កីឡា

ប្រមុខកីឡាអូឡាំពិកកម្ពុជា ៖ កីឡាជាតិលើកទី ៣ ជាការផ្ដល់អត្ថប្រយោជន៍ល្អៗ ឆ្ពោះទៅស៊ីហ្គេម-អាស៊ានប៉ារ៉ាហ្គេម ២០២៣

បានផុស

៤ years មុន

នៅ

ថ្ងៃអង្គារ ២២ វិច្ឆិកា ២០២២

ដោយ

លោកបណ្ឌិត ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជា (NOCC) មានប្រសាសន៍ថា ការប្រកួតកីឡាជាតិលើកទី ៣ ជាការផ្តល់អត្ថប្រយោជន៍ និងបទពិសោធល្អៗ ឆ្ពោះទៅស៊ីហ្គេម-អាស៊ានប៉ារ៉ាហ្គេម ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោកបណ្ឌិត ថោង ខុន មានប្រសាសន៍បន្តថា ក្រោយពីទទួលបានការអនុញ្ញាតពីរាជរដ្ឋាភិបាលកម្ពុជា ដោយសហការជាមួយក្រសួងអប់រំ យុវជន និងកីឡា និងសហព័ន្ធកីឡាជាតិ បានរៀបចំការប្រកួតព្រឹត្តិការណ៍កីឡាជាតិ លើកទី ៣ និងកីឡាជាតិប៉ារ៉ាហ្គេម លើកទី ១ ឆ្នាំ ២០២២ នេះ គឺសសរស្ដម្ភទាំង ៣ សហការគ្នាយ៉ាងជិតស្និទ្ធ និងឯកភាពរៀបចំតាមនិយាមស្តង់ដារស៊ីហ្គេម និងអាស៊ានប៉ារ៉ាហ្គេម ដើម្បីផ្ដល់អត្ថប្រយោជន៍ដល់មន្ត្រីបច្ចេកទេស អ្នកស្ម័គ្រចិត្ត កីឡាករ កីឡាការិនី ពិសេសសហព័ន្ធកីឡាជាតិ បានរៀនសូត្រពីការអនុវត្តផ្ទាល់ និងបទពិសោធល្អៗ ក្នុងការដឹកនាំគ្រប់គ្រង ត្រៀមឆ្ពោះទៅធ្វើម្ចាស់ផ្ទះ ស៊ីហ្គេម-អាស៊ានប៉ារ៉ាហ្គេម ២០២៣។

លោកបណ្ឌិត ថោង ខុន អនុប្រធានអចិន្ត្រៃយ៍គណៈកម្មាធិការជាតិ CAMSOC មានប្រសាសន៍ទៀតថា ការរៀបចំព្រឹត្តិការណ៍កីឡាជាតិនេះ ក៏ជាការផ្ដល់ឱកាសដល់មន្ត្រីបច្ចេកទេស បានដោះស្រាយបញ្ហា នៃដំណើរការប្រកួតពហុកីឡា (Sport Games) កម្រិតជាតិ ដែលមានទម្រង់ប្រហាក់ប្រហែលនឹងកម្រិតអន្តរជាតិផងដែរ។

ព្រឹត្តិការណ៍កីឡាជាតិនេះ ត្រូវបានយកចិត្តទុកដាក់ខ្ពស់ ក្នុងការគ្រប់គ្រងពហុកីឡា ការយល់ដឹងពីរូបមន្តស្តង់ដារគ្រប់គ្រងរួមមួយ ដែលផ្ដល់ការយកចិត្តទុកដាក់របស់សសរស្ដម្ភទាំង ៣ គឺជាការចាំបាច់ ក្នុងនោះរួមមាន ៖

១.ការរៀបចំបច្ចេកទេសកីឡា ដែលជាតួនាទីរបស់សហព័ន្ធកីឡាជាតិ។

២.ការរៀបចំបដិសណ្ឋារកិច្ច ប្រតិភូកីឡា ជាមួយនឹងការដឹកជញ្ជូន ហូបចុក ស្នាក់នៅ សន្តិសុខសណ្ដាប់ធ្នាប់ សុខាភិបាល និងពិធីការកីឡា។

