទប់ស្កាត់កុំឱ្យកើតឡើងជាថ្មីម្តងទៀត។ អីចឹងដំណើរពិនិត្យមរណភាពមាតា និងទារកជុំវិញកំណើត និងការឆ្លើយតប អាចជាក្បួនឬអាចផែនទីបង្ហាញផ្លូវមួយ ដើម្បីអាចឱ្យបង្វែទិន្នន័យក្លាយជាសកម្មភាពឆ្លើយតបនៅទីកន្លែងរបស់ខ្លួននីមួយ»។

លោកស្រីសាស្ត្រាចារ្យបានស្នើឱ្យអ្នកចូលរួមពេលសិក្សាចប់ត្រូវយកចំណេះដែលបានពីវគ្គបបណ្តុះបណ្តាលនេះទៅបណ្តុះបណ្តាលបន្តដល់មន្ត្រីនៅតាមអង្គភាពរបស់ខ្លួនដើម្បីពង្រឹងមូលដ្ឋានសុខាភិបាល ក្នុងការអនុវត្តទប់ស្កាត់ការស្លាប់របស់មាតានិងទារកកាន់តែប្រសើរនិងមានប្រសិទ្ធភាព ព្រោះមរណភាពមាតា និងទារកនេះគឺជាការងារទាំងអស់គ្នាដើម្បីឱ្យមាតានិងទារកមានសុខភាពល្អ៕

អត្ថបទ៖សំអឿន