កីឡា

ខ្សែបម្រើអង់គ្លេស Charlie Scott យល់ឃើញ បឹងកេត ឆ្នាំនេះល្អ តែមិនអាចធ្វេសប្រហែស

បានផុស

១០ ខែ មុន

នៅ

ថ្ងៃពុធ ១៣ សីហា ២០២៥

ដោយ

ខ្សែបម្រើសញ្ជាតិអង់គ្លេស Charlie Scott ចាត់ទុកលីគបាល់ទាត់កំពូលកម្ពុជា រដូវកាលថ្មីមានការប្រកួតប្រជែងតឹងតែងខ្លាំង បន្ទាប់ពីក្រុមនីមួយៗសុទ្ធតែត្រៀមខ្លួនបានល្អដែលធ្វើឲ្យរូបគេរីករាយសម្រាប់ការបន្តលេងនៅកម្ពុជា។

សូមចុច Subscribe Channel Telegram កម្ពុជាថ្មី ដើម្បីទទួលបានព័ត៌មានថ្មីៗទាន់ចិត្ត

តាមរយៈលទ្ធផលនៃការប្រកួតសប្តាហ៍ទី១បានបង្ហាញឲ្យឃើញពីក្រុមនីមួយសុទ្ធតែខ្លាំង និងមិនអាចមើលស្រាលបាន។ ជាក់ស្តែង ក្រុមគិរីវង់សុខសែនជ័យ បានយកឈ្នះ អាយអេសអាយ ដង្កោសែនជ័យ ដោយលទ្ធផល ២-១ ខណៈ វិសាខា ដែលត្រូវបានអ្នកគាំទ្រមើលឃើញជាក្រុមខ្លាំង ប៉ុន្តែបានចាញ់ កងយោធពលខេមរភូមិន្ទ ដោយលទ្ធផល ២-១។

កីឡាករ Charlie Scott ដែលជាខ្សែបម្រើដ៏ល្អរបស់ បឹងកេត បានប្រាប់«កម្ពុជាថ្មី»ថា ៖«ក្រុមយើងមើលទៅល្អ យើងមានសមាជិកថ្មីមួយចំនួន គ្រប់គ្នាកំពុងព្យាយាមលេងឲ្យយល់ចិត្តគ្នា។ រដូវកាលនេះ ក្រុមនីមួយៗសុទ្ធតែរៀបចំបានល្អចាប់តាំងពីរដូវកាលមុនចប់។ ខ្ញុំពិតជារីករាយសម្រាប់រដូវកាលថ្មីនេះដែលនឹងមានការប្រកួតប្រជែងតឹងតែងខ្លាំង»។

«ខ្ញុំគិតថា លទ្ធផលការប្រកួតសប្តាហ៍ទី១ក្នុងរដូវកាលថ្មី កាលពីចុងសប្តាហ៍មុនបានបង្ហាញហើយថា ក្រុមនីមួយៗយ៉ាងណា ក្នុងនោះវិសាខា បានចាញ់ ដូច្នេះអ្វីៗមិនអាចមើលស្រាលបានទេ។ យើងមានតែខិតខំប្រឹងប្រែងជារៀងរាល់ថ្ងៃ និងអនុវត្តតាមគោលការណ៍របស់គ្រូបង្វឹក ដើម្បីធ្វើឲ្យរដូវកាលថ្មីដ៏ល្អ»។ អតីតយុវជនក្លិប Manchester United បានបញ្ជាក់។

កីឡាករ Charlie Scott បានបង្ហាញសមត្ថភាពគួរឱ្យចាប់អារម្មណ៍ ជាមួយ បឹងកេត ក្នុងរយៈពេលកន្លះរដូវកាលមុនដែលបានរួមចំណែកជួយឱ្យក្លិបបញ្ចប់រដូវកាល ២០២៤-២០២៥ នៅចំណាត់ថ្នាក់ក្រុមកំពូលទាំង ៤ ប្រចាំលីគ និងដណ្តើមបានចំណាត់ថ្នាក់លេខ ៣ ក្នុងពានសម្តេចតេជោ ហ៊ុន សែន។ តាមរយៈការបង្ហាញសមត្ថភាពដ៏ល្អបានទាក់ចិត្តគ្រូបង្វឹក និងថ្នាក់ដឹកនាំក្លិបបន្តកុងត្រាឲ្យរូបគេនៅរដូវកាល ២០២៥-២៦៕

អត្ថបទ៖ វីរបុត្រ