នគរបាលជំនាញព្រមានចាត់វិធានការលើម្ចាស់គណនីហ្វេសប៊ុកមួយ ដែលតែងបង្ហោះព័ត៌មានក្លែងក្លាយសុំជំនួយដើម្បីផលប្រយោជន៍ផ្ទាល់ខ្លួន

នាយកដ្ឋាននគរបាលទេសចរណ៍ នៅថ្ងៃទី២៥ ខែឧសភា ឆ្នាំ២០២៥ បានព្រមានចាត់វិធានការផ្លូវច្បាប់លើម្ចាស់គណនីយហ្វេសប៊ុកឈ្មោះ Chhay Phallin -ឆាយ ផល្លីន ដែលតែងយករូបភាពកុមាររងគ្រោះដែលជារូបភាពចាស់ៗ ស្វែងរកជំនួយ ដើម្បីផលប្រយោជន៍ផ្ទាល់ខ្លួន។ ជាមួយគ្នានេះ នាយកដ្ឋាននគរបាលទេសចរណ៍ ក៏តម្រូវឲ្យម្ចាស់គណនីខាងលើ ត្រូវបញ្ឈប់សកម្មភាពជាបន្ទាន់ និងចូលខ្លួនមកបំភ្លឺនៅនាយកដ្ឋាននគរបាលទេសចរណ៍ ជុំវិញករណីឆបោកខាងលើនេះផងដែរ។

តាមការបញ្ជាក់ពីនគរបាលនៃនាយកដ្ឋាននគរបាលទរសចរណ៍ បុគ្គលដែលមានគណនី ហ្វេសប៊ុកឈ្មោះ Chhay Phallin -ឆាយ ផល្លីន និងម្ចាស់គណនេយ្យធនាគារ អេសុីលីដា ឈ្មោះ LONG LOEURN ព្រមទាំងគណនេយ្យ អេប៊ីអេ ឈ្មោះ Long BRANG តែងតែបង្ហោះរូបភាពកុមាររងគ្រោះដោយគ្រោះថ្នាក់ចរាចរណ៍ និងជំងឺផ្សេងៗ ភ្ជាប់ជាមួយ QR Code លើបណ្តាញសង្គម ក្រោមរូបភាពធ្វើជំនួយមនុស្សធម៌ផ្សេងៗ ដែលជាព័ត៌មានក្លែងក្លាយដើម្បីបោកប្រាស់ប្រជាពលរដ្ឋអោយជួយបាញ់នូវថវិកា។

នគរបាលជំនាញ តម្រូវឲ្យម្ចាស់គណនីយឈ្មោះ Chhay Phallin -ឆាយ ផល្លីន ត្រូវបញ្ឈប់ជាបន្ទាន់រាល់សកម្មភាព យករូបចាស់ៗ របស់កុមារគ្រោះថ្នាក់ ក្នុងបំណងស្វែងរកជំនួយក្លែងក្លាយ ឆបោកប្រជាពលរដ្ឋជាច្រេីន និងធ្វេីអោយប៉ះពាល់ដល់កិត្តិយសក្រុមគ្រួសារជនរងគ្រោះ។ នាយដ្ឋាននគរបាលទេសចរណ៍ សង្កត់ធ្ងន់ថា ប្រសិនបើបុគ្គលខាងលើ មិនព្រមបញ្ឈប់តាមការជូនដំណឹងនេះទេ កម្លាំងជំនាញនឹងអនុវត្តតាមវិធានការច្បាប់៕

អត្ថបទ៖ រដ្ឋា