សន្តិសុខសង្គម

ឆេះផ្ទះ ១ ខ្នង យ៉ាងសន្ធោសន្ធៅ នៅខណ្ឌសែនសុខ បង្កការភ្ញាក់ផ្អើលដល់សមត្ថកិច្ចជួយអន្តរាគមន៍

បានផុស

៧ ខែ មុន

នៅ

ថ្ងៃអង្គារ ២៥ វិច្ឆិកា ២០២៥

ដោយ

អ៊ិន ពិសី

អគ្គិភ័យឆាបឆេះផ្ទះ ១ ខ្នង យ៉ាងសន្ធោសន្ធៅ ត្រូវបានសមត្ថកិច្ចជំនាញជួយអន្តរាគមន៍រហ័ស ទើបមិនមានការរាលដាលទៅផ្ទះជិតខាង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ហេតុការណ៍នេះបានកើតឡើងកាលពីវេលាម៉ោង ៩ និង ៣០ នាទីយប់ ថ្ងៃទី ២៤ ខែវិច្ឆិកា ឆ្នាំ ២០២៥ ស្ថិតនៅផ្លូវលេខ ២៧១ ភូមិត្រពាំងឈូក សង្កាត់អូរបែកក្អម ខណ្ឌសែនសុខ រាជធានីភ្នំពេញ។

តាមប្រភពព័ត៌មានពីកន្លែងកើតហេតុ បានឲ្យដឹងថា មុនពេលកើតហេតុ គេឃើញមានផ្សែង និងភ្លើង ហុយចេញពីជាន់ទី ១ នៅចំណុចផ្ទះកើតហេតុ ដោយឃើញមិនស្រួល អ្នកភូមិបានស្រែកប្រាប់ម្ចាស់ផ្ទះ និងនាំគ្នាយកបំពង់ឧស្ម័នបាញ់ពន្លត់អគ្គិភ័យជាបឋម ប៉ុន្តែអណ្ដាតភ្លើងក៏ចាប់ផ្ដើមឆាបឆេះយ៉ាងរហ័ស មិនអាចគ្រប់គ្រងស្ថានការណ៍បាន ពួកគាត់ក៏រាយការណ៍ទៅកាន់សមត្ថកិច្ចមូលដ្ឋាន ដើម្បីសុំរថយន្តពន្លត់អគ្គិភ័យជួយអន្តរាគមន៍ជាបន្ទាន់ផងដែរ។

ក្រោយទទួលដំណឹងនេះ ការិយាល័យនគរបាលបង្ការពន្លត់អគ្គិភ័យ និងសង្គ្រោះ នៃស្នងការដ្ឋាននគរបាលរាជធានីភ្នំពេញ បានបញ្ជូនរថយន្តពន្លត់អគ្គិភ័យស្ថិតនៅជិតគោលដៅឆេះបំផុត ទៅកាន់ទីតាំងកើតហេតុ ដើម្បីធ្វើការអន្តរាគមន៍បាញ់ពន្លត់។ ជាក់ស្ដែងគេឃើញរថយន្តពន្លត់អគ្គិភ័យរបស់មូលដ្ឋានខណ្ឌសែនសុខ និងខណ្ឌទួលគោក បានធ្វើដំណើរមកយ៉ាងឆាប់រហ័ស និងអន្តរាគមន៍យ៉ាងលឿនបំផុត ដែលធ្វើឲ្យករណីខាងលើមិនមានការរាលដាលទៅកាន់ផ្ទះនៅជាប់នោះទេ។

ករណីអគ្គិភ័យខាងលើ មន្ត្រីជំនាញគ្របគ្រងបានទាំងស្រុងនៅម៉ោង ១០ យប់ ថ្ងៃខែឆ្នាំដដែល។ ចំណែកទ្រព្យសម្បត្តិមួយចំនួននៅក្នុងផ្ទះ ត្រូវបានភ្លើងឆេះ តែមិនបង្កឲ្យមានមនុស្សរងរបួសនោះទេ។ ចំពោះមូលហេតុដែលបង្កឲ្យឆេះ ទាំងម្ចាស់ផ្ទះ និងមន្ត្រីជំនាញ នៅមិនទាន់អាចបញ្ជាក់បាននៅឡើយនោះទេ៕

អត្ថបទ ៖ សំណាង