កម្ពុជា​ ជា​ប្រទេស​មួយ​​គត់ មានក្លិប ២ ចូលវគ្គចែកពូលពាន Challenge League

ទីបំផុតរកឃើញក្រុមទាំង ៨ ក្នុងតំបន់ខាងកើត បានឡើងទៅកាន់វគ្គចែកពូលពានរង្វាន់ក្លិបលំដាប់ទី ៣ របស់ទ្វីប អាស៊ី AFC Challenge League ជាផ្លូវការ ខណៈអ្វីដែលគួរឱ្យចាប់អារម្មណ៍ ក្រុមរបស់ កម្ពុជា មានដល់ទៅ ២ ក្រុម។

ក្រុម Manila Digger របស់ ហ្វីលីពីន បានក្លាយជាក្រុមចុងក្រោយគេ ដែលបានឡើងមកកាន់វគ្គចែកពូលពាន AFC Challenge League បន្ទាប់ពីពួកគេបរាជ័យក្រោមថ្វីជើងក្រុម ឥណ្ឌូណេស៊ី Persib Bandung ក្នុងការប្រកួតជម្រុះបឋមពាន AFC Champions League Two ក្នុងលទ្ធផល ២-១ កាលពីយប់មិញថ្ងៃទី ១៣ ខែ សីហា ឆ្នាំ ២០២៥។

យ៉ាងណា សម្រាប់ក្រុមទាំង ៨ ដែលបានឡើងមកកាន់វគ្គចែកពូលពាន AFC Challenge League ២០២៥ ប្រចាំតំបន់ខាងកើតនេះ មានតែ កម្ពុជា មួយគត់ ដែលមានក្រុមចំនួន ២ ចូលរួមវគ្គចែកពូលពាននេះ គឺព្រះខ័នរាជស្វាយរៀង និង ភ្នំពេញក្រោន។ ចំណែកប្រទេសផ្សេងៗទៀត គឺមានតែ ១ ក្រុមៗប៉ុណ្ណោះ។

ខាងក្រោមនេះជាក្រុមទាំង ៨ ប្រចាំតំបន់ខាងកើត ដែលបានឡើងមកវគ្គចែកពូលពាន AFC Challenge League ២០២៥៖

+ ក្រុមទទួលបានកៅអីដោយស្វ័យប្រវត្តិ៖

• Manila Digger (ហ្វីលីពីន)
• Dewa United (ឥណ្ឌូណេស៊ី)
• ព្រះខ័នរាជស្វាយរៀង (កម្ពុជា)
• Shan United (មីយ៉ាន់ម៉ា)

+ ក្រុមឆ្លងកាត់វគ្គជម្រុះបឋម៖

• ភ្នំពេញក្រោន (កម្ពុជា)
• Tainan City (ចិនតៃប៉ិ)
• SP Falcons (ម៉ុងហ្គោលី)
• Ezra (ឡាវ)

គួរឱ្យដឹងថា ការចាប់ឆ្នោតវគ្គចែកពូលពាន AFC Challenge League នឹងធ្វើឡើងនៅថ្ងៃទី ២៨ ខែ សីហា ឆ្នាំ ២០២៥ ឆាប់ៗខាងមុខនេះ៕

អត្ថបទ៖ សេម កុសល