ក្លិប ៥ ក្នុងលីគកម្ពុជា បានបំពេញកូតាកីឡាករបរទេសគ្រប់ ៦ នាក់រួចរាល់

ការប្រកួតលីគកំពូលកម្ពុជា Cambodian Premier League រដូវកាលថ្មី ២០២៥-២០២៦ កាន់តែខិតជិតចូលមកដល់ ខណៈក្លិបទាំងអស់​កំពុងតែមមាញឹកខ្លាំង​​ការផ្ទេរចេញ ផ្ទេរចូលកីឡាករថ្មី ដើម្បីរៀបចំក្រុមឱ្យបានល្អប្រសើរតាមផែនការរៀបចំរបស់ក្លិបនីមួយៗ។

ជាការពិត នៅរដូវកាលនេះ ត្រូវបានគេចាត់ទុកជារដូវកាល ដែលមានការផ្ទេរកីឡាករគួរឱ្យចាប់អារម្មណ៍ខ្លាំងបំផុតសម្រាប់ប្រវត្តិសាស្ត្រលីគកំពូល កម្ពុជា បើធៀបនឹងរដូវកាលមុនៗ។ មិនថា ការផ្ទេរកីឡាករខ្មែរ និងបរទេសនោះទេ សុទ្ធតែបង្ក​នូវភាពមិននឹកស្មានសម្រាប់អ្នកគាំទ្របាល់ទាត់កម្ពុជា។

យ៉ាងណា បើក្រឡេកមកមើលអំពីកូតាកីឡាករបរទេសវិញ ឃើញថា ក្លិបសរុបទាំង ១១ គឺមានក្លិបចំនួន ៥ ហើយ ដែលបានបំពេញគ្រប់លក្ខខណ្ឌតាមការកំណត់កីឡាករ ៦ នាក់ក្នុងមួយក្រុម។ ចំណែកក្រុមចំនួន ៦ ទៀត បាននឹងកំពុងសម្រិតសម្រាំងនាំចូលកីឡាករបរទេសថ្មីៗបន្ថែម ដើម្បីឱ្យស្របតាមការកំណត់របស់ច្បាប់នៃលីគកំពូលកម្ពុជា។

ក្លិប ដែលបំពេញលក្ខខណ្ឌកូតាកីឡាករបរទេសគ្រប់ ៦ នាក់រួចរាល់ ក្នុងនោះមាន ព្រះខ័នរាជស្វាយរៀង បឹងកេត វិសាខា អាយអេសអាយ ដង្កោសែនជ័យ និង ណាហ្គាវើលដ៍។ ចំណែកក្លិបផ្សេងៗទៀតដូចជា អង្គរថាយហ្គឺរ នៅខ្វះម្នាក់, គីរីវង្សសុខសែនជ័យ នៅខ្វះ ៥ នាក់, ឡាយហ្វ ខេត្តព្រះសីហនុ នៅខ្វះម្នាក់, អឹម អូ អាយ កំពង់ដេវ៉ា អេហ្វស៊ី នៅខ្វះទាំង ៦ នាក់, ភ្នំពេញក្រោន នៅខ្វះ ២ នាក់, និងសមាគមបាល់ទាត់ ខ.ភ.ម នៅខ្វះ ៤ នាក់។

