សន្តិសុខសង្គម

ការពាររក្សាសុខសុវត្ថិភាពជូនពលរដ្ឋ ជាភារកិច្ចចម្បងរបស់នគរបាលស្រុកមណ្ឌលសីមា

បានផុស

៣ years មុន

នៅ

ថ្ងៃចន្ទ ១០ កក្កដា ២០២៣

ដោយ

កងកម្លាំងនគរបាល នៃអធិការដ្ឋានស្រុកមណ្ឌលសីមា ខេត្តកោះកុង លើកឡើងថា ការចុះល្បាតការពារសុខសុវត្ថិភាពជូនប្រជាពលរដ្ឋ និងអាជីវករក្នុងមូលដ្ឋានពេលរាត្រី ជាភារកិច្ចចម្បងរបស់ខ្លួន។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ដោយមានការគោលការណ៍ និងបទបញ្ជារបស់លោកឧត្ដមសេនីយ៍ទោ គង់ មនោ ស្នងការនគរបាលខេត្តកោះកុង និងលោក លឹម សែងច័ន្ទ អធិការនគរបាលស្រុកមណ្ឌលសីមា កងកម្លាំងប្រដាប់អាវុធ ផ្ដោតការយកចិត្តទុកដាក់ខ្ពស់លើការល្បាតការពារសុខសុវត្ថិភាពជូនប្រជាពលរដ្ឋ ដោយក្នុង ១ ខែ ៨ ដង។

លោកវរសេនីយ៍ត្រី គិន ចាន់ថន អធិការរងនគរបាលស្រុកមណ្ឌលសីមា ទទួលបន្ទុកផែនសេនាធិការ បានឲ្យដឹងកាលពីយប់ថ្ងៃទី ៩ ខែកក្កដា ឆ្នាំ ២០២៣ ថា ការល្បាតការពារសុវត្ថិភាពជូនពលរដ្ឋនេះ ធ្វើឡើងក្នុងគោលដៅចម្បងគឺទប់ស្កាត់នូវបទល្មើសផ្សេងៗណាមួយពេលរាត្រីបានទាន់ពេលវេលាបំផុត។

បើតាមលោកអធិការរងនគរបាលស្រុកមណ្ឌលសីមា មួយរយៈចុងក្រោយនេះ បញ្ហាបទល្មើស ឬ អំពើអសកម្មក្នុងមូលដ្ឋានកើតមានតិចតួចប៉ុណ្ណោះ ពុំមានបញ្ហាចោទនោះទេ ពោលគឺអាចគ្រប់គ្រងបង្ក្រាបទប់ស្កាត់បានយ៉ាងល្អប្រសើរ។ ពិសេសអំឡុងយុទ្ធនាការឃោសនាបោះឆ្នោតអាណត្តិទី ៧ នេះ។

ទាក់ទិននឹងមានក្មេងទំនើងដើរលេងយប់ជ្រៅពេក សមត្ថកិច្ចស្រុក និងឃុំ បានណែនាំ ២ ដង ករណីឃើញមុខដដែល នឹងធ្វើកិច្ចសន្យានៅចំពោះមុខសមត្ថកិច្ចមុននឹងមានវិធានការច្បាប់ជាកំហិត។

គេសង្កេតឃើញថា កន្លងទៅ កងកម្លាំងនគរបាលអធិការនគរបាលស្រុកមណ្ឌលសីមា ក៏បានទប់ស្កាត់ និងបង្ក្រាបល្មើសជាក់ស្ដែងបានជាច្រើនករណីផងដែរ ដូចជា ៖ គ្រោះថ្នាក់ចរាចរណ៍ ការកែច្នៃបំពង់ស៊ីម៉ាំងខុសបច្ចេកទេស បង្កការរំខានដល់ពលរដ្ឋពេលយប់ជ្រៅ ការជួញដូរគ្រឿងញៀន ក្មេងទំនើងដើរ និងល្បែងស៊ីសងជាដើម៕

អត្ថបទ ៖ សិរីវឌ្ឍនៈ