​អ្នកប្រកបរបរដាំផ្កាប្រាប់ថា ​ផ្កាម្លិះមានក្លិនក្រអូបជាផ្កាមិនដាក់ជីគីមី

កសិករដាំផ្កាម្លិះ លោកតា ងួន ជិន ក្នុងវ័យ៧០ឆ្នាំរស់នៅភូមិព្រែកថ្មី​សង្កាត់ព្រែកថ្មី​ខណ្ឌច្បារអំពៅ រាជធានីភ្នំពេញបានឲ្យដឹងថា​ផ្កាម្លិះដែលមានក្លិន​ក្រអូបគឺម្ចាស់ចម្ការ​មិនដាក់ជីគីមីប៉ុន្តែផ្កាមិនសូវ​ស្រស់បំព្រងដូចផ្កាដែលដាក់ជីគីមីនោះទេ។

លោកតាបន្តថា តាំងពីដើមមកអ្នកចម្ការមិនសូវប្រើជីគីមីដាក់ទៅលើដើមផ្កាម្លិះនោះទេគឺបើដាក់ជីលាមកសត្វគឺធ្លាប់មាន។លុះដល់ទីផ្សារបច្ចុប្បន្នគេនិយមចង់បានផ្កាមានសម្រស់ហើយរីកស្គុះស្គាយសម្រាប់ដាក់តាំងក្នុងពិធីធំៗដែលតម្រូវឲ្យអ្នកចំការដាក់ជីគីមីម្យ៉ាងទៀតគេទិញច្រើនៗទៀតផង។

ដោយឡែកស្ត្រី សុខ រដ្ឋា ជាអ្នកអ្នកចុះទិញផ្កាម្លិះដល់ចំការវិញបាននិយាយថា សព្វថ្ងៃនេះ​គេនិយម​ប្រើផ្កាម្លិះមានសម្រស់ល្អៗដោយពុំចាំបាច់មានក្លិនក្រអូបព្រោះគេនិយមយកទៅក្រងជាភួងសម្រាប់តាំងលម្អ។

​បើយកផ្កាមិនសូវមានសម្រស់គឺមិនស្អាតឡើយ ចំណែកតម្លៃវិញគឺផ្កាដាក់ជីមួយ​គីឡូថ្ងៃ១០​ម៉ឺនរៀល។ ឯផ្កាមិនដាក់ជីថ្លៃ១៣ម៉ឺនរៀល​ហើយពេលខ្លះរកផ្កាមិនបានផង៕

អត្ថបទ៖ នរា