បឋម៖ នារីវ័យ២៤ឆ្នាំម្នាក់ត្រូវជនមិនស្គាល់មុខកាត់ក្បាលសម្លាប់ក្នុងបន្ទប់ជួលទាំងអាក្រាតកាយ

នារីជាបុគ្គលិកធ្វើការក្នុងកាស៊ីណូមួយកន្លែងត្រូវជនមិនស្គាល់មុខសម្លាប់កាត់ក្បាលដាច់ចេញពីដងខ្លួនទាំងអាក្រាតកាយនៅក្នុងបន្ទប់ជួល។

តាមរបាយការណ៍បឋមបានឲ្យដឹងថា ករណីឃាតកម្មនេះបានកើតឡើងកាលពីវេលាម៉ោង១២និង៤០នាទីរំលងអាធ្រាត្រ ឈានចូលថ្ងៃទី២០ ខែមេសា ឆ្នាំ២០២៣ នៅចំណុចបន្ទប់ជួលផ្លូវកំពង់ស្ពាន ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។

សពជនរងគ្រោះមានឈ្មោះ ម៉ន ស្រីម៉ី ភេទស្រី អាយុ២៤ឆ្នាំ មុខរបរបុគ្គលិកកាស៊ីណូ DYNASTY មានស្រុកកំណើត ភូមិកណ្តាលក្រោម ឃុំបន្ទាយដែក ស្រុកកៀនស្វាយ ខេត្តកណ្តាល។ ទីលំនៅបច្ចុប្បន្នស្នាក់នៅបន្ទប់ជួលភូមិបាវិតកណ្តាល សង្កាត់បាវិត ក្រុងបាវិត ខេត្តស្វាយរៀង។

សពជនរងគ្រោះត្រូវបានជនដៃដល់សម្លាប់ដោយកាត់ក្បាលដាច់ចេញពីដងទាំងអាក្រាតកាយ។ ទោះបីយ៉ាងណាសមត្ថកិច្ចនៅមិនទាន់បញ្ជាក់ពីមូលហេតុនៃករណីឃាតកម្មដ៏សាហាវព្រៃផ្សៃនេះនៅឡើយ ខណៈកំពុងធ្វើការស្រាវជ្រាវនៅកន្លែងកើតហេតុ៕

អត្ថបទ៖ សុខុម