តាមការបញ្ជាក់ពីប៉ូលិស ការបាញ់ប្រហារនៅវិហារ Islamic Center of San Diego (ICSD) កើតឡើង នាវេលាម៉ោង ១១:៤៣ នាទីព្រឹក (ម៉ោងនៅអាមេរិក) ថ្ងៃចន្ទ ទី១៨ ខែឧសភា ឆ្នាំ២០២៦ ហើយក្នុងចំណោមមនុស្សស្លាប់ ក៏រួមមានសន្តិសុខម្នាក់ និងជនសង្ស័យជាយុវជន ២នាក់ផងដែរ ដែលគេប្រទះឃើញស្លាប់ ក្នុងរថយន្ត នៅក្បែរវិហារ។

ទោះបីជាយ៉ាងណាក៏ដោយ មន្ត្រីជំនាញបានច្រានចោលថា ការវាយប្រហារនេះ​មិនមែនជាអំពើភេរវកម្មទេ ប៉ុន្តែវាគឺជាឧក្រិដ្ឋកម្ម ទាក់ទងនឹងការស្អប់ខ្ពើម។

សាក្សីនៅកន្លែងកើតហេតុ បានប្រាប់ទូរទស្សន៍ CBS ថា វាគឺជាការបាញ់យ៉ាងសន្ធាប់ ដោយមានលាន់ស្នូរផ្ទុះគ្រាប់កាំភ្លើង រហូតដល់ទៅ ៣០គ្រាប់។

ពេលកើតហេតុភ្លាមៗ ប៉ូលិសជាង១០០នាក់ ត្រូវបានបញ្ជូនទៅ ខណៈសាលារៀននៅក្បែរៗនោះ ក៏បិទទ្វាផងដែរ ដើម្បីសុវត្ថិភាព ហើយប្រធានាធិបតីអាមេរិក ដូណាល់ ត្រាំ ចាត់ទុកថា នេះគឺជាហេតុការណ៍ដ៏រន្ធត់។

ជុំវិញហេតុការណ៍នេះ ភ្នាក់ងារ FBI កំពុងបើកការស៊ើបអង្កេត ដើម្បីប្រមូលព័ត៌មានលម្អិត និងដើម្បីបញ្ជាក់ឲ្យច្បាស់ អំពីមូលហេតុពិតនៅពីក្រោយការវាយប្រហារ ព្រមទាំងស្វែងរកនរណាផ្សេង ដែលអាចមានជាប់ពាក់ព័ន្ធ។

សូមជម្រាបថា The Islamic Center គឺជាវិហារឥស្លាមធំបំផុតមួយ នៅក្នុង San Diego County ដោយមានសមាជិកនៅក្នុងសហគមន៍ជំនឿរបស់ខ្លួន ជាង ៥ ០០០ នាក់៕

អត្ថបទ៖ សុខ សុវណ្ណ

The post ផ្ទុះការបាញ់ប្រហារដ៏រន្ធត់ នៅវិហារឥស្លាមអាមេរិក ស្លាប់មនុស្ស ៥នាក់ appeared first on Kampuchea Thmey Daily.

បើតាមការលើកឡើងរបស់អគ្គមេធាវីស្តីទី Todd Blanche, វាអាចទៅរួច ដែលប្រធានាធិបតី និងមន្ត្រីរដ្ឋបាល គឺជាគោលដៅរបស់ខ្មាន់កាំភ្លើង។

យ៉ាងណា លោក Blanche បានថ្លែងប្រាប់ទូរទស្សន៍ NBC News ថា មូលហេតុនៃការវាយប្រហារ កំពុងស្ថិតក្រោមការស៊ើបអង្កេតនៅឡើយ ខណៈផ្នែកឧក្រិដ្ឋកម្មរបស់ FBI និងអង្គភាពប្រឆាំងភេរវកម្ម កំពុងស៊ើបអង្កេតលើហេតុការណ៍នេះ។

