ព័ត៌មានជាតិ

ទៅឆក់ត្រី តែបែរទៅជាឆក់ខ្លួនឯងស្លាប់ នៅមាត់បឹង

បានផុស

៤ years មុន

នៅ

ថ្ងៃចន្ទ ៨ វិច្ឆិកា ២០២១

ដោយ

ការភ្ញាក់ផ្អើលមួយបានកើតឡើង នៅចំណុចវាលស្រែទួលតាវ័រ ក្នុងស្រះទឹករបស់ឈ្មោះ ខៀវ ញឹប ស្ថិតនៅភូមិព្រៃលាវ ឃុំបន្សាយត្រែង ស្រុកថ្មគោល ខេត្តបាត់ដំបង ដោយសារតែមានមនុស្សម្នាក់ឆក់នឹងឧបករណ៍ឆក់ត្រីស្លាប់នៅមាត់ស្រះ កាលពីព្រឹកថ្ងៃទី០៧ ខែវិច្ឆិកា ឆ្នាំ២០២១។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រោយពីសមត្ថកិច្ចចុះពិនិត្យទើបដឹងថា សពមានឈ្មោះ ចាន់ សុភ័ក្រ ភេទប្រុស អាយុ៣៣ឆ្នាំ មុខរបរកម្មករ រស់នៅភូមិព្រៃលាវ ឃុំបន្សាយត្រែង ស្រុកថ្មគោល ខេត្តបាត់ដំបង។

តាមការបំភ្លឺពីឈ្មោះ ស៊ុង ថាំង ភេទប្រុស អាយុ២៨ឆ្នាំ រស់នៅភូមិឃុំជាមួយគ្នា បាននិយាយថា នៅថ្ងៃទី ៧ ខែវិច្ឆិកា ម៉ោងប្រហែល២និង៣០នាទីទៀបភ្លឺ ពួកខ្លួនមានគ្នាចំនួន៤នាក់ បានដេកចាំស្រែនិងបូមទឹកស្រះនៅចំណុចទួលតាវ័រ ក្នុងភូមិសាស្ត្រខាងលើ។ សាក្សីបានបន្តថា នៅពេលនោះឈ្មោះភ័ក្ត្រ បានយកអំភ្លីឆក់ត្រី ដើរឆក់ត្រីតាមស្រែតែម្នាក់ឯង ចំណែកខ្លួនបានដើរទៅមើលម៉ាស៊ីនកំពុងបូមទឹកស្រះ ក្រោយមកខ្លួនបានដើរមកដេកវិញបានមួយសន្ទុះ ខ្លួនបានដើរទៅមើលកន្លែងម៉ាស៊ីនបូមទឹកស្រះម្ដងទៀតដោយខ្លាចមានត្រីឡើង លុះពេលទៅដល់ស្រះ ស្រាប់តែឃើញក្បាលកែវអណ្ដែតទឹកមិនឃើញមនុស្ស នៅក្នុងស្រះខ្លួនបានចុះទៅជិត ឃើញដងឆក់ត្រីហើយខ្លួនបានទាញឡើងមកលើស្រាប់តែឃើញឈ្មោះភ័ក្ត្រ រុំនឹងខ្សែភ្លើង ផុសចេញពីទឹកមកពេលនោះ ខ្លួនបានស្រែកហៅឈ្មោះធឿននិងឈ្មោះរ៉ា ដែលកំពុងដេកឲ្យមកជួយលើកចេញពីទឹក ហើយនៅពេលនោះឈ្មោះភ័ក្ត្របានស្លាប់បាត់ទៅហើយ។

គួរបញ្ជាក់ថា ពេលដែលខ្លួនអូសចាប់ទាញ ឃើញក្បាលដង្កាប់នៅជាប់នឹងក្បាលអាគុយទាំងសងខាង។ បច្ចុប្បន្នក្រោយការត្រួតពិនិត្យរួច សមត្ថកិច្ចបានប្រគល់សពទៅឲ្យក្រុមគ្រួសារយកទៅធ្វើបុណ្យតាមប្រពៃណីហើយ៕

អត្ថបទ៖ សោ និយមរ័ត្ន