ប្រទះឃេីញគូស្នេហ៍មួយគូដេកស្លាប់ក្នុងបន្ទប់ជួលសង្ស័យករណីឃាតកម្ម

គូសង្សារមួយគូត្រូវបានប្រជាពលរដ្ឋប្រទះឃើញដេកស្លាប់នៅក្នុងបន្ទប់ជួលលេខ១៦ ជាន់ទី២ ក្នុងភូមិផ្សារកំបូល សង្កាត់កំបូល ខណ្ឌកំបូល រាជធានីភ្នំពេញ បង្កឲ្យភ្ញាក់ផ្អើលដល់ប្រជាពលរដ្ឋ និងសមត្ថកិច្ចកាលពីវេលាម៉ោង៦​និង៥០នាទីព្រឹក ថ្ងៃទី១៧ ខែតុលា ឆ្នាំ២០២២ ។

សមត្ថកិច្ចបានឲ្យដឹងថា ជនរងគ្រោះភាគីខាងស្រីមាន ឈ្មោះ វឿន សីហា ហៅក្តឹប អាយុ១៨ឆ្នាំ មុខរបរកម្មការិនីររោងចក្រ ស្នាក់នៅបន្ទប់ជួលកើតហេតុទើបបាន១សប្តាហ៍ និងមានស្រុកកំណើតនៅភូមិតាខែក ឃុំទឹកជោរ ស្រុកព្រះនេត្រព្រះ ខេត្តបន្ទាយមានជ័យ ។ ចំណែកខាងសពបុរសវិញត្រូវជាគូសង្សារនឹងគ្នា មិនទាន់ស្គាល់អត្តសញ្ញាណ មានអាយុជាង២០ឆ្នាំ ។

តាមការរៀបរាប់ពីស្ត្រីម្នាក់ត្រូវជាម្តាយមីង ឈ្មោះ យិន ភឿន អាយុ២៦ឆ្នាំ មុខរបរកម្មកររោងចក្រជាមួយគ្នា ស្នាក់នៅផ្ទះជួលក្បែរកន្លែងកើតហេតុ បានឲ្យដឹងថា ក្មួយស្រីរបស់គាត់បានស្រឡាញ់គ្នាជាមួយបុរសម្នាក់(សព) កន្លងមកក្មួយស្រីបានស្នាក់នៅជាមួយគាត់ទើបតែ១សប្តាហ៍កន្លងមកនេះ បានសុំគាត់ជួលបន្ទប់នៅបែកគ្នា ទើបតែបាត់ដំណឹង មិនឃើញមុខតែ២ថ្ងៃ ស្រាប់តែនៅព្រឹកថ្ងៃទី១៧ ខែតុលា ឆ្នាំ២០២២នេះ ទូរស័ព្ទរកតែមិនចូលទើបមកតាមរកមើល ឃើញបន្ទប់បិទទ្វារជិត ហៅមិនឆ្លើយ ទើបឲ្យអ្នកក្បែរខាងជួយគាស់បើកបង្អួចមើលស្រាប់តែប្រទះឃើញដេកស្លាប់ទាំង២នាក់ ទន្ទឹមគ្នានៅក្នុងបន្ទប់ជួលតែម្ដង ។

តាមការពិនិត្យបឋមជាក់ស្តែងខាងស្រីមានស្នានរបួសបែកមុខ រីឯខាងប្រុស មានស្នាមអារក អាចសន្និដ្ឋានផ្តើមចេញពីរឿងភ្លើងប្រច័ណ្ឌ វាយសម្លាប់នាងជាសង្សារហើយ អារកសម្លាប់ខ្លួនឯងតាមក្រោយ។ មកដល់ព្រឹកនេះសពគូសង្សារមានធំក្លិនទៅហើយ ។

ក្រោយពីប្រទះឃើញគូសង្សារស្លាប់ទន្ទឹមគ្នានៅក្នុងបន្ទប់ជួល សង្ស័យផ្តើមចេញពីភ្លើងប្រច័ណ្ឌ សមត្ថកិច្ចជំនាញ ចុះធ្វើកោសល្យវិច័យ និងស្រាវជ្រាវរកសាច់ញាតិខាងប្រុស មុននឹងប្រគល់សពជូនក្រុមគ្រួសារយកទៅធ្វើបុណ្យតាមប្រពៃណី៕

អត្ថបទ៖ សុខា