៣.ពិធីបើក-បិទ និងពិធីកីឡាផ្សេងៗទៀត។

សសរស្ដម្ភធំៗទាំងបីខាងលើនេះ បានរៀបចំប្រកបដោយស្តង់ដារជំនាញវិជ្ជាជីវៈកីឡាជាមួយនឹងកិច្ចសហប្រតិបត្តិការយ៉ាងល្អពីគ្រប់ភាគីពាក់ព័ន្ធ ដោយប្រទាក់ក្រឡាគ្នាបានល្អនោះ នឹងជំរុញឲ្យទិវាកីឡា ក្លាយជាបុណ្យកីឡាដ៏អធិកអធមប្រកបដោយកិត្តិយស កិត្យានុភាព និងមោទកភាព ក្នុងនាមជាម្ចាស់ផ្ទះ។

«ធម្មនុញ្ញអូឡាំពិក បានលើកឡើងជាគោលការណ៍គ្រឹះឲ្យចលនាអូឡាំពិក សហការជាមួយរដ្ឋអំណាចកីឡា ដោយគោរពស្វ័យភាពគ្នាទៅវិញទៅមក ក្នុងគោលដៅរួម គឺការកសាង និងអភិវឌ្ឍន៍វិស័យកីឡា តាមរយៈសកម្មភាពអប់រំកាយ និងកីឡា ដើម្បីមានការយោគយល់គ្នា សាមគ្គីគ្នា មិត្តភាព និងសុខដុមរមនា ដោយមិនប្រកាន់និន្នាការនយោបាយ សាសនា វណ្ណៈ ឋានៈសង្គមឡើយ»។ នេះជាការគូសបញ្ជាក់បន្ថែមរបស់លោកបណ្ឌិត ថោង ខុន។

លោកបណ្ឌិតលើកឡើងទៀតថា គណៈកម្មាធិការជាតិអូឡាំពិកកម្ពុជា បានត្រៀមគ្រប់លក្ខណៈសម្បត្តិ ចូលរួមសហការជាមួយក្រសួងអប់រំ យុវជន និងកីឡា សហព័ន្ធកីឡាជាតិ និងក្រសួង ស្ថាប័ន អង្គភាព អាជ្ញាធរពាក់ព័ន្ធ ដើម្បីអភិវឌ្ឍន៍កីឡាជាតិ និងចលនាអូឡាំពិកកម្ពុជា ឲ្យឆ្ពោះទៅរកស្តង់ដារកីឡាអន្តរជាតិ ដែលប្រកាន់ភ្ជាប់នូវគោលការណ៍ Fair Play គោលការណ៍កីឡាស្អាតស្អំ និងកីឡាបៃតង។ Clean & Green Sport និងក្រមសីលធម៌វិជ្ជាជីវៈកីឡា ដើម្បីស្វែងរកឧត្ដមភាពកីឡា កម្ពុជាលើឆាកអន្តរជាតិ ពិសេសការរៀបចំការប្រកួតកីឡាជាតិ និងកីឡា SEA Games-ASEAN ឆ្នាំ២០២៣ ឲ្យទទួលបានជោគជ័យផងដែរ៕

អត្ថបទ ៖ មន្នីរ័ត្ន

Related Topics:កីឡាជាតិលើកទី៣

ព័ត៌មានអន្ដរជាតិ២៣ ម៉ោង ago

អស់សង្ឃឹមហើយ ក្នុងការសង្គ្រោះជីវិត បុរស ២នាក់ទៀត ដែលជាប់ក្នុងរូងភ្នំ នៅឡាវ

សេចក្ដីជូនដំណឹង៣ ថ្ងៃ ago

ក្រុមហ៊ុន Danone ប្រារព្ធទិវាកុមារអន្តរជាតិ និងយុទ្ធនាការសុវត្ថិភាពចំណីអាហារដើម្បីបន្តកាត់បន្ថយភាពស្លេកស្លាំងដោយសារកង្វះជាតិដែកក្នុងភាពជាដៃគូជាមួយក្រសួងអប់រំ យុវជន និងកីឡា