ចាប់ខ្លួនបានហើយជនដៃដល់ក្នុងសំណុំរឿងកាប់សម្លាប់ម្ចាស់បំណុល៣៦ម៉ឺនរៀល

ជនដៃដល់ក្នុងសំណុំរឿងកាប់សម្លាប់ស្ត្រីជាម្ចាស់បំណុល នៅស្រុកស្អាង​ ខេត្តកណ្ដាល ត្រូវបានកម្លាំងនគរបាលនៃអធិការដ្ឋាននគរបាលស្រុកវាលវែង ស្នងការដ្ឋានខេត្តពោធិ៍សាត់ ឃាត់ខ្លួនបានហើយនៅវេលា​ម៉ោង​១៣​និង០៣​នាទីថ្ងៃទី​២១​ ខែឧសភា​ ឆ្នាំ២០២៤នេះ នៅចំណុចខាងជើង​រង្វង់​មូល​ប្រម៉ោយ​ ស្ថិតក្នុងភូមិប្រម៉ោយ​ ឃុំប្រម៉ោយ ស្រុកវាលវែង ខេត្តពោធិ៍សាត់។

ជនដៃដល់មានឈ្មោះ ឡុង​ ឈាវ​ ភេទប្រុស អាយុ៣២ឆ្នាំ មុខរបរ​ជាងដែក​។ បច្ចុប្បន្នជសង្ស័យត្រូវបានបញ្ជូនមកកាន់អធិការដ្ឋាននគរបាលស្រុកវាលវែង​ ដើម្បីបន្តនីតិវិធី​។

សូមជម្រាបថា កាលពីថ្ងៃទី១៩ ខែឧសភា ឆ្នាំ២០២៤ ជនដៃដល់បានធ្វើសកម្មភាពទាញកាំបិតផ្គាក់កាប់លើជនរងគ្រោះជាម្ចាស់បំណុល ខណៈដែលស្ត្រីរងគ្រោះទៅទារលុយចំនួន៣៦ម៉ឺនរៀល និងថតឡាយវីដេអូនៅចំណុចផ្ទះជនដៃដល់ក្នុងភូមិពោធិលើ ឃុំត្រើយស្លា​ ស្រុកស្អាង​ ខេត្តកណ្ដាល បណ្ដាលឲ្យស្ត្រីរងគ្រោះស្លាប់ភ្លាមៗនៅកន្លែងកើតហេតុ។ ក្រោយពីកាប់សម្លាប់ជនរងគ្រោះ ជនដៃដល់បានជិះម៉ូតូមួយគ្រឿងម៉ាកគុបរត់គេចខ្លួនបាត់៕