កីឡា

អតីតជើងឯក US Open លោក Michael Campbell មកដល់កម្ពុជាភ្លាម ចង់ទៅលេងអង្គរវត្តតែម្តង

បានផុស

៧ ខែ មុន

នៅ

ថ្ងៃពុធ ១៩ វិច្ឆិកា ២០២៥

ដោយ

លោក Michael Campbell ដែលជាកីឡាករវាយកូនហ្គោលដ៏ល្បីល្បាញមួយរូបនៅក្នុងពិភពលោកបានស្គាល់ប្រាសាទអង្គរវត្តតាំងពីតូច ដូច្នេះនៅពេលលោកបានមកដល់ប្រទេសកម្ពុជា គឺតាំងចិត្តទៅលេងប្រាសាទអង្គរវត្តតែម្តង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក Michael Campbell ដែលបានប្រកួតឈ្នះកំពូលកីឡាករលើលោក Tiger Woods ដើម្បីគ្រងជើងឯក US Open កាលពីឆ្នាំ ២០០៥ ដែលជាពានរង្វាន់កីឡាវាយកូនហ្គោលធំបំផុតក្នុងលោកបានកំពុងស្ថិតនៅប្រទេសកម្ពុជានៅសប្តាហ៍ទី៣ នៃខែវិច្ឆិកា ដើម្បីចូលរួមប្រកួតជើងឯក វឌ្ឍនៈលេជេនស៍ ឆ្នាំ ២០២៥ នៅប្រទេសកម្ពុជា។

ក្នុងបទសម្ភាស នាព្រឹកថ្ងៃទី១៩ ខែវិច្ឆិកា ឆ្នាំ ២០២៥ លោក Michael បានលើកឡើងថា លោកពិតជារីករាយដែលបានមកដល់ប្រទេសកម្ពុជាជាលើកដំបូង។ លោកពេញចិត្តទីលានកូនហ្គោលរបស់កម្ពុជាយ៉ាងខ្លាំង។ ប្រជាជនកម្ពុជាពិតជារួសរាយរាក់ទាក់ បដិសណ្ឋារកិច្ចយ៉ាងល្អ។

លោកនិយាយថា ៖«ខ្ញុំចូលចិត្តអាហារនៅទីនេះ ហើយខ្ញុំនឹងទៅលេងប្រាសាទអង្គរវត្តនៅថ្ងៃចន្ទ។ ខ្ញុំពិតជារំភើបចំពោះអច្ឆរិយៈវត្ថុនៅក្នុងពិភពលោក ប៉ុន្តែចំពោះព្រឹត្តិការណ៍ Legends Tour ពួកយើងពិតជារីករាយណាស់។ យើងពិតជាត្រេកអរដែលបានរៀបចំនៅទីនេះ។ ការងាររបស់យើងជាផ្នែកមួយជួយកីឡានៅកម្ពុជា។ ខ្ញុំដឹងថា ជាកីឡាហាក់ដូចថ្មីសម្រាប់ប្រទេសកម្ពុជា ដូច្នេះខ្ញុំសង្ឃឹមថា តាមរយៈព្រឹត្តិការណ៍ Legends Tour និងកីឡាករផ្សេងៗទៀតជួយជំរុញកីឡាវាយកូនហ្គោលឲ្យរីកចម្រើន។ ហេតុនេះហើយបានជាខ្ញុំមកទីនេះ»។

នៅពេលសួរថា តើលោកបានស្គាល់ប្រាសាទអង្គរវត្តតាំងពីពេលណា? បុរសជនជាតិនូវែលហ្សេឡង់អាយុ ៥៦ ឆ្នាំ បានឆ្លើយថា ៖«ខ្ញុំបានឮ បានដឹងពីប្រាសាទអង្គរវត្តតាំងពីតូច តាមរយៈមើលទូរទស្សន៍។ ខ្ញុំបានអានអត្ថបទអំពីប្រាសាទអង្គរវត្ត។ ខ្ញុំពិតជាចង់ទៅឃើញប្រាសាទអង្គរវត្តផ្ទាល់ភ្នែក សូម្បីតែកីឡាករផ្សេងៗក៏សុទ្ធតែចង់ទៅមើលប្រាសាទអង្គរវត្ត។ ខ្ញុំគិតថា វាគួរឲ្យចាប់អារម្មណ៍ខ្លាំងអំពីវប្បធម៌។ នៅពេលយើងធ្វើដំណើរ យើងធ្វើដំណើរជុំវិញពិភពលោក តំបន់អាស៊ីជាផ្នែកខុសគេមួយដូចជាកោះ Mauritius យើងធ្លាប់បានទៅតំបន់អឺរ៉ុប ដូច្នេះមកទីនេះជាលើកដំបូង និងមានព្រឹត្តិការណ៍ប្រកួតកីឡាវាយកូនហ្គោល។ ពួកយើងពិតជាសប្បាយរីករាយ។ យើងរីករាយមកទីនេះ ហើយសង្ឃឹមថា កីឡាវាយកូនហ្គោលរីកចម្រើន»។

លោកបានបន្ថែមថា ក្នុងនាមជាកីឡាករធ្លាប់ឈ្នះជើងឯក U.S Open កាលឆ្នាំ ២០០៥ វាធ្វើឲ្យលោកទទួលខុសត្រូវកាន់តែធំដើម្បីជំរុញកីឡានេះ។ ដូច្នេះពេលនេះជាពេលសម្រាប់ជួយដល់ក្មេងជំនាន់ក្រោយឲ្យមានការប្រកួតឈ្នះពានរង្វាន់ផ្សេងៗ៕