តារា​ឆ្នើម​ Bruno Rezende ជាស្តេចប៉ះសេក្នុង​ពិភព​លោក​

ពេលដែលនិយាយអំពីអ្នកប៉ះសេឆ្នើមនៅ​កម្ពុជា នរណាក៏ជានឹកឃើញមុនគេដល់កីឡាករបាល់ទះ សួន ចាន់ណារ៉ូ ដែរ ប៉ុន្តែបើនិយាយនៅលើពិភពលោកវិញ គេតែងតែនឹកឃើញមុនគេ ដល់កីឡាករ Bruno Rezende ជាស្តេចប៉ះសេ ឬ “King of Setters”។

ពាក្យ King of Setters ឬស្តេចប៉ះសេនេះ ត្រូវបានគេដាក់រហស្សនាមឱ្យកីឡាករសញ្ជាតិ ប្រេស៊ីល វ័យ ៣៨ ឆ្នាំខាងលើ ដោយសារ​រូប​គេ​ជាកីឡាករម្នាក់ ដែលមានទេពកោសល្យ និងសមត្ថភាពលើកបាល់យ៉ាងអស្ចារ្យលើសពីកីឡាករដទៃ។ ការលើកបាល់របស់គាត់ ជាទូទៅគឺលឿន ច្បាស់ មាន​ប្រសិទ្ធភាព ទោះស្ថិត​ក្នុង​ស្ថានភាព​បែបណា ក៏អាចកែស្ថានការលើកបាល់បញ្ជូនឱ្យស្មាត់ឆ្វេង ស្តាំ ដើម្បីផ្តាច់រកពិន្ទុបាន។

Bruno Rezende បានចាប់ផ្តើមអាជីពជាកីឡាករបាល់ទះតាំងពីឆ្នាំ ២០០៣ មកម្ល៉េះ ដែលពេលនោះគាត់បានចូលលេងក្លិបដំបូងជាមួយ Unisul Florianopolis ក្នុងស្រុកកំណើត។ ក្រោយ​មក​ គាត់បានផ្លាស់ទ្រនំទៅលេងនៅក្លិបជាច្រើន​ទៀត​ដូច​ជា​ Cimed Florianópolis, RJX និង​​ក្លិបមួយចំនួនទៀត ហើយ​បច្ចុប្បន្ន​កំពុងលេងនៅក្លិប Modena Volley ក្នុងប្រទេស អ៉ីតាលី តាំងពីឆ្នាំ ២០២១។

គាត់បានឈ្នះពានជាច្រើនជាមួយក្លិបទាំងលក្ខណៈឯកត្តជន និងជាក្រុម ប៉ុន្តែបើនិយាយអំពីជាមួយជម្រើសជាតិវិញ គាត់បានឈ្នះពានកាន់តែច្រើនថែមទៀត។ គាត់ធ្លាប់បានជាប់ជម្រើសជាតិ ប្រេស៊ីល សឹងតែគ្រប់ឈុត តាំងពីឈុតយុវជន ដល់ឈុតធំ។

ដកស្រង់ត្រួសៗក្នុងការលេងជាមួយក្រុម ប្រេស៊ីល ឈុតធំ គាត់ធ្លាប់បានឈ្នះមេដាយមាសព្រឹត្តិការណ៍ South American Championship ៧ លើក, មេដាយមាស Pan American Games ២ លើក, មេដាយមាស FIVB World Cup ២ លើក និងសំរឹទ្ធ ១ លើក, មេដាយមាសអូឡាំពិក ១ លើក និងប្រាក់ ២ លើក ព្រម​ទាំងមេដាយ ក៏​ដូច​ជា​ពានរង្វាន់​ជាច្រើនទៀត។

គួរបញ្ជាក់ថា កាលពីឆ្នាំ ២០២៤ កន្លងទៅ កីឡាករ Bruno Rezende បានប្រកាសចូលនិវត្តន៍ពីក្រុមជម្រើសជាតិ ប្រេស៊ីល ហើយ បន្ទាប់ពី ប្រេស៊ីល ចាញ់ក្រុមជម្រើសជាតិ បារាំង នៅវគ្គ ៨ ក្រុមចុងក្រោយក្នុងព្រឹត្តិការណ៍អូឡាំពិក ដែលបារាំងធ្វើជាម្ចាស់ផ្ទះ៕

អត្ថបទ៖ សេម កុសល