អភិបាលខេត្តកណ្ដាលណែនាំឲ្យអាជ្ញាធរក្រុង ស្រុក ត្រៀមលក្ខណៈជួយសង្គ្រោះពលរដ្ឋពីទឹកជំនន់

លោក គួច ចំរើន អភិបាលនៃគណៈអភិបាលខេត្តកណ្ដាល បានណែនាំឲ្យអាជ្ញាធរក្រុង-ស្រុកត្រូវត្រៀមលក្ខណៈក្នុងជួយសង្គ្រោះប្រជាពលរដ្ឋពីគ្រោះទឹកជំនន់ ជាពិសេសពលរដ្ឋដែលនៅជាប់មាត់ទឹក។ ការណែនាំនេះ ក៏ដោយសារលោកមើលឃើញថា ទឹកជំនន់ឆ្នាំនេះមានការកើនឡើងខ្ពស់។

លោក គួច ចំរើន​ ណែនាំឲ្យអាជ្ញាធរត្រូវត្រៀមលក្ខណៈក្នុងការជួយសង្គ្រោះប្រជាពលរដ្ឋឱ្យបានទាន់ពេលវេលា ក្នុងករណីមានឧបទ្ទវហេតុណាមួយកើតឡើង ជាពិសេសត្រូវណែនាំដល់ប្រជាពលរដ្ឋដែលនៅជាប់មាត់ទឹក សូមមានការប្រុងប្រយ័ត្នខ្ពស់ចំពោះក្មេងតូចៗ និងចាស់ជរា មិនត្រូវឱ្យពួកគាត់នៅក្បែរទឹក ឬទៅលេងទឹកឡើយ ដែលអាចបណ្ដាលឱ្យពួកគាត់លង់ទឹក ឬមានឧបទ្ទវហេតុណាមួយកើតឡើងដែលនឹកស្មានមិនដល់ និងត្រូវប្រយ័ត្នសត្វអសិរពិស និងត្រូវត្រៀមទីទួលសុវត្ថិភាពជូនប្រជាពលរដ្ឋ សម្រាប់ជូនពួកគាត់នៅពេលដែលមានការជនលិចណាមួយនៅក្នុងមូលដ្ឋានរបស់ខ្លួន។ ក្រៅពីនេះ អាជ្ញាធរក្រុង-ស្រុកត្រូវផ្សព្វផ្សាយដល់ប្រជាពលរដ្ឋ ឱ្យពួកគាត់រក្សានូវអនាម័យ ហូបស្អាត ផឹកស្អាត ដើម្បីបង្ការនូវជំងឺឆ្លងនានាក្នុងកំឡុងពេលនៃគ្រោះទឹកជំនន់នេះ។

ការលើកឡើងរបស់អភិបាលខេត្តកណ្ដាលនាពេលនេះ ធ្វើឡើងនៅពេលលោកដឹកនាំអាជ្ញាធរស្រុកលើកដែក អាជ្ញាធរក្រុងសំពៅពូន និងមន្ទីរជំនាញពាក់ព័ន្ធ ចុះពិនិត្យស្ថានភាពទឹកជំនន់ក្នុងភូមិសាស្ត្រក្រុងសំពៅពូន និងស្រុកលើកដែក ដែលកំពុងប្រឈមដោយទឹកជំនន់ហូរកាត់ផ្លូវ ៦០ម៉ែត្រ តភ្ជាប់ពីក្រុងសំពៅពូនទៅស្រុកលើកដែក។

ដើម្បីទប់ស្កាត់ការខូចខាតផ្លូវកាន់តែធ្ងន់ធ្ងរដោយទឹកជំនន់ លោក គួច ចំរើន ក៏បានណែនាំឲ្យក្រុមការងារប្រើប្រាស់គ្រឿងចក្រដើម្បីកាយដីលើកជាទំនប់ទប់កុំឱ្យទឹកហូរកាត់ផ្លូវ ដែលនាំឱ្យដាច់ផ្លូវ ខូចខាតមិនអាចធ្វើដំណើរបាន៕

អត្ថបទ៖ ម៉េង