កីឡា

AFC នឹងស៊ើបអង្កេតអំពើហិង្សារវាងថៃនិងឥណ្ឌូណេស៊ី ស៊ីហ្គេមនៅកម្ពុជា

បានផុស

៣៤ នាទី មុន

នៅ

ថ្ងៃព្រហស្បតិ៍ ១៨ ឧសភា ២០២៣

ដោយ

សហព័ន្ធកីឡាបាល់ទាត់អាស៊ី (AFC) កំពុងស៊ើបអង្កេតអំពី “អំពើហិង្សា” បន្ទាប់ពីមានជម្លោះ និងកាតក្រហមចំនួន៤ ដែលបានកើតឡើងក្នុងការប្រកួតបាល់ទាត់វគ្គផ្តាច់ព្រ័ត្ររវាងក្រុមបាល់ទាត់ U22 ឥណ្ឌូណេស៊ី និង ថៃ ក្នុងកីឡាអាស៊ីអាគ្នេយ៍ លើកទី៣២ នៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ឥណ្ឌូណេស៊ី បានយកឈ្នះថៃ ៥-២ នៅម៉ោងបន្ថែម ១៥នាទីពីរដង កាលពីថ្ងៃអង្គារ ទី១៦ ខែឧសភា ក្នុងពហុកីឡដ្ឋានជាតិអូឡាំពិក នៅរាជធានីភ្នំពេញដែលមានការប៉ះទង្គិចគ្នាបានកើតឡើងរវាងកីឡាករ និងគ្រូបង្វឹករបស់ភាគីទាំងសងខាង។

បន្ទាប់មក សមាគមកីឡាបាល់ទាត់ថៃបានចេញសារសូមទោស និងចាប់ផ្តើមការស៊ើបអង្កេតផ្ទាល់ខ្លួន។ កីឡាករត្រូវបានបណ្ដេញចេញរួមមាន អ្នកចាំទី Soponwit Rakyart បន្ទាប់ពីរូបគេបានរត់ទៅវាយគូប្រកួតឥណ្ឌូណេស៊ី។

នៅថ្ងៃពុធ ទី១៨ ខែឧសភានេះ អ្នកនាំពាក្យរបស់ស្ថាប័នគ្រប់គ្រងកីឡាបាល់ទាត់ប្រចាំទ្វីបអាស៊ីបាននិយាយថា ៖«AFC ខកចិត្តចំពោះឧបទ្ទវហេតុដែលបានកើតឡើងក្នុងវគ្គផ្តាច់ព្រ័ត្រ ក្នុងកីឡាស៊ីហ្គេម។ AFC គូសបញ្ជាក់អំពីសារសំខាន់នៃការប្រកួតដោយយុត្តិធម៌ ការគោរពគ្នាទៅវិញទៅមក និងភាពរួសរាយរាក់ទាក់របស់កីឡាករ ហើយប្រកាន់ខ្ជាប់នូវស្មារតីអត់ឱនគ្នា ជៀសវាងរាល់សកម្មភាពហិង្សា ដែលគំរាមកំហែងដល់រាងកាយរបស់កីឡាករ និងមន្ត្រី»។

ការប្រកួតវគ្គផ្តាច់ព្រ័ត្រត្រូវបានចាត់ទុកថាជាឱកាសសម្រាប់ឥណ្ឌូណេស៊ី ក្នុងការស្ដាឡើងវិញនូវមោទនភាពចំពោះកីឡាបាល់ទាត់របស់ខ្លួន បន្ទាប់ពីមានគ្រោះមហន្តរាយនៅកីឡដ្ឋានដ៏សោកសៅ និងការបាត់បង់សិទ្ធិធ្វើជាម្ចាស់ផ្ទះការប្រកួតបាល់ទាត់ពិភពលោកអាយុក្រោម២០ឆ្នាំ។

ប៉ុន្តែការប្រកួតបាននាំឲ្យមានការចាប់អារម្មណ៍ខ្លាំងចាប់ពីនាទី៩០+៧ នៅពេលក្រុម U22 ថៃ ត្រូវបានឥណ្ឌូណេស៊ីនាំមុខ ២-០ ក៏ស៊ុតបញ្ចូលទីតាមបានស្មើ និងឈានទៅដល់ម៉ោងបន្ថែម។

មន្ត្រីថៃបានអបអរគ្រាប់បាល់ចុងក្រោយ ដោយរត់ទៅកៅអីបម្រុងឥណ្ឌូណេស៊ី ដែលបង្កឱ្យមានការប៉ះទង្គិចគ្នាជាលើកដំបូង។ នៅពេលឥណ្ឌូណេស៊ីបាននាំមុខមុនក្នុងម៉ោងបន្ថែម មន្ត្រីរបស់ពួកគេក៏បានធ្វើរឿងនេះត្រលប់មកថៃវិញ ជាមួយនឹងលទ្ធផលដែលកាន់តែមានការប៉ះទង្កិចគ្នាខ្លាំង៕