ខាងក្រោមនេះគឺជាបញ្ជីឈ្មោះកីឡាករបរទេសរបស់ក្លិបនីមួយៗ៖

+ ក្លិបគ្រប់កូតាកីឡាករបរទេសទាំង ៦ នាក់ (គិតត្រឹមថ្ងៃទី ១៥ ខែ កក្កដា ឆ្នាំ ២០២៥)៖

• ព្រះខ័នរាជស្វាយរៀង៖ Bounphachan Bounkong (ឡាវ), Cristian Roque (ប្រេស៊ីល), Ryo Fujii (ជប៉ុន), Kwame Peprah (ហ្គាណា), Takashi Odawara (ជប៉ុន) និង Patrick Robson (ប្រេស៊ីល)។
• បឹងកេត៖ Louis Willy Ndongo (កាមេរូន), Thabiso Brown (ឡេសូតូ), Louis Zabala (អូស្ត្រាលី), Charlie Scott (អង់គ្លេស), Iago Bento (ប្រេស៊ីល) និង Sean Kelly (ស្កុតលែនដ៍)។
• វិសាខា៖ Vitālijs Jagodinskis (ឡាតវី), Park Jung-bin (កូរ៉េខាងត្បូង), Alisher Mirzaev (អ៊ុយបេគីស្ថាន), Nana Kwame (ហ្គាណា), Breno Caetano (ប្រេស៊ីល) និង Benson Omala (កេនយ៉ា)។
• អាយអេសអាយ ដង្កោសែនជ័យ៖ Umaru Samura (សៀរ៉ាឡេអូន), Jhon Frith (ទីម័រ), Sonosuke Onda (ជប៉ុន), Emmanuel Chinonso (នីហ្ស៊េរីយ៉ា), João Rodrigues (ព័រទុយហ្គាល់), Diakite Lancine (ហ្គីណេ) និង Bruno Ernandes (ប្រេស៊ីល)។
• ណាហ្គាវើលដ៍៖ Yusuke Minagawa (ជប៉ុន), Wisney Junio (ប្រេស៊ីល), Weyderson China (ប្រេស៊ីល), Mateus Martins (ប្រេស៊ីល), Lucas Venuto (ប្រេស៊ីល) និង Lucas Oliveira (ប្រេស៊ីល។

+ ក្លិបមិនទាន់គ្រប់កូតាកីឡាករបរទេសទាំង ៦ នាក់ (គិតត្រឹមថ្ងៃទី ១៥ ខែ កក្កដា ឆ្នាំ ២០២៥)៖

• អង្គរថាយហ្គឺរ៖ Takuto Yasuoka (ជប៉ុន), Matheus Freitas (ប្រេស៊ីល), Takara Masutani (ជប៉ុន), Guytho Mijland (ហូល្លង់) និង Mark Ajay Kurita (ជប៉ុន)។
• គីរីវង្សសុខសែនជ័យ៖ Kyle Degelman (កាណាដា)។
• ឡាយហ្វ ខេត្តព្រះសីហនុ៖ Kanta Asami (ជប៉ុន), Georgino Mendonça (ទីម័រ), Kim Hyeon-su (កូរ៉េខាងត្បូង), Oh Tae-gyun (កូរ៉េខាងត្បូង) និង Kim Joung-woo (កូរ៉េខាងត្បូង)។
• អឹម អូ អាយ កំពង់ដេវ៉ា អេហ្វស៊ី៖ មិនទាន់មានកីឡាករបរទេសសូម្បីម្នាក់។
• ភ្នំពេញក្រោន៖ Park Yi-young (កូរ៉េខាងត្បូង), Rick Ketting (ហូល្លង់), Raul Feher (រ៉ូម៉ានី), Maksym Pryadun (អ៊ុយក្រែន) និង Moses Dyer (នូវែលសេឡង់)។
• សមាគមបាល់ទាត់ ខ.ភ.ម៖ Tomoki Taniguchi (ជប៉ុន) និង Shori Murata (ជប៉ុន)។

គួរបញ្ជាក់ថា ការប្រកួតលីគកំពូលកម្ពុជា Cambodian Premier League នឹងចាប់ផ្តើមការប្រកួតដំបូងនៅថ្ងៃ សៅរិ៍ ទី ៩ ខែ សីហា ឆ្នាំ ២០២៥ ដែលគូដំបូង គឺក្រុម ឡាយហ្វ ខេត្តព្រះសីហនុ នឹងត្រូវបើកទ្វាកីឡដ្ឋានរបស់ខ្លួនទទួលស្វាគមន៍ក្រុមភ្ញៀវ បឹងកេត៕

អត្ថបទ៖ សេម កុសល