សន្តិសុខសង្គម

ធ្យូងជាច្រើនតោន ត្រៀមនាំចេញទៅប្រទេសវៀតណាម

បានផុស

៤ years មុន

នៅ

ថ្ងៃពុធ ១ មិថុនា ២០២២

ដោយ

ស្វាយរៀង ៖ មានសេចក្តីរាយការណ៍មកថា មានរថយន្តធុនធំចំនួន០៤គ្រឿង បានដឹកធ្យូងមកទម្លាក់នៅមាត់ប្រឡាយទាហាន ត្រៀមលើកដាក់ចូលក្នុងទូកវៀតណាម ដើម្បីឆ្លងដែនសមត្ថកិច្ចឆ្លើយថា មិនដឹងជារបស់ក្រុមហ៊ុនណាទេ ហើយមានច្បាប់ឬអត់ច្បាប់ក៏មិនដឹងដែរ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ករណីឈ្មួញដឹកធ្យូងមកទម្លាក់បម្រុងចេញទៅប្រទេសវៀតណាមនេះបានកើតឡើងរយៈពេល២ថ្ងៃមកហើយ ចាប់តាំងពីវេលាម៉ោង៩ព្រឹកថ្ងៃទី៣០ ខែឧសភា ឆ្នាំ២០២២ ដល់ថ្ងៃទី០១ ខែមិថុនា ឆ្នាំ២០២២ នៅចំណុចប្រឡាយទាហាន ច្រករបៀងស្លាបឆ្វេង នៃច្រកទ្វារព្រំដែនអន្តរជាតិព្រៃវល្ល័ ស្ថិតនៅភូមិព្រៃវល្ល័ ឃុំថ្មី ស្រុកកំពង់រោទ៌។

បើតាមសមត្ថកិច្ចម្នាក់សុំមិនបញ្ចេញឈ្មោះបានប្រាប់ក្រុមអ្នកសារព័ត៌មានដឹងថា ឈ្មួញបានដឹកធ្យូងប្រមាណជិត ១០តោន មកទម្លាក់ទុកនៅចំណុចមាត់ប្រឡាយទាហាន នេះ៣ថ្ងៃមកហើយ និងបានលក់ឲ្យទៅឈ្មួញវៀតណាមរួចហើយដែរ ក៏ប៉ុន្តែទំនងអ្នករត់ការ សែនសំណែនមិនត្រូវ ទើបមិនទាន់អាចលើកដាក់ទូកនាំទៅបាន។ ដោយឃើញខាងវៀតណាមត្រៀមទូកកាណូត ចូលមកព្រំដែនទឹកកម្ពុជា ត្រង់ចំណុចច្រករបៀង ស្លាបខាងឆ្វេង នៃច្រកទ្វាព្រំដែនអន្តរជាតិព្រៃវល្ល័ រួចហើយ។

មហាជនបានរិះគន់ថា អាជ្ញាធរនិងសមត្ថកិច្ចពាក់ព័ន្ធ ហាក់ត្រូវថ្នាំហើយបានមើលមិនឃើញ បិទភ្នែកឲ្យឈ្មួញដឹកធ្យូងមកទម្លាក់ទុកនៅមាត់ប្រឡាយ នៅជាប់ព្រំដែនហើយមិនបង្ក្រាបបែបនេះ។

ហើយចំពោះធ្យូង គឺក្រសួងកសិកម្មរុក្ខាប្រមាញ់និងនេសាទ មិនអនុញ្ញាតឲ្យនាំចេញទៅក្រៅប្រទេសទេ ហើយការជួញដូរធ្យូង ឈើ នេះធ្វើឲ្យប៉ះពាល់ដល់ព្រៃឈើ ក្រុមឧក្រិដ្ឋកម្មព្រៃឈើ បានលួចកាប់បំផ្លាញព្រៃឈើ យកទៅដុតធ្វើធ្យូង ដែលច្បាប់ហាមឃាត់។