Ronaldo ថា ព័រទុយហ្គាល់ នៅសល់ ៩០ នាទីទៀត ដើម្បីផ្តួល ដាណឺម៉ាក វិញ

ប្រធានក្រុមរបស់ក្រុមជម្រើសជាតិ ព័រទុយហ្គាល់ កីឡាករ Cristiano Ronaldo នៅតែមានភាពជឿជាក់ ក្នុងការវាយបក ដាណឺម៉ាក សម្រាប់ប្រកួតជើងទី ២ វគ្គ ៨ ក្រុមចុងក្រោយពាន Nations League វិញ បន្ទាប់ពីក្រុម បញ្ចខែល បរាជ័យនៅជើងទី ១ កាលពីយប់មិញ។

នាយប់រំលងអាធ្រាត្រឈានចូលថ្ងៃទី ២១ ខែ មីនា នេះ ក្រុមជម្រើសជាតិ ព័រទុយហ្គាល់ បានជួបគ្នាជាមួយក្រុម ដាណឺម៉ាក នៅក្នុងការប្រកួតជើងទី ១ វគ្គ ៨ ក្រុមពានរង្វាន់ Nations League ខណៈនៅក្នុងការប្រកួតនោះ ក្រុមរបស់លោក Roberto Martinez គឺធ្វើពុំបានល្អនោះទេ ដោយចាញ់ក្រុម ដាណឺម៉ាក ក្នុងលទ្ធផល ១ ទល់នឹង ០ ដែលជាការស៊ុតបញ្ចូលទីដោយខ្សែប្រយុទ្ធ Rasmus Hojlund នៅនាទីទី ៧៨។

ក្រោយបញ្ចប់ការប្រកួតនេះភ្លាម Ronaldo បានបង្ហោះសារនៅលើបណ្តាញសង្គមយ៉ាងដូច្នេះថា៖ « ពួកយើងមាន ៩០ នាទីទៀត ដើម្បីបង្ហាញថា ពួកយើងជានរណា ហើយនរណានឹងឈ្នះ។ តស់ឆ្ពោះទៅមុខបន្តទៀត»។

សូមបញ្ជាក់ថា ការប្រកួតជើងទី ២ រវាងក្រុមទាំង ២ នឹងធ្វើឡើងនៅប្រទេស ព័រទុយហ្គាល់ វិញម្តង គឺនៅថ្ងៃ ចន្ទ ទី ២៤ ខែ​មីនា ឆ្នាំ​២០២៥៕

អត្ថបទ៖ សេម កុសល