លម្អិតករណីប្លន់អ្នកលក់មាស! ក្រុមជនសង្ស័យនៅចាំក្បែរផ្ទះជនរងគ្រោះ ខណៈជនរងគ្រោះចេញ​ពីផ្ទះធ្វើសកម្មភាពតែម្ដង

ប្តីប្រពន្ធមួយគូរជាអ្នកលក់មាស និងប្តូរប្រាក់ត្រូវបានជនសង្ស័យមួយក្រុមប្រដាប់ដោយគាំភ្លេីងខ្លីបាញ់គម្រាមប្លន់យកទ្រព្យសម្បត្តិអស់ជិត២០ម៉ឺនដុល្លារ ហេីយនាំគ្នាគេចខ្លួនបាត់ដោយសុវត្តិភាព ខណៈជនរងគ្រោះចាកចេញពីផ្ទះបំណងទៅផ្សារដេីម្បីលក់ដូរ បង្កការភ្ញាក់ផ្អេីលកាលពីវេលាម៉ោង៦និង៣០នាទីព្រឹក ថ្ងៃទី១៨ ខែឧសភាឆ្នាំ២០២៣ ក្នុងសង្កាត់ស្ទឹងមានជ័យទី១ ខណ្ឌមានជ័យ ។

ជនរងគ្រោះជាប្រពន្ធមានឈ្មោះ អ៊ុង ផល្លា អាយុ៥២ឆ្នាំ មានមុខរបរជាអ្នកលក់មាស និងប្តូរប្រាក់ ក្នុងផ្សារស្ទឹងមានជ័យចាស់ តូបលេខ៥០ និងប្ដីឈ្មោះ អន ហ៊ាក អាយុ៥៥ឆ្នាំ មុខរបរមន្ត្រីប៉ូលិសព្រំដែន បានរងរបួសបែកក្បាល ដោយស្នាប់កាំភ្លើង។

ជនរងគ្រោះនិយាយប្រាប់សមត្ថកិច្ចថា ទ្រព្យសម្បត្តិរបស់គាត់មានលុយ និងគ្រឿងអលង្កាសរុបប្រមាណជិត២០ម៉ឺនដុល្លារ ត្រូវបានជនប្រដាប់អាវុធ៤នាក់ ជិះម៉ូតូ២គ្រឿង បានធ្វើសកម្មភាពប្លន់យកទៅបាត់ បន្ទាប់ពីពួកគាត់ចេញពីផ្ទះធ្វើដំណើរទៅផ្សារស្ទឹងមានជ័យចាស់។ 

ជនរងគ្រោះបន្តថា ក្រុមនោះបានចាំនៅក្បែរផ្ទះ ពេលពួកគាត់ចេញពីផ្ទះដើរទៅផ្សារ (ផ្ទះជនរងគ្រោះនៅជិតផ្សារ) ក៏ស្ទុះ​មកឆក់ទាញយកកាបូប រួចបាញ់មួយគ្រាប់ និងយកកាំភ្លើងវាយក្បាលបុរសជាប្ដី របួសដេរជាច្រើនថ្នេរ ហើយជិះគេចខ្លួនអស់ ។ 

ក្រោយទទួលបានករណីនេះ សមត្ថកិច្ចនគរបាល និងកងរាជអាវុធហត្ថ បានចុះទៅដល់ផ្ទះជនរងគ្រោះ និងត្រួតពិនិត្យ​ចំណុចកើតហេតុ ដើម្បីកំណត់មុខសញ្ញាតាមស្រាវជ្រាវជនសង្ស័យទាំងនោះ៕

អត្ថបទ៖ សុខា