ភ្លៀងធ្លាក់ជាង២ម៉ោងម្សិលមិញ ផ្លូវមួយចំនួនក្នុងខណ្ឌទួលគោកត្រូវជន់លិច

កាលពីសៀលថ្ងៃទី១៣ ខែកក្កដា ឆ្នាំ២០២៥ នៅក្នុងរាជធានីភ្នំពេញ មានភ្លៀងធ្លាក់រហូតដល់ជាង២ម៉ោង ធ្វើឲ្យផ្លូវនៅតាមមូលដ្ឋានមួយចំនួនមានការជន់លិចដោយជំនន់ទឹកភ្លៀង​ តែទោះយ៉ាងណាអាជ្ញាធរមូលដ្ឋានបានចុះពិនិត្យភ្លាមៗ និងធ្វើការប្រមូលសំរាមនៅតាមមាត់លូ ដើម្បីសម្រួលចរន្ដទឹកឲ្យហូរបានលឿន។

លោក ជា ពិសី អភិបាលនៃគណៈអភិបាលខណ្ឌទួលគោក ក្នុងអំឡុងពេលមេឃកំពូងធ្លាក់ភ្លៀង បានដឹកនាំកម្លាំងគណៈបញ្ជាការឯកភាពខណ្ឌ ចុះពិនិត្យ និងធើ្វការប្រមូលសំរាមចេញពីមាត់លូនៅចំណុចស្តុបកោសដូង ស្ថិតក្នុងសង្កាត់បឹងសាឡាង និងសង្កាត់ផ្សារដើមគរ ដើម្បីអោយទឹកហូរបានលឿន ដែលចំណុចនេះតែងតែជន់លិចខ្លាំងនៅពេលមានភ្លៀងធ្លាក់មកម្ដងៗ។

ជាមួយគ្នាផងដែរអាជ្ញាធរខណ្ឌបានសំណូមពរដល់ប្រជាពលរដ្ឋដែលរស់នៅក្នុងមូលដ្ឋាន មេត្តាទុកដាក់សំរាមឲ្យបានត្រឹមត្រូវ និងយកសំរាមមកចោលតាមម៉ោងកំណត់របស់ក្រុមហ៊ុនប្រមូលសំរាមនីមួយៗ ជៀសវាងការចោលសំរាមទុកដាក់គ្មានសណ្ដាប់ធ្នាប់ ជាហេតុធ្វើអោយបាត់បង់សោភ័ណក្នុងមូលដ្ឋាន ជាពិសេសនៅពេលមានភ្លៀងធ្លាក់ធ្វើឲ្យសំរាមហូរចូលមាត់លូស្ទះចរន្ដទឹក៕

អត្ថបទ៖ ម៉េង