ក្រុមហ៊ុនចំនួន២ ដែលធ្វើឲ្យផ្លូវចូលទៅឃុំជីផាត​ខូចខាត ទទួលសំណើជួសជុលឡើងវិញ

បន្ទាប់ពីការស្នើសុំពីប្រជាពលរដ្ឋ និងអ្នកទេសចរ ក្រុមហ៊ុនចំនួន២ដែលដឹកជញ្ជូនលើសទម្ងន់កំណត់បានសន្យាថា នឹងចុះជួសជុលកែលម្អឡើងវិញនៅត្រង់ចំណុចខូចខាតលើកំណាត់ផ្លូវក្រួសក្រហមក្នុងភូមិសាស្រ្តឃុំជីផាត ស្រុកថ្មបាំង។

ភាពខូចខាតជាច្រើនកន្លែងលើកំណាត់ផ្លូវក្រួសក្រហមចាប់ពីកែងផ្លូវជាតិលេខ៤៨ ទៅមូលដ្ឋានឃុំជីផាត បានកំពុងធ្វើឱ្យប្រជាពលរដ្ឋ និងអ្នកទេសចរលំបាកធ្វើដំណើរទៅមក ពិសេសអំឡុងរដូវវស្សានេះតែម្តង។ បើតាមប្រជាពលរដ្ឋ មូលហេតុដែលបណ្តាលអោយផ្លូវ១ខ្សែនេះខូចខាតយ៉ាងដំណំបែបនេះ ក៏ព្រោះតែការដឹកជញ្ជូនលើសទម្ងង់កំណត់។ ប្រជាពលរដ្ឋបានបន្តថា ក្រុមហ៊ុនដឹកគ្រួសថ្ម និងក្រុមហ៊ុនឈើអាកាស្យា តែងតែដឹកជញ្ជូនថ្ម ដើមអាកាស្យាទៅមកជារៀងរាល់ថ្ងៃ ទើបធ្វើឱ្យផ្លូវឆាប់ខូចខាតលំបាកធ្វើចរាចរណ៍ ដូច្នេះពួកគាត់ស្នើសុំមានការជួសជុលឡើងវិញ។

ឆ្លើយតបនឹងការត្អូញត្អែររបស់ប្រជាពលរដ្ឋ លោក ដក់ សុផាត តំណាងក្រុមហ៊ុនកិនថ្ម អ៊ុតធី និងលោក រតនៈ តំណាងក្រុមហ៊ុនឈើអាកាស្យា ក៏បានចេញមុខសន្យាថា ពួកខ្លួននឹងសហការគ្នាចុះពិនិត្យជួសជុលកែលម្អផ្លូវដែលខូចនេះឡើងវិញដោយមិនជំទាស់អ្វីឡើយ។ តំណាងក្រុមហ៊ុនទាំង២ ក៏សុំការអធ្យាស្រ័យដល់ប្រជាពលរដ្ឋ និងអ្នកទេសចរដែលមានការលំបាកធ្វើដំណើរលើកំណាត់ផ្លូវលំមួយនេះអំឡុងរដូវវស្សា។

បើតាមតំណាងក្រុមហ៊ុន២ខាងលើ អះអាងថា យ៉ាងយូរ១០ថ្ងៃ បើគ្មានភ្លៀងពួកគាត់នឹងជួសជុលកំណាត់ផ្លូវនេះអោយរួចរាល់ ដោយផ្តើមចេញពីផ្លូវជាតិលេខ៤៨ មកមូលដ្ឋានឃុំជីផាត។

ដោយឡែកលោក ផល សុផាន់ណា អភិបាលរងស្រុកថ្មបាំង ក៏ដូចជាលោក ម៉ឹង សុភា មេឃុំជីផាត បានសម្តែងនូវការអរគុណចំពោះតំណាងក្រុមហ៊ុនទាំង២ខាងលើដែលមានទំនួលខុសត្រូវខ្ពស់លើការជួសជុលស្ថាបនាផ្លូវក្រួសក្រហមប្រវែងជាង១៧គីឡូម៉ែត្រអោយល្អប្រសើរឡើងវិញ ដើម្បីងាយស្រួលដឹកជញ្ជូនទិន្នផលកសិកម្មទៅកាន់ទីផ្សារ និងទាក់ទាញភ្ញៀវទេសចរមកលេងកម្សាន្តតាមរមណីយដ្ឋានធម្មជាតិសំខាន់ៗដែលកំពុងមាន។

លោកអភិបាលរងស្រុកថ្មបាំង យល់ថា នេះជាការល្អប្រសើរណាស់ដែលក្រុមហ៊ុនទាំង២មិនសាចទឹកដាក់គ្នាព្រោះតែការធ្វើឱ្យផ្លូវខូចខាត ដោយលោកជឿជាក់ថា តំណាងក្រុមហ៊ុននឹងពន្លឿនការជួសជុលអោយបានឆាប់រហ័សមុនរដូវបុណ្យភ្ជុំបិណ្ឌមកដល់នាពេលឆាប់ៗខាងមុខ។

មន្ទីរអភិវឌ្ឍន៍ជនបទខេត្តកោះកុង បានដាក់បញ្ចូលផ្លូវគ្រួសក្រហមនេះទៅក្នុងគំរោងនិរន្តភាពតំបន់ទេសភាព និងទេសចរណ៍ធម្មជាតិកម្ពុជា (CSLEP) ដៃគួរអភិវឌ្ឍន៍របស់ក្រសួងអភិវឌ្ឍន៍ ជនបទ។ គំរោង (CSLEP) នេះនឹងចាប់ផ្តើមធ្វើការសាងសង់ជាប្រភេទផ្លូវក្រាលកៅស៊ូពីរជាន់ (DBST) នៅខែវិច្ឆិកា ឆ្នាំ២០២៤៕

អត្ថបទ៖ សិរីវឌ្ឍនៈ