សន្តិសុខសង្គម
មន្ត្រីគ្រឿងញៀន៖ ការផលិតគ្រឿងញៀនសំយោគកាន់តែសកម្មនៅតំបន់ត្រីកោណមាសកំពុងជះផលប៉ះពាល់យ៉ាងខ្លាំងមកលើកម្ពុជា
លោកឧត្តមសេនីយ៍ឯក នាក់ យុទ្ធា ប្រធានលេខាធិការដ្ឋាននៃគណៈកម្មាធិការប្រយុទ្ធប្រឆាំងគ្រឿងញៀន បានមានប្រសាសន៍ថា ការផលិតគ្រឿងញៀនបែបសំយោគកាន់តែសកម្មនៅក្នុងតំបន់ត្រីកោណមាស កំពុងជះផលប៉ះពាល់កាន់តែខ្លាំងមលលើប្រទេសក្នុងតំបន់ ក្នុងនោះរួមមានទាំងប្រទេសកម្ពុជាផងដែរ ។
ថ្លែងនៅក្នុងកិច្ចប្រជុំស្ដីពីការត្រួតពិនិត្យ និងការពង្រឹងយន្តការនៃគណៈកម្មាធិការប្រយុទ្ធប្រឆាំងគ្រឿងញៀន និងគណៈកម្មាធិការប្រយុទ្ធនឹងជំងឺអេដស៍ កាមរោគ នៅថ្ងៃទី២៣ ខែសីហា នៅសណ្ឋាគារសុខាភ្នំពេញ លោកឧត្តមសេនីយ៍ឯក នាក់ យុទ្ធា បានបន្តថា «រយៈពេលចុងក្រោយនេះ តំបន់ត្រីកោណមាសបានប្រែក្លាយពីការផលិតអាភៀន ឬគ្រឿងញៀន ពីការផលិតបែបធម្មជាតិ មកផលិតបែបគ្រឿងញៀនសំយោគយ៉ាងសកម្ម ដូច្នេះកម្ពុជាក៏បានទទួលរងយ៉ាងធំធេងដែរ ដោយពួកគេបានដឹកជញ្ជូនមកកម្ពុជា ហើយដឹកបន្តទៅកាន់ប្រទេសទី៣តាមផ្លូវទឹក និងផ្លូវអាកាសជាដើម ខណៈក៏មានការប៉ុនប៉ងយកកម្ពុជាធ្វើជាទីកន្លែងកែច្នៃផលិតផងដែរ ។ ទន្ទឹមនិងនេះបរិមាណគ្រឿងញៀនដែលចាប់បាននៅប្រទេសកម្ពុជាកើនឡើង ដែលទាំងនេះមិនមែនជាបញ្ហាដោយឡែកសម្រាប់តែកម្ពុជានោះទេ ប៉ុន្តែវាជាបញ្ហារួមរបស់តំបន់ ព្រោះប្រទេសក្នុងតំបន់ក៏មានកើនឡើងផងដែរ »។
លោកឧត្តមសេនីយ៍ឯកបានបន្តទៀតថា ប្រទេសកម្ពុជាមានទីតាំងនៅជិតតំបន់ត្រីកោណមាស ដោយមិនអាចគេចផុតអំពីការលួចនាំចូលនិងដឹកជញ្ជូនគ្រឿងញៀននេះពីតំបន់ត្រីកោណមាសបាននោះទេ ដូច្នេះទាមទារឲ្យមានកិច្ចសហការពីសមត្ថកិច្ច និងមន្រ្តីពាក់ព័ន្ធទាំងអស់បង្កើនការស្រាវជ្រាវ និងទប់ស្កាត់ការបង្រ្កាបមេខ្លោង និងបក្ខពួកឧក្រិដ្ឋជននាំចូលគ្រឿងញៀននៅតាមតំបន់ព្រំដែនគោក ទឹក និងអាកាស ឲ្យកាន់តែមានប្រសិទ្ធភាពខ្ពស់ថែមទៀត។
