ស្នងការខេត្តបាត់ដំបង ដាស់តឿនមន្រ្តីក្រោមឱវាទកុំមើលឃើញតែលុយពេក

«សូមកុំមើលឃើញតែប្រាក់ពេក»។ នេះគឺជាសារដាស់តឿនរបស់លោកឧត្តមសេនីយ៍ទោ ដាញ់ អេងប៊ុនចាន់ ស្នងការនគរបាលខេត្តបា​ត់ដំបង ទៅកាន់មន្ត្រីនគរបាលចរាចរណ៍ក្រោមឱវាទរបស់លោក នៅក្នុងពេលបំពេញភារកិច្ច។

លើកឡើងនៅក្នុងកិច្ចប្រជុំផ្ទៃក្នុងជាមួយជួរស្នងការរងទទួលផែនការងារជំនាញ និងការិយាល័យចំណុះនៃស្នងការដ្ឋាននគរបាលខេត្តបាត់ដំបង នាព្រឹកថ្ងៃទី១០ ខែមីនា ឆ្នាំ២០២៥ ឧត្តមសេនីយ៍ទោ ដាញ់ អេងប៊ុនចាន់ បានលើកឡើងពីវិធានការអប់រំណែនាំចំពោះអ្នកធ្វើដំណើរលើដងផ្លូវ បើករណីកំហុសឆ្គងតូចតាចទេនោះ។

លោកស្នងការ ថា បើកំហុសកម្រិតតិចតូច គឺអប់រំណែនាំ និងពន្យល់ពួកគាត់ឱ្យបានយល់ដឹង នោះគាត់នឹងអរគុណដល់យើងជាមន្រ្តីនគរបាលចរាចរណ៍ ហើយចងចាំពេញមួយជីវិតកំហុសឆ្គង ដែលពួកគាត់បានធ្វើខុសដោយអចេតនា ពេលធ្វើដំណើរលើដងផ្លូវ។

លោកស្នងការខេត្តបាត់ដំបង បន្ថែមថា ពេលខ្លះប្រជាពលរដ្ឋធ្វើដំណើរពីស្រុកស្រែចូលមកទីក្រុង ឬទីប្រជុំជនម្តងម្កាល ដើម្បីបានឃើញពីការអភិវឌ្ឍរីកចម្រើនរបស់ទីក្រុង។ ដូច្នេះ មិនអាច​យល់ដឹងបានគ្រប់ជ្រុងជ្រោយនៃការធ្វើចរាចរណ៍​លើដងផ្លូវខ្វាត់ខ្វែង មានភ្លើងស្តុប និងស្លាកសញ្ញានោះទេ ដែលជាកំហុសអចេតនា។

លោក បន្តថា ពួកគាត់ខ្លាចខុសច្បាប់ហើយ ទើបក្នុងអារម្មណ៍ភ័យផង ខ្លាចផង។ ដូច្នេះ នគរបាលចរាចរណ៍នៅលើដងផ្លូវ ត្រឹមតែអនុវត្តវិធានការអប់រំណែនាំ ឱ្យពួកគាត់បានយល់អំពីកំហុសនេះពាក់ព័ន្ធជាមួយនឹងច្បាប់ចរាចរណ៍បានហើយ រួចអនុញ្ញាតិឱ្យគាត់បន្តដំណើរទៅចុះ ពោលគឺកុំផាកពិន័យ៕