តើ ព្រះខ័នរាជស្វាយរៀង អាចសាងប្រវត្តិសាស្ត្រជាក្រុមអាស៊ានទី ២ ឈ្នះពាន ACL បានទេ?

ក្រុមតំណាង​កម្ពុជា ព្រះខ័នរាជស្វាយរៀង នឹងក្លាយជាក្រុមទី ២ នៅតំបន់​អាស៊ីអាគ្នេយ៍ ដែលឈ្នះពានក្លិបលំដាប់ទី ៣ របស់ទ្វីប​អាស៊ី AFC Challenge League ប្រសិនបើអាចយកឈ្នះក្រុម FK Arkadag នៅវគ្គផ្តាច់ព្រ័ត្រ។

ពានក្លិបលំដាប់ទី ៣ របស់ អាស៊ីនេះ គឺបង្កើតឡើងដំបូងតាំងពីឆ្នាំ ២០០៥ មកម្ល៉េះ ដែលពេលនោះប្រើឈ្មោះថា AFC President’s Cup ប៉ុន្តែដំណើការដល់ឆ្នាំ ២០១៤ ក៏បានរំសាយចោលវិញ។ លុះមកដល់រដូវកាល ២០២៤-២០២៥ នេះ ទើបចាប់ផ្តើមដំណើការឡើងវិញ ដោយប្រើឈ្មោះថ្មីថា AFC Challenge League។

នៅក្នុងប្រវត្តិសាស្ត្រពានក្លិបលំដាប់ទី ៣ របស់ទ្វីបអាស៊ី​ គឺទើបតែមានក្រុមមកពី អាស៊ាន ១ ប៉ុណ្ណោះ ដែលធ្លាប់ឈ្នះពាននេះ នោះគឺក្រុម Yadanarbon របស់​ប្រទេស​មីយ៉ាន់ម៉ា នៅឆ្នាំ ២០១០។ ក្រៅពីនោះ ក្រុមដែលធ្លាប់ឈ្នះពាននេះ គឺសុទ្ធតែជាក្រុមមកពីតំបន់ផ្សេង ដោយក្រុម Regar TadAZ មកពី ធូសាន់ហ្សូដា ឈ្នះច្រើនជាងគេ គឺចំនួន ៣ លើកក្នុងឆ្នាំ ២០០៥, ២០០៨ និង ២០០៩។ បន្ទាប់មកក្រុម Dordoi-Dynamo មកពី​គីជីស្ថាន ឈ្នះ ២ លើកគឺនៅឆ្នាំ ២០០៦ និង ២០០៧។ ចំណែកក្រុមផ្សេងៗទៀតសុទ្ធតែឈ្នះ ១ លើកដូចគ្នា ដូចជាក្រុម Taipower របស់ ចាយនីស​ តៃប៉ិ នៅឆ្នាំ ២០១១, ក្រុម Istiklol របស់ តាជីគីស្ថាន នៅឆ្នាំ ២០១២, ក្រុម Balkan មកពី តួកមេនីស្ថាន នៅឆ្នាំ ២០១៣ និង ក្រុម HTTU Asgabat មកពី តួកមេនីស្ថាន ដូចគ្នានៅឆ្នាំ ២០១៤។

យ៉ាងណាមិញ កន្លងមកក៏ធ្លាប់មានក្រុមតំណាងកម្ពុជាឡើងដល់វគ្គផ្តាច់ព្រ័ត្រពាននេះផងដែរ នោះគឺក្រុម ភ្នំពេញក្រោន នៅឆ្នាំ​ ២០១១ ប៉ុន្តែពេលនោះបានត្រឹមជើងឯករងប៉ុណ្ណោះ បន្ទាប់ពីបរាជ័យក្រោមថ្វីជើងក្រុម Taipower របស់ ឆាយនីស តៃប៉ិ ក្នុងលទ្ធផល ៣ ទល់នឹង ២ ដ៏​ចម្រូង​ចម្រាស។

ងាកមកកាន់រដូវកាល ២០២៤-២០២៥ ព្រះខ័នរាជស្វាយរៀង កំពុងស្ថិតនៅលើផ្លូវមួយ ក្នុងការបង្កើតកំណត់ត្រាជាក្រុម អាស៊ាន​ទី ២ ដែលឈ្នះពាននេះ ក្រោម​ការ​ប្រើ​ឈ្មោះ AFC Challenge League ជា​លើក​ដំបូង​ ប្រសិនបើពួកគេ អាចយកឈ្នះលើក្រុម FK Arkadag របស់តួកមេនីស្ថាននៅពហុកីឡដ្ឋានជាតិមរតកតេជោ នាថ្ងៃទី ១០ ខែ ឧសភា ខាងមុខ៕

អត្ថបទ៖ សេម កុសល