អាជ្ញាធរសង្កាត់ដង្កោស្ថាបនាប្រព័ន្ធលូមួយខ្សែដើម្បីរំដោះជំនន់ទឹកភ្លៀងនារដូវវស្សា

ផ្លូវលំមួយខ្សែដែលរងការខូចខាត និងជន់លិចនារដូវធ្លាក់ភ្លៀងកង្វះនូវប្រព័ន្ធលូបង្ហូរទឹកប៉ះពាល់ដល់ប្រជាពលរដ្ឋធ្វេីដំណេីរ និងប្រកបរបរផ្សេងៗពេលនេះត្រូវបានអាជ្ញាធរចុះពិនិត្យ និងដាក់គ្រឿងចក្រកាយរៀបចំប្រព័ន្ធលូហេីយ។

ការចុះពិនិត្យ និងរៀបចំប្រព័ន្ធលូនេះ គឺធ្វើឡើងបន្ទាប់មើលឃេីញថាផ្លូវលំមួយខ្សែដែលស្ថិតនៅភូមិបាគូ​ សង្កាត់ដង្កោ​ ខណ្ឌដង្កោ​ ពិបាកដល់ប្រជាពលរដ្ឋធ្វេីដំណេីរ និងប្រករបរផ្សេងៗ ខណៈភ្លៀងមកម្តងៗទឹកដកលិចផ្លូ​វ​ កង្វះនូវប្រព័ន្ធលូរំដោះទឹក​ ដេីម្បីបញ្ជៀសនូវទឹកជំនន់ជន់លិចលំនៅឋានប្រជាពលរដ្ឋ។

មន្ត្រីជំនាញសាលាសង្កាត់ដង្កោ​ បានប្រាប់ឱ្យដឹងថា​ ផ្លូវដែលកំពុងស្ថាបនាកាយដាក់ប្រព័ន្ធលូខាងលេីមានប្រវែង​៧០០ម៉ែត្រ​ ដោយមុខកាត់០.៨០ម៉ែត្រ​ ដោយប្រេីប្រាស់ថវិកាគម្រោងមូលនិធិអភិវឌ្ឍន៍របស់រដ្ឋបាលសង្កាត់ក្នុងឆ្នាំ២០២៤ ​និងបន្តស្ថាបនាជាផ្លូវបេតុងឆ្អឹងដែកនាពេលខាងមុខនេះ៕

អត្ថបទ៖ សុខា