កាន់​តែ​អាក្រក់! Real Madrid ជួប Man City ជើងទី ១ អវត្តមានកីឡាករសំខាន់ ៧ នាក់

ក្រុមអធិរាជស Real Madrid នឹងបាត់បង់កីឡាករសំខាន់ៗដល់ទៅ ៧ នាក់ សម្រាប់ការប្រកួតជើងទី ១ វគ្គ ១៦ ក្រុមចុងក្រោយពានរង្វាន់ Champions League ទល់ក្រុម Manchester City នៅថ្ងៃទី ១២ ខែ មីនា ឆាប់ៗនេះ។

យោងតាមសារព័ត៌មាន ESPN បានឱ្យដឹង ថា ក្រុម Real Madrid មានកីឡាករ ៧ នាក់កំពុងជួបបញ្ហារបួស រួមមានកីឡាករ Kylian Mbappe, Jude Bellingham, Militao, David Alaba, Ceballos, Rodrygo និង Álvaro Carreras។ កីឡាករទាំង ៧ នាក់នេះ នឹងមិនអាចបង្ហាញខ្លួនបានទេ សម្រាប់ការប្រកួតជើងទី ១ ទល់ Man City។

ក្រឡេកទៅមើលក្រុមភ្ញៀវ Man City វិញ ក៏មានកីឡាករ ៣ នាក់មានបញ្ហារបួសដែរ ប៉ុន្តែមិនច្រើនដូច Real Madrid នោះទេ។ កីឡាករ ២ នាក់ ត្រូវបានរំពឹង ថា នឹងមិនអាចបង្ហាញខ្លួនបានរួមមានខ្សែការពារ Josko Gvardiol និងខ្សែបម្រើ Mateo Kovacic។ ចំណែកខ្សែការពារវ័យក្មេង Max Alleyne កំពុងស្ថិតក្នុងការសង្ស័យ។

គួរបញ្ជាក់ ថា ការប្រកួតជើងទី ១ វគ្គ ១៦ ក្រុមពាន UCL ក្រុម Real Madrid នឹងបើកទ្វាកីឡដ្ឋាន Santiago Bernabeu ទទួលក្រុម Man City នៅយប់រំលងអាធ្រាត្រឈានចូលថ្ងៃ ព្រហស្បតិ៍ ទី ១២ ខែ មីនា ឆ្នាំ ២០២៦។ ដោយឡែកការប្រកួតជើងទី ២ នឹងធ្វើនៅកីឡដ្ឋាន Etihad ក្នុងប្រទេស អង់គ្លេស វិញម្តង នៅយប់រំលងអាធ្រាត្រឈានចូលថ្ងៃ ពុធ ទី ១៨ ខែ មីនា ឆ្នាំ ២០២៦៕

ប្រែសម្រួល៖ សេម កុសល
ប្រភព៖ ESPN