ក្រសួងធនធានទឹក និងឧតុនិយម​ប្រកាសឱ្យពលរដ្ឋ​ប្រុងប្រយ័ត្នបាតុភូតភ្លៀងផ្គរ ខ្យល់កន្ត្រាក់​ចាប់ពីថ្ងៃស្អែក

ក្រសួងធនធានទឹក និងឧតុនិយម​នៅថ្ងៃទី ៤ ខែតុលានេះបានប្រកាសឱ្យពលរដ្ឋមានការ​ប្រុងប្រយ័ត្នចំពោះបាតុភូតភ្លៀងផ្គរ រន្ទះ និងខ្យល់កន្ត្រាក់ចាប់ពីថ្ងៃទី ​៥ ដល់ថ្ងៃទី ១១ ខែតុលានេះ ​ដោយសារប្រព័ន្ធសម្ពាធទាបបន្តអូសបន្លាយកាត់លើកម្ពុជា ជាមួយនឹងខ្យល់មូសុងនិរតី។

សេចក្ដីជូនដំណឹងរបស់ក្រសួងធនធានទឹក និងឧតុនិយម​នៅថ្ងៃនេះបញ្ជាក់ថា បាតុភូតនេះ នឹងធ្វើឲ្យតំបន់ទាំង ៣ (តំបន់ទំនាបកណ្ដាល ខ្ពង់រាប មាត់សមុទ្រ) ​មានភ្លៀងធ្លាក់ពីតិចទៅច្រើន​លាយឡំដោយផ្គរ រន្ទះ និងខ្យល់កន្ត្រាក់ ហើយផ្នែកខ្លះនៃបណ្ដាខេត្តនៃភាគពាយព្យ និងភាគខាងជើងជាប់ប្រទេសវៀតណាម​ ភ្លៀងអាចធ្លាក់ច្រើនដោយអន្លើ៕