គ្រាប់ពូជពោតក្លែងក្លាយជិត ៨ តោន ដកហូតពី​ទីតាំងស្តុកទុក យកទៅ​​ដុត​បំផ្លាញចោល

គ្រាប់ពូជពោតក្លែងក្លាយ និងល្មើសកម្មសិទ្ធិបញ្ញា ត្រូវបានកម្លាំងការិយាល័យប្រឆាំងបទល្មើសសេដ្ឋកិច្ច នៃស្នងការដ្ឋាននគរបាលខេត្តបាត់ដំបង ធ្វើការចុះបង្ក្រាបនិងដករហូតពីទីតាំងចំនួន ៤ កន្លែង ដែលកំពុងស្តុកទុក និង​ធ្វើចរាចរណ៍នៅតាមបណ្ដាស្រុកមួយចំនួនជាប់ព្រំដែនថៃ។

បើតាមការបញ្ជាក់ពីលោក យី យក់សាន នាយការិយាល័យនគរបាលប្រឆាំងបទមើលសេដ្ឋកិច្ចបានឱ្យដឹងថា ក្រោយពីទទួលបានពាក្យបណ្ដឹងដែលមានមេធាវីមកពីភ្នំពេញ គឺក្រុមហ៊ុនដើមមានឈ្មោះ សាន់ស្មាយអ៊ិនផតអុិចផត សុីអូ អិលធីឌី ដែលបានប្ដឹងទៅលើទីតាំងចំនួន ៤ ដែលស្ថិតនៅតាមបណ្ដាស្រុកជាប់ខ្សែបន្ទាត់ព្រំដែនកម្ពុជា ថៃ ដែលកំពុងស្តុក នឹងធ្វើចរាចរណ៍នូវគ្រាប់ពូជពោតក្លែងក្លាយទាំងនេះ។

បន្ទាប់ពីសុំគោលការណ៍ពីលោក កែវ សុជាតិ ព្រះរាជអាជ្ញាអមសាលាដំបូងខេត្តបាត់ដំបង និងមានការអនុញ្ញាតពីលោកឧត្តមសេនីយ៍ទោ ដាញ់ អេងប៊ុនចាន់ ស្នងការនៃស្នងការដ្ឋាននគរបាលខេត្តរួចមក ប្រធានការិយាល័យប្រឆាំងបទល្មើសសេដ្ឋកិច្ច បានដឹកនាំកម្លាំងចុះធ្វើការបង្ក្រាបកាលពីអំឡុងចុងខែតុលាកន្លងទៅ និងបានយកមករក្សាទុក នៅស្នងការខេត្តដើម្បីអនុវត្តតាមផ្លូវច្បាប់។

ក្រោយពីមានការឯកភាពពីលោកព្រះរាជអាជ្ញារួចមក គ្រាប់ពោតដែលដកហូតបានចំនួន ៧៧១ ការ៉ុង ដែលក្នុងមួយការ៉ុងមានទម្ងន់ ១០ គីឡូក្រាម ត្រូវបានដុតបំផ្លាញចោលនៅទីលានចាក់សំរាម ស្ថិតក្នុងភូមិអូរមុន្នី ឃុំអន្លង់វិល ស្រុកសង្កែ ខេត្តបាត់ដំបង ដោយមានការចូលរួមត្រួតពិនិត្យពីលោកព្រះរាជអាជ្ញារង និងមេធាវីរបស់ក្រុមហ៊ុនដើមផងដែរ។ ដោយឡែកសម្រាប់ទីតាំងដែលស្តុកគ្រាប់ពូជពោលក្លែងក្លាយ និងធ្វើការចែកចាយដែលល្មើសនិងកម្មសិទ្ធិបញ្ញា ទាំង ៤ ទីតាំង គេមិនទាន់ដឹងថាតើផ្លូវច្បាប់នឹងសម្រេចបែបណានោះឡើយ៕

អត្ថបទ៖ សោ និយមរ័ត្ន