ស្លាប់នាយកសាលាថៃ ក្នុងហេតុការណ៍ខ្មាន់កាំភ្លើងចូលបាញ់ប្រហារ និងចាប់កូនសិស្សជាចំណាប់ខ្មាំង 

ប្រទេសថៃ កើតមានហេតុការណ៍បាញ់ប្រហារនៅសាលារៀនដ៏កក្រើកសាជាថ្មី ដោយខ្មាន់កាំភ្លើងថែមទាំងចាប់កូនសិស្សធ្វើជាចំណាប់ខ្មាំងទៀតផង ខណៈបើយោងតាមសេចក្តីរាយការណ៍ចុងក្រោយបានឲ្យដឹងថា ការវាយប្រហារនោះបណ្តាលឲ្យមនុស្សម្នាក់ស្លាប់ ហើយម្នាក់នោះគឺជានាយកសាលាតែម្តង។

តាមការផ្សាយរបស់ Khaosod នៅថ្ងៃព្រហស្បតិ៍ទី១២ខែកុម្ភៈឆ្នាំ២០២៦ ខ្មាន់កាំភ្លើងបានសម្រុកចូលសាលា Patong Prathankiriwat ក្នុងស្រុក Hat Yai នៃខេត្ត Songkhla នៅម៉ោង៥ល្ងាចថ្ងៃពុធ ហើយបើកការបាញ់ប្រហារនិងចាប់សិស្សធ្វើជាចំណាប់ខ្មាំង។

របាយការណ៍ប៉ូលិសបង្ហាញថា ខ្មាន់កាំភ្លើងជាមនុស្សប្រុសអាយុ១៨ឆ្នាំ ដែលលួចយកកាំភ្លើងពីប៉ូលិស។ រូបគេបានបាញ់នាយកសាលានិងសិស្សស្រីអាយុ១៤ឆ្នាំម្នាក់ឲ្យរបួស ហើយចាប់សិស្សផ្សេងទៀតធ្វើជាចំណាប់ខ្មាំង។

ទោះបីជាយ៉ាងណាក៏ដោយ នាយកសាលាដែលមានឈ្មោះ Sasipatchara Sinsamorn ត្រូវបានប្រកាសថាស្លាប់ក្នុងមន្ទីរពេទ្យដោយសាររបួសធ្ងន់ពេក ចំណែកខ្មាន់កាំភ្លើងត្រូវប៉ូលិសចាប់បាននៅទីតាំងកើតហេតុ ក្រោយការប្រឈមមុខដាក់គ្នារយៈពេល២ម៉ោង។

ទន្ទឹមនោះដែរ បើយោងតាមក្រសួងសុខាភិបាលថៃ, មានសិស្សច្រើននាក់ត្រូវរបួស ដោយសារតែលោតចុះពីអគារសាលារៀនព្រោះភាពភិតភ័យ។

ដ្បិតមូលហេតុមិនទាន់ត្រូវបានគេដឹង ប៉ុន្តែសារព័ត៌មានជាច្រើនក្នុងស្រុកថៃរាយការណ៍ថា ខ្មាន់កាំភ្លើងប្រហែលជាខឹងសម្បាចំពោះគ្រូបង្រៀននៅសាលានេះ។

ថៃតែងកើតមានការបាញ់ប្រហារសម្លាប់មនុស្សយ៉ាងញឹកញាប់ ដោយសារតែច្បាប់កាន់កាប់កាំភ្លើងដ៏អន់។ ហេតុការណ៍ខាងលើ ធ្វើឲ្យគេនឹកឃើញដល់ការបាញ់សម្លាប់រង្គាលមនុស្ស៣៦នាក់ ដែលភាគច្រើនជាក្មេងៗសិស្សសាលាមត្តេយ្យនៅភាគឦសានកាលពីឆ្នាំ២០២២ ដែលនោះគឺជាសោកនាដកម្មដ៏រន្ធត់បំផុតមួយក្នុងប្រវត្តិសាស្ត្រសម័យទំនើបរបស់ប្រទេសថៃ៕

អត្ថបទ៖ សុខ សុវណ្ណ