កីឡា

ក្រសួងមហាផ្ទៃបង្កើតពានបាល់ទាត់មួយមានក្រុម១៥បំផុស សកម្មភាពកីឡា

បានផុស

១ year មុន

នៅ

ថ្ងៃអង្គារ ២៧ កុម្ភៈ ២០២៤

ដោយ

ក្រសួងមហាផ្ទៃបានរៀបចំបង្កើតឲ្យមានការប្រកួតបាល់ទាត់ពានរង្វាន់មិត្តភាពប្រចាំក្រសួងដែលអគ្គនាយកដ្ឋានជំនាញរបស់ខ្លួនអាចចូលរួមប្រកួតដើម្បីបំផុសសកម្មភាពកីឡាបាល់ទាត់ និងដើម្បីសុខភាព។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

ក្នុងសន្និសីទសារព័ត៌មានកាលពីរសៀល ថ្ងៃទី២៧ ខែមករា ឆ្នាំ២០២៤ នៅមជ្ឈមណ្ឌលកីឡាក្នុងពហុកីឡដ្ឋានជាតិអូឡាំពិក លោក សរ សិទ្ធិ រដ្ឋលេខាធិការក្រសួងមហាផ្ទៃ និងជាប្រធានគណៈកម្មការរៀបចំការប្រកួតពានរង្វាន់ក្រសួងមហាផ្ទៃបានឲ្យដឹងថា នេះជាការប្រកួតបាល់ទាត់រង្វាន់មិត្តភាពសម្រាប់មន្ត្រីរាជការចំណុះក្រសួងមហាផ្ទៃលើកដំបូង។ គោលបំណងនៃការប្រកួតដើម្បីរឹតចំណងមិត្តភាព សាមគ្គីភាព និងសុខភាពសម្រាប់មន្ត្រីរបស់ក្រសួងមហាផ្ទៃ។

លោកបានឲ្យដឹងថា ការរៀបចំលើកដំបូងនេះមិនទាន់គ្រប់គ្រាន់ទេ និងអគ្គនាយកដ្ឋានជំនាញក៏មិនទាន់បានចូលរួមទាំងអស់ ដោយនៅសល់៤អគ្គនាយកដ្ឋានទៀត។ ប៉ុន្តែសម្រាប់ឆ្នាំក្រោយៗនឹងរៀបចំឲ្យមានគ្រប់អគ្គនាយកដ្ឋានទាំងអស់ចូលរួម។ ជាពិសេសគ្រោងនឹងរៀបចំឲ្យមន្ទីរតាមបណ្តាខេត្តនានាចូលរួមប្រកួតទៀតផង។

អ្វីដែលគួរឲ្យចាប់អារម្មណ៍មួយទៀតនោះ លោក សរ សិទ្ធិ បានបង្ហើបឲ្យដឹងថា ក្រសួងអាចនឹងបង្កើតឲ្យមានការប្រកួតលីគបាល់ទាត់ក្រសួងមហាផ្ទៃថែមទៀត។

សម្រាប់ការប្រកួតពានរង្វាន់ក្រសួងមហាផ្ទៃលើកដំបូងនេះ បុគ្គលិកជាមន្ត្រីរាជការគ្រប់អាយុរបស់ក្រសួងមហាផ្ទៃអាចចូលរួមប្រកួតបាន ប៉ុន្តែសម្រាប់កីឡាករអាជីព និងកីឡាករធ្លាប់លេងអាជីពក្រោមអាយុ៤០ឆ្នាំមិនអនុញ្ញាតឲ្យចូលរួមប្រកួតបានឡើយ។ បុគ្គលិកដែលធ្លាប់ជាកីឡាករអាជីពចាប់ពីអាយុ៤០ឆ្នាំឡើងទើបអនុញ្ញាតឲ្យចូលរួមប្រកួត។

ក្រុមទាំង១៥ត្រូវបានបែងចែកជា៤ពូល ដែលពូល A B C មាន៤ក្រុមដូចគ្នា ខណៈពូល D មានតែ៣ក្រុម។ រូបមន្តនៃការប្រកួតគឺ ការប្រកួតសន្សំពិន្ទុក្នុងពូល។ ក្រុមលេខ១ និងលេខ២នៃពូលនីមួយៗឡើងទៅវគ្គ៨ក្រុមចុងក្រោយដែលត្រូវបន្តប្រកួតប្រជែងរហូតដល់វគ្គផ្តាច់ព្រ័ត្រ។ នៅក្នុងសន្និសីទសារព័ត៌មានមិនទាន់ត្រូវបានប្រកាសពីប្រាក់រង្វាន់ និងពានរង្វាន់ឯកត្តជនទេ។ ការប្រកួតធ្វើឡើងនៅទីលានបាល់ទាត់ AUPP។

តាមការគ្រោងទុក ពិធីបើកនឹងរៀបចំនៅពហុកីឡដ្ឋានជាតិអូឡាំពិក នាថ្ងៃទី១ ខែមីនា ក្រោមអធិបតីភាពលោកអភិសន្តិបណ្ឌិត ស សុខា ឧបនាយករដ្ឋមន្ត្រី រដ្ឋមន្ត្រីក្រសួងមហាផ្ទៃ និងលោកជំទាវ។ កម្មវិធីបើកនឹងមានក្បួនដង្ហែ និងកម្មវិធីសម្តែងសិល្បៈកីឡាជាច្រើន។ ការប្រកួតនឹងបញ្ចប់នៅថ្ងៃទី២៥ ខែមីនា ឆ្នាំ២០២៤។