កីឡា

ធ្វើម្ចាស់ផ្ទះស៊ីហ្គេម កម្ពុជារំពឹងទទួលបានទេសចរបរទេសចន្លោះ២៥ទៅ៥០ម៉ឺននាក់

បានផុស

៤ years មុន

នៅ

ថ្ងៃព្រហស្បតិ៍ ១ ធ្នូ ២០២២

ដោយ

កម្ពុជារំពឹងទទួលបានភ្ញៀវទេសចរអន្តរជាតិចន្លោះពី២៥ទៅ៥០ម៉ឺននាក់នៅពេលទទួលរៀបចំការប្រកួតកីឡាស៊ីហ្គេម លើកទី៣២ និងកីឡាជនពិការអាស៊ាន លើកទី១២ ឆ្នាំ២០២៣។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

លោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាបានថ្លែងក្នុងពិធីបិទកីឡាជាតិ លើកទី៣ និងកីឡាជាតិជនពិការ លើកទី១ យប់ថ្ងៃទី៣០ ខែវិច្ឆិកា ឆ្នាំ២០២២នេះថា សកម្មភាពកីឡាជាទេសចរណ៍ដ៏មានសក្តានុពលមួយ នៅក្នុងវិស័យឧស្សាហកម្មទេសចរណ៍នាពេលបច្ចុប្បន្ន។ ទេសចរកីឡាបរទេសលើពិភពលោកមានចំនួនប្រមាណ១២ទៅ ១៥លាននាក់ ក្នុងមួយៗឆ្នាំ ឬស្មើ ១០% នៃឧស្សាហកម្មទេសចរណ៍ពិភពលោកទាំងមូល ហើយក៏រកចំណូលបានប្រមាណ៨០០លានដុល្លារ ក្នុងមួយៗឆ្នាំដែរ។

លោកបានបញ្ជាក់ថា ចំពោះការប្រកួតជើងឯកពិភពលោក World Cup នៅទីក្រុងដូហា ប្រទេសកាតា រំពឹងទទួលបានភ្ញៀវទេសចរអន្តរជាតិដល់ទៅ១,៥លាននាក់។ ដោយឡែកកម្ពុជារៀបចំការប្រកួតកីឡាស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ រំពឹងទទួលបានភ្ញៀវទេសចរអន្តរជាតិចន្លោះពី២៥ទៅ ៥០ម៉ឺននាក់។

បន្ទាប់ពីស៊ីហ្គេម-អាស៊ានប៉ារ៉ាហ្គេម ឆ្នាំ២០២៣ កម្ពុជាបានទទួលសិទ្ធិរៀបចំការប្រកួតកីឡាយុវជនទ្វីបអាស៊ី នាឆ្នាំ២០២៩ ដែលនឹងមាន៤៥ប្រទេសទូទាំងទ្វីបអាស៊ីចូលរួមប្រកួត ដូច្នេះកម្ពុជានឹងទទួលបានភ្ញៀវទេសចរអន្តរជាតិកាន់តែច្រើនថែមទៀត៕