ជនសង្ស័យឈ្មោះ Cole Tomas Allen អាយុ ៣១ ឆ្នាំ ត្រូវបានចាប់ខ្លួនភ្លាមៗ ក្រោយបើកការបាញ់ប្រហារ នៅជិតប៉ុស្តិ៍ត្រួតពិនិត្យសន្តិសុខ អំឡុងពេលព្រឹត្តិការណ៍ ដែលមានការចូលរួមពីសំណាក់មន្ត្រីជាន់ខ្ពស់ និងអ្នកមុខអ្នកការជាច្រើនរូប។

យោងតាមបណ្តាញសង្គម និងប្រវត្តិការងារ, Allen គឺជាគ្រូបង្រៀន វិស្វករ និងជាអ្នកបង្កើតហ្គេមវីដេអូ ដែលរស់នៅភាគខាងត្បូងរដ្ឋ California។ សារព័ត៌មាន Bloomberg ផ្សាយថា គេបានទិញកាំភ្លើងជាច្រើនដើមដោយស្របច្បាប់ មុនពេលការវាយប្រហារកើតឡើង។

ពាក់ព័ន្ធរឿងនេះដែរ រដ្ឋអាជ្ញាសហរដ្ឋអាមេរិកប្រចាំតំបន់ Columbia គឺលោកស្រី Jeanine Pirro បានឲ្យដឹងថា Allen នឹងត្រូវប្រឈមមុខនឹងការចោទប្រកាន់នៅថ្ងៃចន្ទ រួមមានបទប្រើប្រាស់អាវុធអំឡុងពេលប្រព្រឹត្តបទឧក្រិដ្ឋហិង្សា និងការប្រើអំពើហិង្សា លើមន្ត្រីសហព័ន្ធដោយប្រើអាវុធគ្រោះថ្នាក់៕

អត្ថបទ៖ សុខ សុវណ្ណ

The post អាមេរិក ជឿថា លោក ត្រាំ និងមន្ត្រីរដ្ឋបាល គឺជាគោលដៅ នៃការបាញ់ប្រហារ appeared first on Kampuchea Thmey Daily.

តាមការផ្សាយរបស់ Khaosod នៅថ្ងៃព្រហស្បតិ៍ទី១២ខែកុម្ភៈឆ្នាំ២០២៦ ខ្មាន់កាំភ្លើងបានសម្រុកចូលសាលា Patong Prathankiriwat ក្នុងស្រុក Hat Yai នៃខេត្ត Songkhla នៅម៉ោង៥ល្ងាចថ្ងៃពុធ ហើយបើកការបាញ់ប្រហារនិងចាប់សិស្សធ្វើជាចំណាប់ខ្មាំង។

របាយការណ៍ប៉ូលិសបង្ហាញថា ខ្មាន់កាំភ្លើងជាមនុស្សប្រុសអាយុ១៨ឆ្នាំ ដែលលួចយកកាំភ្លើងពីប៉ូលិស។ រូបគេបានបាញ់នាយកសាលានិងសិស្សស្រីអាយុ១៤ឆ្នាំម្នាក់ឲ្យរបួស ហើយចាប់សិស្សផ្សេងទៀតធ្វើជាចំណាប់ខ្មាំង។

ទោះបីជាយ៉ាងណាក៏ដោយ នាយកសាលាដែលមានឈ្មោះ Sasipatchara Sinsamorn ត្រូវបានប្រកាសថាស្លាប់ក្នុងមន្ទីរពេទ្យដោយសាររបួសធ្ងន់ពេក ចំណែកខ្មាន់កាំភ្លើងត្រូវប៉ូលិសចាប់បាននៅទីតាំងកើតហេតុ ក្រោយការប្រឈមមុខដាក់គ្នារយៈពេល២ម៉ោង។

ទន្ទឹមនោះដែរ បើយោងតាមក្រសួងសុខាភិបាលថៃ, មានសិស្សច្រើននាក់ត្រូវរបួស ដោយសារតែលោតចុះពីអគារសាលារៀនព្រោះភាពភិតភ័យ។

