នៅថៃ ផ្ទុះបាតុកម្មច្រើនកន្លែង តវ៉ាលទ្ធផលឆ្នោត ដែលពោរពេញដោយការក្លែងបន្លំ

ស្ថានការណ៍នៅប្រទេសថៃក្រោយការបោះឆ្នោត កាន់តែក្តៅទៅៗហើយ ដោយសារតែមានការធ្វើបាតុកម្មជាច្រើនកន្លែងនៅតាមបណ្តាខេត្តនានា ជាពិសេសតាមមណ្ឌលរាប់សន្លឹកឆ្នោតតែម្តង។

ប្រជាពលរដ្ឋ នាំគ្នាចេញមកតវ៉ា និងឡោមព័ទ្ធមណ្ឌលរាប់សន្លឹកឆ្នោត ដោយសារពួកគេមិនពេញចិត្តនឹងការបកស្រាយរបស់មន្ត្រីបោះឆ្នោត ហើយសង្ស័យថាមានការបន្លំលទ្ធផល និងខ្វះតម្លាភាព។

តាមការផ្សាយរបស់ Amarin កាលពីថ្ងៃអង្គារទី១០ខែកុម្ភៈឆ្នាំ២០២៦ ក្នុងខេត្ត Chonburi មានភាពវឹកវរខ្លាំងនៅមណ្ឌលទី៣ បន្ទាប់ពីធ្លាយព័ត៌មានថា មន្ត្រីបានលួចដឹកជញ្ជូនហឹបឆ្នោតទៅទុកក្នុងឃ្លាំងងងឹតមួយនាពេលយប់។ លោក Wiroj Lakkhanaadisorn សមាជិកសភាបក្សប្រជាជន ក៏បានចុះទៅដល់ទីតាំងនោះដើម្បីតាមរកហឹបឆ្នោតដែល បាត់ដាន។

ចំណែកនៅខេត្ត Chai Nat អ្នកគាំទ្របក្សប្រជាជន បានសម្រុកទៅកាន់សាលាខេត្ត ដើម្បីទាមទារឲ្យរាប់សន្លឹកឆ្នោតឡើងវិញ បន្ទាប់ពីរកឃើញថាចំនួនសន្លឹកឆ្នោតមានភាពមិនប្រក្រតី ពោលគឺសន្លឹកឆ្នោតលើសចំនួនអ្នកបោះឆ្នោត រហូតដល់ជិត ៧ ០០០ សន្លឹក។

រីឯនៅខេត្ត Udon Thani, បេក្ខជនសមាជិកសភាម្នាក់បានសម្រុកទៅតវ៉ានៅមណ្ឌលគណៈកម្មាធិការខេត្ត ដោយសារតែគាត់បានបោះឆ្នោតឲ្យខ្លួនឯងផ្ទាល់ ប៉ុន្តែលទ្ធផលផ្លូវការដែលប្រកាសចេញមក បែរជាបង្ហាញថាលទ្ធផលរបស់គាត់គឺ «សូន្យសំឡេង» ទៅវិញ។

ងាកទៅ Pathum Thani មានការចោទប្រកាន់ថា មន្ត្រីបានយកក្រណាត់ទៅគ្របកាមេរ៉ាសុវត្ថិភាព (CCTV) នៅមណ្ឌលទី៧ ដែលធ្វើឲ្យមហាជនកាន់តែសង្ស័យពីភាពមិនស្មោះត្រង់។

នៅ ខេត្ត មហាសារ៉ាខាម ក្រុមនិស្សិតបានចេញមកតវ៉ាតាំងពីយប់រហូតដល់ភ្លឺ ទាមទារឲ្យរាប់សន្លឹកឆ្នោតឡើងវិញ ដោយសារតែភាពមិនប្រក្រតីក្នុងដំណើរការរាប់សន្លឹកឆ្នោត។

ចុងក្រោយបំផុតគឺនៅរាជធានីបាងកកតែម្តង ដោយនិស្សិតថៃជាច្រើននាក់ បានលើកគ្នាទៅតវ៉ានៅមុខទីស្នាក់ការគណៈកម្មាធិការរៀបចំការបោះឆ្នោត (EC) ក្នុងទីក្រុងបាងកក ដើម្បីទាមទារឲ្យមានការរាប់សន្លឹកឆ្នោតទូទាំងប្រទេសឡើងវិញ ចំពេលមានការចោទប្រកាន់អំពីការក្លែងបន្លំនិងទិញសន្លឹកឆ្នោត។

បាតុករទាមទារឲ្យមានការពន្យល់និងបញ្ជាក់ឲ្យច្បាស់អំពីករណីសង្ស័យជាច្រើនដូចជាការដាច់ភ្លើងពេលរាប់សន្លឹកឆ្នោតនៅមណ្ឌលខ្លះភាពមិនស៊ីគ្នារវាងលទ្ធផលដែលបានប្រកាសនិងចំនួនសន្លឹកឆ្នោតជាក់ស្តែង ការគូសសញ្ញារាប់សន្លឹកឆ្នោតមិនច្បាស់ ឬមិនមានតម្លាភាពនិងការសង្ស័យលើការកែបន្លំតួលេខ៕

អត្ថបទ៖ សុខ សុវណ្ណ