យប់មិញ ​Ronaldo ជួយ Al Nassr ឡើងវគ្គពាក់កណ្តាលផ្តាច់ព្រ័ត្រពាន Arab Club (វីដេអូ)

ក្រុម​បាល់ទាត់ Al Nassr FC បាន​ឡើងទៅវគ្គ​ពាក់​កណ្តាល​ផ្តាច់​ព្រ័ត្រ​ពាន​រង្វាន់ Arab Club Champions Cup ឆ្នាំ២០២៣ បន្ទាប់​ពី​បាន​យក​ឈ្នះ​ក្រុម Raja Casablanca ដោយ​លទ្ធផល ១-៣ នៅ​វគ្គ​៨​ក្រុម​ចុង​ក្រោយ។

៣​គ្រាប់​របស់​ Al Nassr FC រក​បាន​ដោយ​​កីឡាករ​៣​រូប​ផ្សេង​គ្នា។ តារា​ជើង​ស៊ុតព័រទុយហ្គាល់​បាន​គ្រាប់​បាល់​នាំ​មុខ ០-១ តាម​រយៈការ​ស៊ុត​ជើង​ឆ្វេង​យ៉ាង​ស្អាត​ផុត​ដៃ​អ្នក​ចាំ​ទី​​របស់​ក្រុម Raja Casablanca នៅ​នាទី​១៩។ គ្រាប់​ទី​២​រក​បាន​ដោយ​កីឡាករ Alganham នៅ​នាទី​ទី​២៩ និងគ្រាប់​ទី​៣​រក​បាន​ដោយ​កីឡាករ Fofana នៅ​នាទី៣៨ ខណៈ​១​គ្រាប់​របស់ Raja Casablanca ជា​​ការ​​ធ្វើ​ឲ្យ​ចូល​ទី​ខ្លួន​ឯង​របស់​កីឡាករ Madu នៅ​នាទី​៤១។

នៅ​វគ្គ​ពាក់​កណ្តាល​ផ្តាច់​ព្រ័ត្រ ក្រុម Al Nassr FC ប៉ះ Al Shorta នៅ​ថ្ងៃទី​៩ ខែ​សីហា ខណៈ​ក្រុម Al Shabab ប៉ះ Al Hilal នៅ​ថ្ងៃទី​១០ ខែ​សីហា។

លទ្ធផលវគ្គ​៨​ក្រុម​ចុង​ក្រោយ​

• Al Shabab ០-០ Al-Wahda (ប៉េណាល់ទី ៥-៤)
• Raja Casablanca ១-៣ Al Nassr FC
• Al Ittihad ១-៣ Al Hilal
• Al-Sadd ២-៤ Al Shorta

វគ្គ​ពាក់កណ្តាល​ផ្តាច់​ព្រ័ត្រ

• Al Shorta vs Al Nassr FC
• Al Shabab vs Al Hilal

ពាន​រង្វាន់​នេះ​ត្រូវ​បាន​រៀបចំ​ប្រចាំ​ឆ្នាំ​ដោយ​សហភាព​នៃ​សមាគម​បាល់ទាត់​អារ៉ាប់ (UAFA) ដែល​មាន​ក្រុម​កំពូល​ៗ​ចំនួន​៣៧​នៅ​តំបន់​អារ៉ាប់ និង​មក​ពីសហព័ន្ធ​កីឡា​បាល់ទាត់​អាស៊ី និង​សហព័ន្ធ​កីឡា​បាល់ទាត់​អាហ្វ្រិក៕

ទស្សនាវីដេអូហាយឡាយ

អត្ថបទ៖ វីរបុត្រ