សន្តិសុខសង្គម

ចុះឆក់ត្រីទាំងកណ្តាលអធ្រាត្រ ភ្លាត់ស្នៀត ត្រូវឆ្លងចរន្តឆក់ខ្លួនឯងស្លាប់

បានផុស

៣ years មុន

នៅ

ថ្ងៃចន្ទ ១៤ មីនា ២០២២

ដោយ

បាត់ដំបង ៖ យុវជនម្នាក់បានស្លាប់ភ្លាមៗនៅលើកាណូតស្មាច់ ខណៈដែលគេបានចេញកាណូតទៅឆក់ត្រី បែរជាត្រូវឧបករណ៍ឆក់ដៃខ្លួនឯងទៅវិញ។

ហេតុការណ៍នេះ បានកើតឡើង នៅថ្ងៃទី ១៤ ខែមីនា ឆ្នាំ២០២២ វេលាម៉ោង ១២ និង ១០ នាទីយប់នៅចំណុចក្បាលកោះថ្វាង ក្នុងភូមិថ្វាង ឃុំកោះជីវាំង ស្រុកឯកភ្នំ ខេត្តបាត់ដំបង ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

មានករណីឆក់ត្រីដោយប្រើប្រាស់ឧបករណ៍អាំវេទរ័ឆ្លងចរន្តអគ្គិសនីស្លាប់ខ្លួនឯងចំនួន០១ករណី។ បើតាមការអះអាងពីលោក ឈិន ឡុត ត្រូវជាឪពុកជនរងគ្រោះបាននិយាយថា កូនប្រុសរបស់គាត់មានឈ្មោះ ឡុត ស៊ាងសុខបាន ភេទប្រុស អាយុ២០ឆ្នាំ រស់នៅក្នុងភូមិ ឃុំ កើតហេតុខាងលើ បានប្រាប់គាត់កាលពីវេលាម៉ោង ៨ យប់ថា ចេញទៅឆក់ត្រីហើយ លុះពេលរំលងអធ្រាត្រ ស្រាប់តែលោកមេភូមិតេមកប្រាប់ថា កូនប្រុសត្រូវឧបករណ៍ឆក់ត្រីឆក់ខ្លួនឯងស្លាប់ហើយ គឺនៅតាមបណ្តោយដងស្ទឹងសង្កែ ទើបគាត់ចេញទៅយកសពទាំងយប់។

ក្រោយពីទទួលសេចក្តីរាយការណ៍ លោកវរសេនីយ៍ទោ មួរ សាម៉េត អធិការរង បានដឹកនាំនឹងសហការជាមួយកម្លាំងប៉ុស្តិ៍ចុះទៅពិនិត្យសព ព្រមទាំងបានបញ្ជាក់ថា សពត្រូវបានខ្សែចរន្តឆក់លើបាតដៃរហូតខ្លោច ដោយសារឆ្លងចរន្ត ៕

អត្ថបទ ៖ សោ និយមរ័ត្ន