កីឡា

ការប្រកួត«វឌ្ឍនៈលេជេនស៍» បើកជាផ្លូវការក្រោមវត្តមានឥស្សរជន និងកីឡាករល្បីៗលំដាប់ពិភពលោក

បានផុស

៧ ខែ មុន

នៅ

ថ្ងៃពុធ ១៩ វិច្ឆិកា ២០២៥

ដោយ

ការប្រកួតកីឡាវាយកូនហ្គោលអន្តរជាតិធំបំផុតលើកដំបូងនៅកម្ពុជាគឺ «ពានរង្វាន់ វឌ្ឍនៈលេជេនស៍»ត្រូវបានបើកជាផ្លូវការនៅព្រឹកថ្ងៃទី១៩ ខែវិច្ឆិកា ឆ្នាំ ២០២៥ នៅទីលាន វឌ្ឍនៈ ហ្គោល រីហ្សត ដែលមានការអញ្ជើញចូលរួមពីសម្តេច ទ្រង់ឯកឧត្តម អ្នកឧកញ៉ា លោកឧកញ៉ា កីឡាករល្បីៗលំដាប់ពិភពលោក និងភ្ញៀវកិត្តិយសយ៉ាងច្រើនកុះករ។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ពិធីបើក្រោមវត្តមានដ៏ខ្ពង់ខ្ពស់របស់សម្តេចអគ្គមហាពញាចក្រី ហេង សំរិន ប្រធានកិត្តិយសឧត្តមក្រុមប្រឹក្សាព្រះមហាក្សត្រ, សម្តេចក្រឡាហោម ស ខេង ឧត្តមប្រឹក្សាផ្ទាល់ ព្រះមហាក្សត្រ, ឯកឧត្តម កែ គឹមយ៉ាន ឧត្តមប្រឹក្សាផ្ទាល់ព្រះមហាក្សត្រ, លោក ថោង ខុន ទេសរដ្ឋមន្ត្រី និងជាប្រធានគណៈកម្មាធិការជាតិអូឡាំពិកកម្ពុជា តំណាងអង្គទូត អ្នកឧកញ៉ា លោកឧកញ៉ា ដែលជាសហស្ថាបនិកវឌ្ឍនៈ អ្នកឧកញ៉ាជាអគ្គនាយក ឯកឧត្តម លោកជំទាវ និងភ្ញៀវកិត្តិយសជាច្រើនរូបទៀត។

ជាពិសេសទៀតនោះ កីឡាករវាយកូនហ្គោលល្បីៗលំដាប់ពិភពលោកប្រមាណ៦០នាក់មកពីទូទាំងពិភពលោកបានចូលរួមការប្រកួត។ កីឡាករល្បីៗទាំងនោះមានកីឡាករជនជាតិអង់គ្លេស ៨ នាក់ និងកីឡាករមកពីប្រទេស ស្កុតឡេន វែលស៍ ប្រេស៊ីល អូស្ត្រាលី ស៊ុយអែត អាហ្វ្រិកខាងត្បូង នូវែលហ្សេឡង់ អាល្លឺម៉ង់ ឥណ្ឌា អៀរឡង់ ហូឡង់ និង អ៉ីតាលី ជាដើម។

ក្នុងនោះមានលោក Michael Campbell ដែលជាម្ចាស់ជើងឯក U.S Open កាលពីឆ្នាំ ២០០៥ ក៏បានចូលរួមវាយកូនហ្គោលដើម្បីបើកព្រឹត្តិការណ៍ប្រកួតដែរ។

ថ្លែងក្នុងពិធីបើក អ្នកឧកញ៉ា ឈុន លាង សហស្ថាបនិកក្រុមហ៊ុនវឌ្ឍនៈគ្រុប បានចាត់ទុកព្រឹត្តិការណ៍ការប្រកួតកីឡាវាយកូនហ្គោលអន្តរជាតិដ៏ធំបំផុតមិនធ្លាប់មាននៅកម្ពុជានេះប្រៀបដូចជាប្រសិទ្ធពរជ័យ និងអបអរសាទរដល់កិច្ចព្រៀមព្រងសន្តិភាពរវាងកម្ពុជា និង ថៃ។