ដ្បិតមូលហេតុមិនទាន់ត្រូវបានគេដឹង ប៉ុន្តែសារព័ត៌មានជាច្រើនក្នុងស្រុកថៃរាយការណ៍ថា ខ្មាន់កាំភ្លើងប្រហែលជាខឹងសម្បាចំពោះគ្រូបង្រៀននៅសាលានេះ។

ថៃតែងកើតមានការបាញ់ប្រហារសម្លាប់មនុស្សយ៉ាងញឹកញាប់ ដោយសារតែច្បាប់កាន់កាប់កាំភ្លើងដ៏អន់។ ហេតុការណ៍ខាងលើ ធ្វើឲ្យគេនឹកឃើញដល់ការបាញ់សម្លាប់រង្គាលមនុស្ស៣៦នាក់ ដែលភាគច្រើនជាក្មេងៗសិស្សសាលាមត្តេយ្យនៅភាគឦសានកាលពីឆ្នាំ២០២២ ដែលនោះគឺជាសោកនាដកម្មដ៏រន្ធត់បំផុតមួយក្នុងប្រវត្តិសាស្ត្រសម័យទំនើបរបស់ប្រទេសថៃ៕

អត្ថបទ៖ សុខ សុវណ្ណ

The post ស្លាប់នាយកសាលាថៃ ក្នុងហេតុការណ៍ខ្មាន់កាំភ្លើងចូលបាញ់ប្រហារ និងចាប់កូនសិស្សជាចំណាប់ខ្មាំង  appeared first on Kampuchea Thmey Daily.

តាមការផ្សាយរបស់ Khaosod, ការបាញ់ប្រហារកើតឡើងនាវេលាម៉ោង ៨យប់ថ្ងៃពុធទី២៤ខែធ្នូឆ្នាំ២០២៥ នៅខ័ណ្ឌ Khlong Toei។

ខ្មាន់កាំភ្លើង ត្រូវបានប៉ូលិសកំណត់អត្តសញ្ញាណថា មានឈ្មោះ Borin ជាជនសង្ស័យពាក់ព័ន្ធបទល្មើសគ្រឿងញៀន និងកាន់កាប់កាំភ្លើងខុសច្បាប់។

ក្នុងការវាយប្រហារនោះ ខ្មាន់កាំភ្លើងបានបាញ់បណ្តាលឲ្យមនុស្ស៣នាក់រងរបួស ក្នុងនោះមានជនស៊ីវិល២នាក់និងប៉ូលិសម្នាក់។

ក្រោយការបាញ់ប្រហារភ្លាមៗ ខ្មាន់កាំភ្លើងក៏រត់គេចខ្លួន ហើយប៉ូលិសកំពុងតាមចាប់ និងបើកការស៊ើបអង្កេតជាបន្ត៕ 

អត្ថបទ៖ សុខ សុវណ្ណ

The post ផ្ទុះការបាញ់ប្រហារនៅបាងកក បង្កការភ័យឆោឡោ appeared first on Kampuchea Thmey Daily.

បើតាមប៉ូលិសថៃ ហេតុការណ៍បាញ់ប្រហារនេះ បានកើតឡើងនៅវេលាម៉ោង១រំលងអាធ្រាត្រ ឈានចូលថ្ងៃទី៤ ខែតុលា ដោយមានជនសង្ស័យមួយក្រុមមានគ្នា៦-៧នាក់ ជិះម៉ូតូមកឈប់នៅលើស្ពាន ហើយបានបាញ់ជាង១០គ្រាប់ សំដៅទៅក្រុមមិត្តភ័ក្តិដែលប្រមូលផ្តុំនៅខាងក្រោម។