លោក កៅ ខុនដារ៉ា រដ្ឋលេខាធិការក្រសួងមហាផ្ទៃ បានមានប្រសាសន៍ថា ប្រភេទគ្រឿងញៀនដែលបង្ក្រាបបានច្រើនជាងគេបច្ចុប្បន្ននេះ គឺប្រភេទ ICE ដែលគ្រឿងញៀនប្រភេទនេះ បង្កគ្រោះថ្នាក់កាន់តែធ្ងន់ធ្ងរសម្រាប់អ្នកប្រើ ហើយនៅមុនឆ្នាំ២០១៥ កម្ពុជាអាចនិយាយបានថា គ្រាន់តែជាប្រទេសដែលទទួលរងនូវផលប៉ះពាល់តិចតួចជាងគេក្នុងតំបន់ ប៉ុន្តែបច្ចុប្បន្នកំពុងរងទទួលផលប៉ះពាល់ខ្លាំងដូចបណ្ដាប្រទេសផ្សេងៗទៀត។
លោករដ្ឋលេខាធិការបានបន្តថា ទិសដៅបន្តការប្រយុទ្ធប្រឆាំងបញ្ហាគ្រឿងញៀននេះ ត្រូវពិនិត្យលើការអនុវត្ត និងលទ្ធផលការងារ,ពិនិត្យពិភាក្សាលើការអនុវត្តខ្លឹមសារគោលនយោបាយ ផែនការយុទ្ធសាស្ត្រ បទបញ្ជា និងសេចក្តីណែនាំ និងបន្តពិនិត្យ និងឯកភាពរួមគ្នាដាក់ចេញនូវផែនការសកម្មភាពចំពោះមុខច្បាស់លាស់មួយដើម្បីបញ្ជាក់ និងធានាថា ក្រសួងមហាផ្ទៃ ពិតជាបានចូលរួមអនុវត្តពេញលេញ និងជាពហុវិស័យក្នុងការឆ្លើយតបចំពោះបញ្ហាគ្រឿងញៀន មេរោគអេដស៍ជំងឺអេដស៍ និងកាមរោគ៕
អត្ថបទ៖ សំអឿន
-
កីឡា៦ ថ្ងៃ ago
ឈ្នះខ្សែក្រវាត់ថ្ងៃជាមួយ ឈឿង ល្វៃ កីឡាករ Erdene ក៏មានរថយន្តទទួល
-
ព័ត៌មានជាតិ៤ ថ្ងៃ ago
ម្ចាស់សំណង់របងថ្មនៅរមណីយដ្ឋានឆ្នេរនេសាទ នៅតែរឹងទទឹងមិនព្រមវាយកម្ទេចរបងចេញ
-
សន្តិសុខសង្គម៧ ថ្ងៃ ago
ដកហូតមុខតំណែង មេបញ្ជាការរងស្រុកស្វាយជ្រុំ៣នាក់ ពាក់ព័ន្ធករណីទារប្រាក់ពីអ្នកប្រើប្រាស់គ្រឿងញៀនជាង១ពាន់ដុល្លារ
-
ជីវិតកម្សាន្ដ១ សប្តាហ៍ ago
មនុស្សស្និទ្ធស្នាលទម្លាយពីស្ថានភាព Ngoc Trinh ក្រោយចេញពីពន្ធនាគារជាង៣ខែ
-
ព័ត៌មានជាតិ៥ ថ្ងៃ ago
ដើម្បីកុំឱ្យភោជនីយដ្ឋានដួលរលំបះជើងទាន់ សម្ដេចធិបតី បញ្ជាឱ្យកែម៉ោងពិនិត្យជាតិអាល់កុល
-
ព័ត៌មានអន្ដរជាតិ៤ ថ្ងៃ ago
អ្នកវិទ្យាសាស្ត្រស្កុតឡែនរកឃើញហ្វូស៊ីលចម្លែករូបរាងដូចសត្វនាគចិនអាយុកាល ២៤០ លានឆ្នាំ
-
ជីវិតកម្សាន្ដ៥ ថ្ងៃ ago
តួជនទី៣ Benz ត្រលប់មកតំណែងស្រីស្អាតម្ដងទៀត ទោះឈានដល់អាយុ៤៣ឆ្នាំ
-
ព័ត៌មានអន្ដរជាតិ៦ ថ្ងៃ ago
នាវាចម្បាំងថៃ ច្រឡំដៃបាញ់កាំភ្លើងធំ ចំនាវាគ្នាឯង