កីឡា

មកដឹងលក្ខខណ្ឌក្រុមទាំង ៨ អាចមកលេងតេជោលីគ និងរូបមន្តប្រកួតពីមួយជុំទៅមួយជុំ

បានផុស

២ ខែ មុន

នៅ

ថ្ងៃពុធ ១៣ ឧសភា ២០២៦

ដោយ

ការប្រកួតតេជោលីគ រដូវកាលទី៣ កាន់តែខិតជិតមកដល់ហើយនៅថ្ងៃទី១៦ ខែឧសភា ដល់ ៥ កញ្ញា ២០២៦ នេះហើយ។ យ៉ាងណាអ្នកគាំទ្រមួយចំនួនអាចនឹងមិនទាន់ដឹងពីលក្ខខណ្ឌអ្វីដែលក្រុមខ្លាំងទាំង ៨ រួមមាន៖ ក្លឹបបាល់ទះបញ្ជាការដ្ឋានអង្គរក្ស សមាគមកីឡាបាល់ទះវិសាខា សមាគមបាល់ទះក្រសួងមហាផ្ទៃ ក្លឹបបាល់ទះស្នងការដ្ឋាន ន.ប ខេត្តស្វាយរៀង ក្លឹបបាល់ទះស្នងការដ្ឋាន ន.ប រាជធានីភ្នំពេញ ក្លឹបបាល់ទះកងពលធំអន្តរាគមន៍លេខ៣ ក្លឹបបាល់ទះស្នងការដ្ឋាន ន.ប ខេត្តកោះកុង ក្លឹបបាល់ទះស្នងការដ្ឋាន ន.ប ខេត្តព្រះសីហនុ ត្រូវបានចូលលេងពានរង្វាន់មួយនេះ និងរូបមន្តនៃការប្រកួតពីជុំទី១ ដល់ វគ្គផ្ដាច់ព្រ័ត្រតែម្ដង។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក អាំង សិរីពិសិដ្ឋ

លោក អាំង សិរីពិសិដ្ឋ បានឲ្យដឹងថា ជាទូទៅតេជោលីគគឺមាន ៨ក្រុមចូលរួមប្រកួតប្រជែង។ ២ក្រុមដែលជាប់ចំណាត់ថ្នាក់ចុងក្រោយគេបង្អស់នឹងត្រូវកាត់ចេញពីលីគនៅរដូវកាលក្រោយ។ ចំពោះ ២ក្រុមដែលនឹងត្រូវជ្រើសរើសឡើងមកបំពេញនៅតេជោលីគរដូវកាលថ្មីនោះគឺជាក្រុមដែលមានចំណាត់ថ្នាក់ល្អជាងគេនៃពានរង្វាន់សម្ដេចក្រឡាហោម។ ដូច្នេះតេជោលីគ រដូវកាលទី៣ នេះមានក្រុមស្នងការ ន.ប ខេត្តកោះកុង (ជើងឯករងពានក្រឡាហោម លើកទី៤ ឆ្នាំ២០២៦) និងស្នងការ ន.ប ខេត្តព្រះសីហនុ (ជាប់ក្នុងវគ្គ ៨ក្រុមពានសម្ដេចក្រឡាហោម) បានឡើងមកលេងជំនួសក្រុមចាស់ ស្នងការ ន.ប ខេត្តតាកែវ និងស្នងការ ន.ប ខេត្តពោធី៍សាត់ ដែលធ្លាក់ចេញ។

ក្រុមទាំង៨ លេងនៅរដូវកាល ២០២៦

ចំពោះរូបមន្តប្រកួតវិញ៖

ជុំទី១ ក្រុមទាំង ៨ នឹងត្រូវប្រកួតវិលជុំសន្សំពិន្ទុចំនួន ៧ប្រកួត។ បន្ទាប់មកក្រុមជាប់ចំណាត់ថ្នាក់លេខ១ ដល់លេខ៦ នឹងបានឡើងទៅប្រកួតជុំទី២ បន្តទៀត។ (ជើងឯកជុំទី១ នៅឆ្នាំនេះបានប្រាក់លើកទឹកចិត្តបន្ថែម ៤លានរៀល)។ បញ្ចប់ជុំទី១ នេះក្រុមឡើងទៅទាំង ៦អាចដោះដូរកីឡាករចំនួន ៦នាក់ទាំងបរទេស និងកីឡាករខ្មែរឡើងវិញបាន។

ជុំទី២ ក្រុមទាំង៦ ដែលឡើងមកនេះគឺត្រូវប្រកួតវិលជុំសន្សំពិន្ទុជាថ្មីទៀតដោយត្រូវបូកពី ០ពិន្ទុឡើងមកវិញ។ ក្រុមដែលជាប់ចំណាត់ថ្នាក់លេខ១ ដល់លេខ៤ ត្រូវបានជាប់ឡើងទៅវគ្គពាក់កណ្ដាលផ្ដាច់ព្រ័ត្របន្តទៀត។ (ក្រុមជាប់ចំណាត់ថ្នាក់លេខ១ នៅជុំទី២ នេះក៏បានទឹកប្រាក់លើកទឹកចិត្តបន្ថែម ៤លានរៀលទៀត)។

ជុំទី៣ វគ្គពាក់កណ្ដាលផ្ដាច់ព្រ័ត្រមាន ៤ក្រុមដែលឡើងមកនេះមិនមានការចាប់ឆ្នោតនោះទេ។ ពោលក្រុមជាប់ចំណាត់ថ្នាក់លេខ១ ត្រូវប៉ះក្រុមចំណាក់លេខ៤ រីឯក្រុមជាប់ចំណាត់ថ្នាក់លេខ២ ត្រូវប៉ះក្រុមជាប់ចំណាត់ថ្នាក់លេខ៣ ដើម្បីរកជើងខ្លាំង ២ក្រុងឡើងទៅវគ្គផ្ដាច់ព្រ័ត្រ។

ជុំទី៤ ជាជុំចុងក្រោយវគ្គផ្ដាច់ព្រ័ត្រគឺក្នុងចំណោម ៤ក្រុមដែលឈ្នះវគ្គពាក់កណ្ដាលផ្ដាច់ព្រ័ត្រនឹងត្រូវប្រកួតដណ្ដើមយកពានតែម្ដងនៅថ្ងៃទី៥ ខែកញ្ញា ឆ្នាំ២០២៦ នៅទីលានវិមាន នៃពហុកីឡដ្ឋានជាតិ។

កុំភ្លេចតាមដានទាំងអស់គ្នាថាក្រុមខ្លាំងមួយណានឹងឈ្នះតេជោលីគ រដូវកាលទី៣ ឆ្នាំ២០២៦ នេះ។ ក្លឹបបាល់ទះបញ្ជាការដ្ឋានអង្គរក្ស អាចនាំយកពានតេជោលីគនេះដាច់ដាក់ចូលក្នុងក្លឹបរបស់ខ្លួនបានដែរ ឬទេ ឆ្នាំ២០២៦ ៕

អត្ថបទដោយ៖ នួន ស៊ីណា