ស្នងការក្រុង ត្រៀមកម្លាំងសន្តិសុខ ជាង ១ ពាន់នាក់ ក្នុងឱកាសបុណ្យចូលឆ្នាំសាកល

ស្នងការដ្ឋាននគរបាលរាជធានីភ្នំពេញនឹងដាក់ពង្រាយកម្លាំងសមត្ថកិច្ចប្រមាណជាង ១ ពាន់នាក់ ដើម្បីការពារសន្តិសុខ សណ្តាប់ធ្នាប់ និងសម្រួលចរាចរណ៍ជូនប្រជាពលរដ្ឋ នៅក្នុងឱកាសបុណ្យចូលឆ្នាំសកលខាងមុខនេះ។

បើតាមលោកវរសេនីយឯក សាន សុខសីហា អ្នកនាំពាក្យស្នងការដ្ឋាននគរបាលរាជធានីភ្នំពេញបានមានប្រសាសន៍នៅព្រឹកថ្ងៃទី ២១ ខែធ្នូនេះថា កងកម្លាំងសមត្ថកិច្ចជាង ១ ពាន់នាក់នេះនឹងដាក់ពង្រាយនៅតាមគោលដៅសំខាន់ៗនានា ពិសេសកន្លែងកម្សាន្តសប្បាយធំៗដែលប្រជាពលរដ្ឋទៅកម្សាន្តច្រើនដូចជានៅមាត់ទន្លេ មុខព្រះបរមរាជវាំង រមណីយដ្ឋានវត្តភ្នំ និងកោះពេជ្រ ដើម្បីជួយសម្រួលចរាចរណ៍ ការពារសន្និសុខសណ្តាប់ធ្នាប់ និងសុវត្តិភាពដល់ប្រជាពលរដ្ឋឱ្យមានភាពកក់ក្តៅ និងប្រកបដោយសប្បាយរីករាយនៅក្នុងពិធីបុណ្យណូអែល និងបុណ្យចូលឆ្នាំសាកលខាងមុខនេះ។

លោក ឃួង ស្រេង អភិបាល​នៃ​គណៈ​អភិបាល​រាជធានី​ភ្នំពេញ​ បាន​ជំរុញ​​កងកម្លាំង​ប៉ូលិស​ដូចជា​ កងកម្លាំង​កងរាជអាវុធហត្ថ​ និង​អាជ្ញាធរ​ខណ្ឌ​ទាំង​១៤ ត្រូវ​ពង្រឹង សន្តិសុខ​សុវត្ថិភាព និង​សណ្ដាប់ធ្នាប់​ជូន​បងប្អូន​ប្រជាពលរដ្ឋ ក្រោយពី​រាជរដ្ឋាភិបាល​បាន​ប្រកាស​ដាក់​ប្រទេស​ទាំងមូល​ជា​ប្រក្រតី​ឡើងវិញ ពិសេស​កងកម្លាំង​ និង​អាជ្ញាធរ​ត្រូវ​រក្សា​ឱ្យ​បាន​នូវ​សន្តិសុខ​សុវត្ថិភាព​ជូន​​ប្រជាពលរដ្ឋនៅក្នុង​ឱកាស​ពិធីបុណ្យ គ្រិស្ដស្មាស និង​បុណ្យចូលឆ្នាំ​សកល​ដែល​នឹង​ឈានចូល​មកដល់​នាពេល​ដ៏​ខ្លី​ខាងមុខនេះ​។

ថ្លែងក្នុងកិច្ចប្រជុំគណៈបញ្ជាការឯកភាពរាជធានីភ្នំពេញតាមរយៈការបញ្ជូនរូបភាព និងសម្លេង ជាមួយនឹងកងកម្លាំងទាំងពីរប្រភេទ មន្ទីរពាក់ព័ន្ធនិងអាជ្ញាធរខណ្ឌទាំង ១៤ នៅសាលារាជធានីភ្នំពេញ កាលពីល្ងាច​ថ្ងៃទី​ ២០ ខែ​ធ្នូ លោក ​ឃួ​ង ស្រេង បាន​មានប្រសាសន៍​ ​ថា ​ ពិធីបុណ្យ​ចូលឆ្នាំ​សាកលមានប្រជាពលរដ្ឋ​ និង​សម្រុក​ចាក​ចេញពី​លំនៅឋាន ដើម្បី​ឆ្លង​ឆ្នាំ ដែល​នឹងធ្វើ​ឱ្យ​តំបន់​ប្រឈម​មួយចំនួន​មានការ​កកស្ទះ​ចរាចរណ៍។ ​ដូច្នេះ​អាជ្ញាធរ​កម្លាំង​មាន​សមត្ថកិច្ច​ត្រូវ​សម្រួល​ចរាចរណ៍​ជូន​​ប្រជាពលរដ្ឋ​ ដើម្បី​ឱ្យ​ពួកគាត់​បាន​សប្បាយរីករាយ​នៅក្នុង​ពិធីបុណ្យ​ឆ្លង​ឆ្នាំនេះ​៕

អត្ថបទ៖ សំអឿន