កីឡា

ស្នងការស្វាយរៀង ប៉ះ បញ្ជាការដ្ឋានអង្គរក្ស ប្រៀបដូចកាត់ក្តីក្រុមលេខ ២ ក្នុងតេជោលីគ ជុំទី២

បានផុស

២ នាទី មុន

នៅ

ថ្ងៃសុក្រ ២៦ មិថុនា ២០២៦

ដោយ

ការប្រកួតលីគបាល់ទះកំពូលកម្ពុជា«តេជោលីគ» ជុំទី២ វគ្គវិលជុំសន្សំពិន្ទុ សប្តាហ៍ចុងក្រោយ នឹងធ្វើនៅថ្ងៃសៅរ៍-អាទិត្យ ទី២៧-២៨ ខែមិថុនា ឆ្នាំ ២០២៦ នេះហើយនៅសាលពហុកីឡដ្ឋានជាតិអូឡាំពិក។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្រុមនីមួយៗត្រូវឆ្លងកាត់ ២ ប្រកួតទៀតទើបចប់វគ្គវិលជុំសន្សំពិន្ទុ និងរកឃើញក្រុម ៤ ឡើងទៅកាន់វគ្គពាក់កណ្តាលផ្តាច់ព្រ័ត្រ ហើយក្រុម ២ ត្រូវធ្លាក់ត្រឹមវគ្គនេះ។ ថ្ងៃសៅរ៍ ទី២៧ ខែមិថុនា ស្នងការខេត្តកោះកុង ជួប ក្រសួងមហាផ្ទៃ ម៉ោង ២ រសៀល ហើយ ស្នងការភ្នំពេញ ជួប វិសាខា ម៉ោង ៤ រសៀល និង ស្នងការខេត្តស្វាយរៀង ជួបបញ្ជាការដ្ឋានអង្គរក្ស ម៉ោង ៦ ល្ងាច។

ជំនួបគួរឲ្យចាប់អារម្មណ៍បំផុតសម្រាប់អ្នកគាំទ្រគឺរវាង ស្នងការខេត្តស្វាយរៀង និង បញ្ជាការដ្ឋានអង្គរក្ស។ គូនេះប្រៀបដូចជាការប្រកួតកាត់សេចក្តីចំណាត់ថ្នាក់លេខ ២ និង លេខ ៣។ បើក្រុមណាឈ្នះមានភាគរយខ្ពស់ស្ថិតនៅលេខ ២ និងក្រុមចាញ់ ស្ថិតនៅលេខ៣ ខណៈការប្រកួតថ្ងៃអាទិត្យ មិនសូវលំបាកខ្លាំងសម្រាប់ក្រុមទាំងពីរឡើយគឺ ស្នងការខេត្តស្វាយរៀង ប៉ះ ស្នងការរាជធានីភ្នំពេញ ហើយ បញ្ជាការដ្ឋានអង្គរក្ស ប៉ះ ក្រសួងមហាផ្ទៃ។

ជួបគ្នាកាលពីជុំទី១ បញ្ជាការដ្ឋានអង្គរក្ស បានយកឈ្នះ ស្នងការខេត្តស្វាយរៀង ដោយលទ្ធផល ៣-១។ ថ្ងៃសៅរ៍នេះ ដល់ពេលដែល ស្នងការខេត្តស្វាយរៀង ជម្រះបញ្ជីចាស់ហើយ បន្ទាប់ពីពួកគេមានកីឡាករតួកគី និងកីឡាករ លឹម ចិត្រា នៅជុំទី២។

ចំណែក ក្រុម វិសាខា បានឈ្នះ ៣ ប្រកួត ឈរលេខ ១ កាលពីសប្តាហ៍ទី១ ហើយសប្តាហ៍ទី ២ នេះ ពួកគេមិនសូវធ្វើការធ្ងន់ទេជាមួយ ស្នងការខេត្តកោះកុង ថ្ងៃសៅរ៍ និង ប៉ះ ក្រុមស្នងការរាជធានីភ្នំពេញ ថ្ងៃអាទិត្យ ដូច្នេះពួកគេមានភាគរយខ្ពស់ស្ថិតនៅលេខ ១។

ក្រុមដែលប្រជែងគ្នាមួយទៀតគឺ ស្នងការរាជធានីភ្នំពេញ ដែលមាន ៥ ពិន្ទុ និង ក្រសួងមហាផ្ទៃ មាន ១ ពិន្ទុ ស្ថិតនៅលេខ ៤ និងលេខ ៥។ គូនេះ ៥០-៥០ ក្នុងការឡើងទៅបន្ត។

ក្រសួងមហាផ្ទៃ អាចឡើងវគ្គបន្តបាន លុះត្រាតែឈ្នះ ស្នងការខេត្តកោះកុង និងឈ្នះ ស្នងការខេត្តស្វាយរៀង ហើយ ស្នងការរាជធានីភ្នំពេញ ចាញ់ វិសាខា ឬចាញ់ ឈ្នះ ស្នងការខេត្តស្វាយរៀង។ ផ្ទុយទៅវិញ បើស្នងការរាជធានីភ្នំពេញ ឈ្នះ វិសាខា និងឈ្នះ ស្នងការខេត្តស្វាយរៀង នោះ ក្រសួងមហាផ្ទៃជាអ្នកធ្លាក់។

ការដណ្តើមចំណាត់ថ្នាក់លេខ ១ ដល់ លេខ ៤ នៅវគ្គសន្សំពិន្ទុក្នុងពូលនេះគឺសំខាន់ណាស់ដើម្បីកំណត់ក្រុមប៉ះគ្នានៅវគ្គពាក់កណ្តាលផ្តាច់ព្រ័ត្រ ពីព្រោះ ក្រុមលេខ ១ ត្រូវប៉ះ ក្រុមលេខ ៤ ខណៈ ក្រុមលេខ ២ ប៉ះ ក្រុមលេខ ៣ ដើម្បីរកក្រុមឈ្នះប្រកួតដណ្តើមជើងឯក និងក្រុមចាញ់ប៉ះគ្នាដណ្តើមយកលេខ ៣៕