ស្នងការខេត្តបាត់ដំបងស្រាយបំភ្លឺពីការចែករំលែកឃ្លីបវីដេអូនិងខ្លឹមសារថា (ហាមប៉ូលិសចរាចរណ៍ជាន់ដីខ្ញុំ)

ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បានចេញសេចក្ដីស្រាយបំភ្លឺមួយបន្ទាប់ពីមានការចែករំលែកនូវឃ្លីបវីដេអូ និងខ្លឹមសារមួយនៅលើបណ្ដាញសង្គម ដែលខ្លឹមសារនេះបានសរសេរថា (ហាមប៉ូលិសចរាចរណ៍ជាន់ដីខ្ញុំ) និងភ្ជាប់ទាំងលេខទូរស័ព្ទទៀតផង នៅខាងមុខផ្ទះមួយស្ថិតនៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង ដែលខ្លឹមសារនេះ​ធ្វើឲ្យមហាជនជាច្រើនមានការភ័ន្ដច្រឡំ​មកលើកម្លាំង​អនុវត្តច្បាប់ចរាចរណ៍។

ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បានបញ្ជាក់ថា នៅរសៀលថ្ងៃទី៣១ ខែមីនា ឆ្នាំ២០២២ វេលា​ម៉ោង១៥និង០០នាទី បុរសម្នាក់ដែលអះអាងថារូបគាត់ជាអ្នកសរសេរខ្លឹមសារខាងលើដាក់នៅ​មុខផ្ទះនោះ គឺមានឈ្មោះ សេង ហឺ អាយុ៧២ឆ្នាំរស់នៅភូមិរំចេក៤ សង្កាត់រតនៈ ក្រុងបាត់ដំបង ខេត្តបាត់ដំបង មានភារកិច្ចជាសមាជិកក្រុមប្រឹក្សា​សង្កាត់រតនៈ ក្រុងបាត់ដំបង ដែលការសរសេរនេះគឺគាត់ចង់សំណូមពរចំនួន៣ចំណុច។

នៅពេលធ្វើការសាកសួរលោក សេង ហឺ បានរៀបរាប់ថា គាត់សរសេរខ្លឹមសារបែបនេះ និងដាក់លេខទូរស័ព្ទគាត់នៅទី​នោះផង គឺដើម្បីចង់ឱ្យសមត្ថកិច្ចនគរបាលកោះអញ្ជើញរូបគាត់មកធ្វើការសាកសួរអំពីមូលហេតុ​ដែលគាត់បានសរសេរ ។ គាត់ថា រូបគាត់សរសេរនេះមិនមានបំណងអាក្រក់​ណាមួយចំពោះមន្រ្តីនគរបាលចរាចរណ៍ទេ តែគាត់ចង់មានសំណូមពរដូចខាងក្រោម៖
១-សូមឱ្យអាជ្ញាធរ ឬសមត្ថកិច្ចពាក់ព័ន្ធ អនុញ្ញាតឱ្យមានការធ្វើចរាចរណ៍ទៅមកនៅលើស្ពានខាងមុខសាលាខេត្តបាត់ដំបង ជាធម្មតា ព្រោះសព្វថ្ងៃស្ពានទាំងពីរនោះ អនុញ្ញាតឱ្យធ្វើដំណើរជាផ្លូវ(ឯកទិស)។
២-សូមឱ្យសមត្ថកិច្ចនគរបាលចរាចរណ៍ដែលបំពេញភារកិច្ចលើដងផ្លូវ ដែលជួបទំនាក់ទំនងជាមួយមហាជនទូទៅ សូមបំពេញភារកិច្ចប្រក​បដោយក្រមសីលធម៌ អាកប្បកិរិយាល្អ ពាក្យសំ​ដីរស់រាយរាក់ទាក់ និងសុំឱ្យអនុគ្រោះ លើកលែងចំពោះអ្នកប្រព្រឹត្តល្មើសច្បាប់ចរាចរណ៍តែមិន​មានប្រាក់បង់សម្រាប់ការផាកពិន័យ។
៣-សូមឱ្យប្រជាពលរដ្ឋទាំងអស់ដែលប្រើប្រាស់ផ្លូវ សូមមេត្តាចូលរួមគោរពច្បាប់ចរាចរ​ណ៍ឱ្យបានត្រឹមត្រូវទាំងអស់គ្នា ចៀសវាងនូវកំហុសឆ្គងដែលនាំទៅដល់ការផាកពិន័យ ព្រោះបើអ្នកប្រើប្រាស់ផ្លូវទាំងអស់ គោរពច្បាប់ដោយត្រឹមត្រូវ ហើយនោះពិតជាមិនមានកំហុសនោះទេ ហើយបើមិនមានកំហុស សមត្ថកិច្ចនគរបាលក៏មិនអាចធ្វើការផាកពិន័យបានដែរ។

ក្រុមការងារព័ត៌មាននិងប្រតិកម្មរហ័សនៃស្នងការដ្ឋាននគរបាលខេត្តបាត់ដំបង បញ្ជាក់ទៀតថា បន្ទាប់ពីបានជួបធ្វើការសាកសួរនិងស្រាយបំភ្លឺ និងលើកនូវសំណូមពរដូចខ្លឹម​សារខាងលើរួចហើយនេះ រូបគាត់ក៏បានដក​ចេញនូវស្លាក​អក្សរដែលបានសរសេរនោះវិញ និងបានលុបចោលនូវខ្លឹមសារឃ្លីបវីដេអូ ដែលក្រុមគ្រួសារគាត់បានផ្សព្វផ្សាយតាមបណ្តាញសង្គមផងដែរ។

ជាមួយគ្នានេះ ស្នងការដ្ឋាននគរបាលខេត្តបាត់ដំបង ក៏សូមទទួលយក​នូវមតិយោបល់ពីគ្រប់មជ្ឈដ្ឋាននានា ដែលបាន​លើកឡើងក្នុងបំណងកែលម្អ ស្ថាបនា ធ្វើយ៉ាងណាឱ្យកិច្ចប្រតិបត្តិការរបស់កងកម្លាំងនគរបាលកាន់តែល្អប្រសើរ ប្រកបដោយប្រសិទ្ធិភាព ស្រប​តាមជំនាញ វិជ្ជាជីវៈ និងច្បាប់ជាធរមាន៕