កីឡា

លោក អ៊ូ សុផល លើកពីចំណុចល្អរបស់បញ្ជាការដ្ឋានអង្គរក្សដែលធ្វើឲ្យក្រុមរបស់លោកមិនអាចឈ្នះ

បានផុស

២ ខែ មុន

នៅ

ថ្ងៃពុធ ២០ ឧសភា ២០២៦

ដោយ

លោក អ៊ូ សុផល គ្រូបង្វឹករបស់សមាគមបាល់ទះក្រសួងមហាផ្ទៃ លើកពីចំណុចល្អរបស់បញ្ជាការដ្ឋានអង្គរក្សដែលធ្វើឲ្យក្រុមរបស់លោកមិនអាចប្រកួតឈ្នះកាលពីម្សិលមិញនោះបានគឺការវាយសេវា ការទទួលសេវា និងការម៉ាត់ផ្ដាច់ ពិសេសមត្ថភាពដ៏ល្អកីឡាករឥណ្ឌូណេស៊ី។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

សមាគមបាល់ទះក្រសួងមហាផ្ទៃ

គ្រូបង្វឹករបស់សមាគមបាល់ទះក្រសួងមហាផ្ទៃ លោក អ៊ូ សុផល បានឲ្យដឹងថា ការប៉ះជាមួយបញ្ជាការដ្ឋានអង្គរក្សនៅប្រកួតទី៤ នេះគឺកូនក្រុមរបស់លោកពិបាកក្នុងការទបទល់ជាមួយ ឬយកឈ្នះតែម្ដង។ ដោយសារតែវាយសេវារបស់កូនក្រុមលោកមានកម្រិតស្រាលៗពេកដែលមិនអាចធ្វើឲ្យដៃគូពិបាកទទួល ដូច្នេះទើបក្រុមអង្គរក្សអាចលេងបានល្អ និងចេញមកវិញធ្ងន់ៗ។

ក្រុមបញ្ជាការដ្ឋានអង្គរក្ស

លោក អ៊ូ សុផល បន្ថែមទៀតថា នៅសិតទី១ កូនក្រុមរបស់លោកធ្វើបានល្អដូចបានឃើញស្រាប់រហូតអាចយកឈ្នះបាន។ ប៉ុន្តែដោយសារតែកីឡាករមិនអាចគ្រប់គ្រងអារម្មណ៍បានល្អនៅពេលប៉ះក្រុមធំ ឬក្រុមមានកីឡាករសមត្ថភាពខ្ពស់ៗនោះគឺហាក់ឆាប់បែកទម្រង់លេងតែម្ដង។ ការចេញសេវាក៏មិនសូវបានល្អ និងស្រាលៗ ព្រោះបារម្ភខ្លាចខូចជាដើម។ លើសពីនេះកីឡាករដែលមានសេវាល្អ និងជាកម្លាំងស្នូលរបស់ក្រុមគឺ ធី ម៉េងហួង មានបញ្ហារបួសផងនោះទើបក្រុមរឹតតែជួបការលំបាកបន្ថែម។

កីឡាករ LUVI

ចំពោះខាងក្រុមអង្គរក្សវិញគឺល្អទាំងព្រមតែម្ដង ពោលលោតវាយសេវា ការទទួលសេវា និងម៉ាត់ផ្ដាច់សុទ្ធតែធ្វើបានល្អទាំងអស់គ្នា។ មួយវិញទៀតកីឡាករឥណ្ឌូណេស៊ី លេខ ២១ LUVI FN និងកីឡាករលេខ ១៤ AGEN ទាំងពីររូបនេះលេងស្មើដៃគ្នា និងបានឡើងចុះជួយក្រុមបានល្អតែម្ដង។

កីឡាករ LUVI

បញ្ជាក់ដែរថា នៅការប្រកួតទី៤ ថ្ងៃទី១៩ ខែឧសភា ឆ្នាំ២០២៦ ម្សិលមិញនេះសមាគមបាល់ទះក្រសួងមហាផ្ទៃ ចាញ់ក្រោមថ្វីដៃក្រុមបញ្ជាការដ្ឋានអង្គរក្ស ដោយលទ្ធផល ៣-១។ ក្រសួងមហាផ្ទៃជាក្រុមបាល់ទះធំមួយនៅកម្ពុជា និងមានគាំទ្រជាច្រើនគិតថាជាក្រុមអាចនឹងប្រជែងពានតេជោលីគបានជាមួយក្រុមខ្លាំងនៅរដូវកាលទី៣ ឆ្នាំ២០២៦ នេះទៀតផង៕