សប្តាហ៍នេះសង្វៀន Krud Kun Khmer លេងធំ ខណៈ ប៊ុន សុធា ជួប យ៉ាស៊ីន ដណ្តើមខ្សែក្រវាត់

ថ្ងៃ អាទិត្យ ទី ១៤ ខែ កញ្ញា ឆ្នាំ ២០២៥ សង្វៀន Krud Kun Khmer នឹងរៀបចំការប្រកួតដ៏កក្រើក ដែលមានទាំងការប្រកួតដណ្តើមខ្សែក្រវាត់លក្ខណៈ 4-MAN TOURNAMENT ការប្រកួតមិត្តភាពអន្តរជាតិ និងការប្រកួត​ដណ្តើមខ្សៃក្រវាត់​​​​​ Krud Kun Khmer។​​

សមាសភាពគូប្រកួតដណ្តើមខ្សែក្រវាត់ 4-MAN TOURNAMENT ទម្ងន់ ៥៤ គីឡូក្រាម ក្នុងនោះមាន ពេជ្រ សុភក្រ, រីកគី ដែនកុសល, ពុក អាក្រាញ់ និង ធន់ វិសាល។ ដោយឡែកគូមិត្តភាពខ្មែរ និងខ្មែរ មានមួយគូ គឺ ធន់ វិស្ណុ ត្រូវជួប រិទ្ធី នឹមណូ។

គូមិត្តភាពអន្តរជាតិមាន ២ គូ គឺ អ៊ុច ធារិទ្ធ ត្រូវជួបកីឡាករ អ៉ីរ៉ង់ ម៉ាហ៍ឌី ហ្ការីសវ៉ាន់ និង លន បញ្ញា ត្រូវជួបកីឡាករ អ៉ីរ៉ង់ ហ្វារីប៊ូស ហូសេនហ្សាដេ។ រីឯការប្រកួតចុងក្រោយ ដែលជាគូឯកប្រចាំ​ព្រឹត្តិការណ៍ គឺជំនួបដណ្តើមខ្សែក្រវាត់ គ្រុឌគុនខ្មែរ ទម្ងន់ ៥៤ គីឡូក្រាម រវាង​ជើង​ខ្លាំង ប៊ុន សុធា ទល់នឹងកីឡាករ អាហ្គានីស្ថាន ហាត់គុនខ្មែរ ប៉ែនកាក់ យ៉ាស៊ីន។

សមាសភាពគូប្រកួតទាំងអស់នេះ ជឿជាក់ ថា នឹងក្លាយជាការប្រកួតដ៏កក្រើក នៅលើសង្វៀន Krun Kun Khmer ប្រចាំសប្តាហ៍នេះ។ អ្វីដែលកំពុងក្លាយជាការទន្ទឹងរង់ចាំខ្លាំងបំផុតសម្រាប់អ្នកគាំទ្រ គឺចង់ឃើញ ថា តើកីឡាករ ​ប៊ុន សុធា អាចសាងស្នាដៃរបស់ខ្លួនយកឈ្នះលើកីឡាករកំពុងឡើងកូដ ប៉ែនកាក់ យ៉ាស៊ីន ក្លាយជាម្ចាស់ខ្សែក្រវ៉ាត់ Krud Kun Khmer បានឬទេ?

ដូច្នេះចម្លើយ គឺមានតែនៅថ្ងៃទី ១៤ ខែកញ្ញា ឆ្នាំ២០២៥ វេលាម៉ោង​​ ៦:៣០នាទីល្ងាចតទៅ នៅបរិវេណសួនឧស្សាហកម្ម វឌ្ឍនៈ១ ឃ្លាំង E តាមបណ្តោយផ្លូវវេងស្រេង រាជធានីភ្នំពេញ។ ផ្សាយផ្ទាល់តាមកញ្ចក់ទូរទស្សន៍ជាតិកម្ពុជា ផេកផ្លូវការ Krud Energy, VBL Sports និង ផេក​ VBL Keila៕

អត្ថបទ៖ សេម កុសល