ជនរងគ្រោះទាំង២នាក់ មានអាយុប្រហែល២០ឆ្នាំ ម្នាក់ត្រូវគ្រាប់ចំកំភួនជើងខាងស្តាំ និងម្នាក់ទៀតត្រូវជង្គង់ខាងឆ្វេង ហើយត្រូវបានក្រុមសង្គ្រោះដឹកបញ្ជូនទៅកាន់មន្ទីរពេទ្យ។ សាក្សី​បាន​រាយការណ៍​ថា ក្រោយ​ការ​វាយ​ប្រហារ ខ្មាន់​កាំភ្លើង​បាន​ស្រែក​ថា «តើ​អ្នក​ចង់​បាន​ទៀត​ទេ?»។ មុន​នឹង​ភៀស​ខ្លួន​ចេញពីកន្លែង។

មន្ត្រី​ប៉ូលិសបាន​បិទ​តំបន់​នោះ ​ប្រមូល​សំបក​គ្រាប់​កាំភ្លើង​ជា​ច្រើន​គ្រាប់​ទុក​ជា​ភស្តុតាង និងកំពុងពិនិត្យមើល វីដេអូ CCTV ខណៈ​ដែល​ក្រុម​ស៊ើបអង្កេត​កំពុង​ធ្វើ​ការ​តាម​ដាន​ជនសង្ស័យ។

អាជ្ញាធរថៃបាននិយាយថា ការវាយប្រហារនេះបានបន្ថែមការព្រួយបារម្ភកាន់តែខ្លាំងឡើងចំពោះអំពើហិង្សារបស់យុវជន និងការប្រើប្រាស់កាំភ្លើងនៅក្នុងទីក្រុងបាងកក ប្រទេសថៃ៕

អត្ថបទ៖ ប៊ុន សុភាព

The post ផ្ទុះការបាញ់ប្រហារជិត១០គ្រាប់ នៅ​ស្ពាន Phra Pok Klao ក្នុងទីក្រុងបាងកក appeared first on Kampuchea Thmey Daily.

តាមការផ្សាយរបស់ BBC, ហេតុការណ៍នេះកើតឡើងកាលពីថ្ងៃអាទិត្យទី២៨ខែកញ្ញាឆ្នាំ២០២៥ នៅពេលខ្មាន់កាំភ្លើងចូលបាញ់ប្រហារក្នុងព្រះវិហារសាសនាគ្រិស្ត Mormon នៅទីក្រុង Grand Blanc រដ្ឋ Michigan។

តាមការបញ្ជាក់ពីប៉ូលិស ខ្មាន់កាំភ្លើងឈ្មោះ Thomas Jacob Sanford អាយុ៤០ឆ្នាំ បានបើករថយន្តបុកទម្លាយទ្វាររួចបើកការបាញ់ប្រហារក្នុងព្រះវិហារខណៈពេលមនុស្សរាប់រយនាក់កំពុងរៀបចំពិធីអធិស្ឋាន។

ជនសង្ស័យក៏ចាក់សាំងដុតព្រះវិហារផងដែរ មុននឹងចាកចេញ ប៉ុន្តែចុងក្រោយត្រូវស្លាប់ ក្នុងការបាញ់តដៃជាមួយប៉ូលិស។

យ៉ាងណាភ្លាមៗប៉ូលិសមិនទាន់ដឹងមូលហេតុឈានដល់ការវាយប្រហារយ៉ាងសាហាវឃោរឃៅនេះឡើយ ប៉ុន្តែប្រធានាធិបតីអាមេរិក ដូណាល់ ត្រាំ បានហៅទង្វើនេះថាជា «ការវាយប្រហារជាថ្មី កំណត់គោលដៅអ្នកកាន់សាសនាគ្រិស្តនៅសហរដ្ឋអាមេរិក»។

ប្រធានាធិបតីអាមេរិកបានបង្ហោះលើបណ្តាញសង្គម Truth Social ថា លោកទទួលបានរបាយការណ៍សង្ខេបអំពីការវាយប្រហារដ៏គួរឲ្យរន្ធត់ ហើយប្តេជ្ញាគាំទ្រយ៉ាងពេញទំហឹងលើ FBI។ លោកបន្ថែមថា វា​ហាក់​ដូច​ជា​ការ​វាយ​ប្រហារកំណត់មុខសញ្ញា​មួយ​ទៀតហើយ ​លើ​គ្រិស្ត​សាសនិក​នៅ​សហរដ្ឋ​អាមេរិក។