តាមរយៈការធ្វើជាម្ចាស់ផ្ទះនៃកាប្រកួតជើងឯកលំដាប់ពិភពលោក កម្ពុជាកំពុងប្រកាសប្រាប់ពិភពលោកថា៖ «យើងជាទិសដៅសកលដ៏លេចធ្លោមួយ»។

ការប្រកួតនេះជាការបំផុសគំនិតសម្រាប់យុវជនជំនាន់ក្រោយ និងជាឱកាសដ៏កម្រមួយសម្រាប់យុវជនកម្ពុជាបានឃើញភាពលេចធ្លោកម្រិតពិភពលោកនៅលើទឹកដីរបស់ខ្លួន។ នេះជាឱកាសសម្រាប់បដិសណ្ឋារកិច្ច និងវប្បធម៌—ដែលតំណាងដោយក្រុមហ៊ុន ទីលានវាយកូនហ្គោល វឌ្ឍនៈហ្គោលរីហ្សត ដែលបញ្ចូលកេរដំណែលវប្បធម៌ខ្មែរ—ត្រូវបានផ្សព្វផ្សាយជាអន្តរជាតិ ពង្រឹងកេរ្តិ៍ឈ្មោះកម្ពុជាសម្រាប់ការរួបរួម និងការរីកចម្រើន។ ព្រឹត្តិការណ៍ជើងឯកនេះកំពុងបើកទំព័រថ្មីសម្រាប់ទេសចរណ៍ និងកីឡាកម្ពុជា ព្រមទាំងពង្រឹងចំណងមិត្តភាពអន្តរជាតិជាលំដាប់។

ការរៀបចំព្រឹត្តិការណ៍នេះនៅ ទីលានវាយកូនហ្គោល វឌ្ឍនៈ ហ្គោល រីហ្សត គឺជាភស្តុតាងដែលថាកម្ពុជាមានលទ្ធភាពធ្វើជាម្ចាស់ផ្ទះព្រឹត្តិការណ៍កីឡាអន្តរជាតិដ៏ធំ និងបង្ហាញពីភាពរីកចម្រើនរបស់ខ្លួនជាទិសដៅទេសចរណ៍ និងកីឡាដ៏ប្រណីត។

ព្រឹត្តិការណ៍កីឡាវាយកូនហ្គោលអន្តរជាតិដ៏ធំលើកដំបូងនេះមិនត្រឹមតែផ្សព្វផ្សាយក្នុងប្រទេសកម្ពុជាប៉ុណ្ណោះទេ ប៉ុន្តែនឹងផ្សាយទៅកាន់ទ្វីបអាស៊ី អឺរ៉ុប សហរដ្ឋអាមេរិក និងបណ្តាប្រទេសផ្សេងៗដើម្បីឲ្យឃើញពីសក្តានុពលកម្ពុជា។ ប្រព័ន្ធផ្សព្វផ្សាយធំៗនៅលើពិភពលោកជាច្រើននឹងផ្សាយបន្តពីកម្ពុជាមានដូចជា Sky Sports, GOLF, CANEL+, VIASAT SPORT និង Super Sport ជាដើម។

ជើងឯកវឌ្ឍនៈឡេជិន នឹងរៀបចំនៅលើទីលានកីឡាវាយកូនហ្គោល វឌ្ឍនៈ ហ្គោល រីហ្សត ចាប់ពីថ្ងៃទី១៩ ដល់ ថ្ងៃទី២៣ ខែវិច្ឆិកា ឆ្នាំ ២០២៥។ នៅថ្ងៃចន្ទ អង្គារ៍ ពុធ ជាពេលវេលាអញ្ជើញមកដល់ និងការហ្វឹកហាត់របស់កីឡាករ។ ថ្ងៃព្រហស្បតិ៍ ការប្រកួតប្រូ-អែម ផ្លូវការរវាងភ្ញៀវ និងកីឡាករអាជីព។ ថ្ងៃសុក្រ ការប្រកួតជុំទី១ សម្រាប់តែកីឡាករអាជីព និងថ្ងៃសៅរការប្រកួតជុំទី២ សម្រាប់តែកីឡាករអាជីព ខណៈថ្ងៃអាទិត្យ ការប្រកួតជុំផ្តាច់ព្រ័ត្រ៕