បញ្ហាព្រំដែន៖ កម្ពុជា អំពាវនាវឱ្យថៃគោរពដោយសុទ្ធចិត្តចំពោះMoU 2000 និងត្រូវបញ្ឈប់រាល់សកម្មភាពជាឯកតោភាគី

ក្រសួងការបរទេសកម្ពុជា នៅរសៀលថ្ងៃចន្ទនេះ បានអំពាវនាវដល់ប្រទេសថៃឱ្យគោរពដោយសុទ្ធចិត្តចំពោះអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោក(MoU 2000)រវាងប្រទេសកម្ពុជា និងថៃ។ ជាមួយគ្នានេះ ក្រសួងការបរទេសកម្ពុជា ក៏បានប្រាប់ទៅភាគីថៃ ត្រូវបញ្ឈប់រាល់សកម្មភាពជាឯកតោភាគីទាំងអស់លើបញ្ហាជម្លោះព្រំដែនរវាងប្រទេសទាំងពីរ និងចូលរួមដោះស្រាយបញ្ហាជាមួយកម្ពុជានៅតុលាការយុត្តិធម៌អន្តរជាតិ(ICJ)។

ការអំពាវនាវ ក៏ដូចជា ប្រតិកម្មរបស់ក្រសួងការបរទេសកម្ពុជានាពេលនេះ ជាការឆ្លើយតបទៅនឹងក្រសួងការបរទេសថៃដែលបានចេញនូវសេចក្តីថ្លែងការណ៍ខុសពីការពិតទាក់ទងនឹងជម្លោះព្រំដែនកម្ពុជា-ថៃ និងអនុស្សរណៈនៃការយោគយល់គ្នាស្តីពីការវាស់វែង និងខណ្ឌសីមាព្រំដែនគោក (MoU 2000) ដែល ប្រទេសទាំងពីរបានចុះហត្ថលេខាកាលពីថ្ងៃទី១៤ ខែមិថុនា ឆ្នាំ២០០០។ នៅក្នុងសេចក្តីថ្លែងការណ៍នៅរសៀលថ្ងៃទី០៧ ខែកក្កដា ឆ្នាំ២០២៥នេះ ក្រសួងការបរទេសកម្ពុជា បានបកស្រាយថា កម្ពុជាសូមបញ្ជាក់ជាថ្មីនូវការប្តេជ្ញាចិត្តឥតងាករេររបស់ខ្លួន ក្នុងការដោះស្រាយជម្លោះព្រំដែន ដោយសន្តិវិធី ស្របតាមច្បាប់អន្តរជាតិ រួមទាំងធម្មនុញ្ញអង្គការសហប្រជាជាតិ ធម្មនុញ្ញអាស៊ាន និងអនុស្សរណៈនៃការ យោគយល់គ្នាឆ្នាំ ២០០០។ ការប្រតិបត្តិរបស់កម្ពុជាពាក់ពន្ធ័នឹងបញ្ហាព្រំដែននេះ គឺផ្អែកលើភាពស្មោះត្រង់ ប្រកាន់ខ្ជាប់នូវកាតព្វកិច្ចក្នុងការអនុវត្តសន្ធិសញ្ញា និងគោលការណ៍សមភាពអធិបតេយ្យ និងការដោះស្រាយ វិវាទដោយសន្តិវិធី ដូចមានចែងក្នុងធម្មនុញ្ញអង្គការសហប្រជាជាតិ។

ក្រសួងការបរទេសកម្ពុជា បានគូសបញ្ជាក់ថា វាជាការចាំបាច់ដែលត្រូវគូសបញ្ជាក់ថា ប្រទេសថៃបានខកខានម្តងហើយម្តងទៀតក្នុងការបំពេញកាតព្វកិច្ច ស្នូលរបស់ខ្លួនក្រោម MoU 2000 ជាពិសេសលើមាត្រា១ ដែលបញ្ជាក់យ៉ាងច្បាស់ថា ផែនទីផលិតដោយគណៈកម្មការបារាំង-សៀមសម្រាប់ខណ្ឌសីមាព្រំដែនរវាងឥណ្ឌូចិន និងសៀម គឺជាមូលដ្ឋានសម្រាប់ការកំណត់ព្រំដែននៃប្រទេសកម្ពុជា និងថៃ។ តែផ្ទុយពីការប្តេជ្ញាចិត្តចំពោះចំណងកាតព្វកិច្ចនេះ ថៃបានបន្តទទូចប្រើប្រាស់ និងបានប្រើប្រាស់ផែនទីគូសដោយឯកតោភាគី ដើម្បីទាមទារទឹកដី និងទន្ទ្រានចូលទឹកដីកម្ពុជា។ សម្រាប់ក្រសួងការបរទេសកម្ពុជា ទង្វើទាំងនេះ គឺជាការបំពានលើច្បាប់អន្តរជាតិ និង MoU 2000 ដែលនៅតែជាចំណងកាតព្វកិច្ចតាមច្បាប់របស់រដ្ឋទាំងពីរ។

ជាមួយគ្នានេះ ក្រសួងការបរទេសកម្ពុជា ក៏អះអាងឱ្យដឹងថា ការសម្រេចរបស់កម្ពុជាក្នុងការបញ្ជូនវិវាទទៅតុលាការយុត្តិធម៌អន្តរជាតិ គឺជាការថ្លឹងថ្លែងផ្អែកលើមូលដ្ឋាន ច្បាប់ និងជាការឆ្លើយតបដោយសន្តិវិធីចំពោះការបន្តរំលោភលើ MoU 2000 ដោយភាគីថៃ ការប្រើប្រាស់កម្លាំងប្រដាប់អាវុធ អំពើញុះញង់ និងការបង្ហាញពីកង្វះឆន្ទៈក្នុងការគោរពក្របខណ្ឌដែល ផ្លូវច្បាប់អន្តរជាតិ រួមទាំងបញ្ហាព្រំដែន ជាពិសេស លើករណីដែលយន្តការទ្វេភាគីបានជា តែការរំលោភជាបន្តបន្ទាប់លើ MoU 2000 ដោយភាគីម្ខាង។ ហេតុដូច្នេះហើយ ក្រសួងការបរទេសកម្ពុជា អំពាវនាវឱ្យប្រទេសថៃគោរពដោយសុទ្ធចិត្តចំពោះកាតព្វកិច្ចរបស់ខ្លួនតាមសន្ធិសញ្ញា រួមទាំងក្នុង MoU 2000 ដោយបញ្ឈប់រាល់សកម្មភាពឯកតោភាគីដែលបានប្រព្រឹត្តជាក់ស្តែង និងចូលរួម ដោយស្ថាបនាក្នុងការដោះស្រាយវិវាទតាមសន្តិវិធី រួមទាំង តាមរយៈតុលាការយុត្តិធម៌អន្តរជាតិដែលមាន ការទទួលស្គាល់ថាជាយន្តការច្បាប់អន្តរជាតិ៕