ការវាយប្រហារនេះកើតឡើងត្រឹមមួយថ្ងៃប៉ុណ្ណោះ បន្ទាប់ពីអ្នកគ្រប់គ្រងព្រះវិហារ លោក Russell M Nelson ទទួលមរណភាព។ លោកបានចែកឋាននៅអាយុ ១០១ឆ្នាំ ក្នុងឯផ្ទះនាទីក្រុង Salt Lake៕

អត្ថបទ៖ សុខ សុវណ្ណ

ចុចអាន៖ ទីបំផុត ឃាតករសម្លាប់ Charlie Kirk​ សារភាពមូលហេតុ

The post នៅអាមេរិក កើតមានការបាញ់ប្រហារ-ដុតព្រះវិហារដ៏រន្ធត់ ស្លាប់និងរបួសមនុស្សច្រើននាក់  appeared first on Kampuchea Thmey Daily.

នាយក FBI លោក Kash Patel បាននិយាយថា Robinson ដែលកន្លងបានបដិសេដមិនសហការជាមួយអ្នកស៉ើបអង្គេត ទីបំផុតបានសារភាពប្រាប់ពីមូលហេតុដែលរូបគេធ្វើ ព្រោះតែការស្អប់ខ្ពើមទៅលើ Kirk។ នៅពេលអ្នកស៉ើបអង្កេតសួរហេតុអ្វីបានជាគាត់ធ្វើ? Robinson បានឆ្លើយថាព្រោះតែ «ការស្អប់ខ្ពើមមួយចំនួនមិនអាចចរចាជាមួយបានទេ»។​ Robinson បានស្អប់ Kirkនិងឥទ្ធិពលនយោបាយរបស់គាត់យ៉ាងខ្លាំង ដោយរូបគេក៏ធ្លាប់ប្រាប់មិត្តភក្តិរបស់ខ្លួនថាបើមានឱកាសរូបគេនឹងសម្លាប់ Kirk។

នៅក្នុងឃាតកម្មនេះ FBI បានរងការរិះគន់យ៉ាងខ្លាំងចំពោះការដោះស្រាយ ព្រោះRobinson ត្រូវបានចាប់ខ្លួនជាង ៣០ ម៉ោងក្រោយមក ដោយសារតែឪពុករបស់គាត់ផ្ដល់ព័ត៌មានឲ្យ។ បើទោះបីអ្នកអភិរក្សមួយចំនួនបានរិះគន់ការដឹកនាំរបស់លោក Patel ជានាយក FBI តែអ្នកផ្សេងទៀតរួមទាំងប្រធានាធិបតី ដូណាល់ ត្រាំបានសរសើរ FBI ចំពោះការនាំជនសង្ស័យមកកាត់ទោស។

គួរបញ្ជាក់ថា Charlie Kirk អាយុ ៣១ ឆ្នាំគឺជាឥស្សរជនស្តាំនិយមដ៏ល្បីល្បាញនៅសហរដ្ឋអាមេរិក គាត់បានបង្កើតក្រុម Turning Point USA ដែលជាក្រុមដែលផ្សព្វផ្សាយគំនិតអភិរក្សនិយមនៅក្នុងបរិវេណមហាវិទ្យាល័យ និងជាសម្ព័ន្ធមិត្តជិតស្និទ្ធរបស់ប្រធានាធិបតី ដូណាល់ ត្រាំ។ ការស្លាប់របស់លោកបានធ្វើឲ្យមានការព្រួយបារម្ភពីអំពើហិង្សាលើអ្នកន​យោបាយអាមេរិក និងជំរុញឲ្យទាំង លោក​ត្រាំ​​និងថ្នាក់ដឹកនាំអាមេរិក​ផ្សេងទៀតបង្កើនការការពារផ្ទាល់ខ្លួន៕

អត្ថបទ៖ ប៊ុន សុភាព

The post ទីបំផុត ឃាតករសម្លាប់ Charlie Kirk​ សារភាពមូលហេតុ appeared first on Kampuchea Thmey Daily.

Robinson នឹងត្រូវបានចោទប្រកាន់ជាផ្លូវការនៅថ្ងៃអង្គារ ហើយអ្នកស៊ើបអង្កេតកំពុងសាកសួរជាមួយមិត្តភក្តិ និងក្រុមគ្រួសាររបស់ជនសង្ស័យដើម្បីដឹងពីមូលហេតុពីក្រោយការបាញ់ប្រហារ បើទោះបីជារូបគេមិនព្រមសហការក៏ដោយ។

គួររម្លឹកថាលោក Kirk ដែលជាសម្ព័ន្ធមិត្តជិតស្និទ្ធរបស់លោក ដូណាល់ ត្រាំ និងជាសហស្ថាបនិកនៃ Turning Point USA ត្រូវបានបាញ់សម្លាប់នៅកអំឡុងពេលព្រឹត្តិការណ៍មួយនៅខាងក្រៅសាកលវិទ្យាល័យ Utah Valley ដែលមានមនុស្សចូលរួមចំនួន៣ពាន់។ ការបាញ់ប្រហារនេះ ជនសង្ស័យបានបាញ់ចេញពីដំបូលផ្ទះ នៅមិនឆ្ងាយពីកន្លែងប្រមូលផ្ដុំប៉ុន្មាននោះទេ។

បន្ទាប់ពីការតាមប្រមាញ់អស់រយៈពេល ៣៣ ម៉ោង Robinson ដែលជានិស្សិតនៅមហាវិទ្យាល័យបច្ចេកទេស Dixie Technical College ត្រូវបានចាប់ខ្លួននៅផ្ទះឪពុកម្តាយរបស់គាត់។ យោង​តាម​ សាច់​ញាតិ​បាន​រាយការណ៍​ថា Robinson ជាប់​ពាក់ព័ន្ធ​នឹង​ការ​វាយ​ប្រហារ​នេះ ហើយ​ធ្លាប់​បាន​សម្ដែង​ការ​មិន​ពេញ​ចិត្ត​ចំពោះ Kirk កន្លង​មក។

សមាជិកគ្រួសារម្នាក់ក៏បានប្រាប់ក្រុមអ្នកស៊ើបអង្កេតថា Robinson ប្រែក្លាយជាអ្នកចូលចិត្តនយោបាយកាន់តែខ្លាំងឡើងក្នុងប៉ុន្មានឆ្នាំចុងក្រោយនេះ ហើយអាជ្ញាធរនិយាយថា រូបគេក៏ឆ្លាក់សារប្រឆាំងរបបហ្វាស៊ីស លើសម្បកគ្រាប់កាំភ្លើង ដែលគេបានរកឃើញជាមួយអាវុធប្រើក្នុងការសម្លាប់នោះ។ ​មិត្តរួមបន្ទប់របស់ Robinson ក៏កំពុងតែសហការណ៍ជាមួយ FBI ដែរ។

គួរបញ្ជាក់ថាការ​បាញ់​ប្រហារ​នេះ​បាន​ធ្វើ​ឲ្យ​អ្នក​អភិរក្ស​និយម​ជា​ច្រើន​ខឹង​សម្បា និងជំរុញឱ្យមានការព្រួយបារម្ភអំពីការកើនឡើងនៃអំពើហិង្សាផ្នែកនយោបាយនៅក្នុងសហរដ្ឋអាមេរិក៕

អត្ថបទ៖ ប៊ុន សុភាព

The post ជនសង្ស័យបាញ់សម្លាប់ Charlie Kirk បដិសេធមិនសហការជាមួយអ្នកស៊ើបអង្កេត appeared first on Kampuchea Thmey Daily.